ಇಂಡೋ-ಬಾಂಗ್ಲಾ ಗಡಿಯಲ್ಲಿ ಹೊಸ ಸೆಕ್ಯೂರಿಟಿ ಪ್ಲಾನ್: ಬಾರ್ಡರ್ ಕಾಯ್ತಾವಂತೆ ಹಾವು-ಮೊಸಳೆ

ಹೊಸದಿಗಂತ ಡಿಜಿಟಲ್ ಡೆಸ್ಕ್:

ಭಾರತ–ಬಾಂಗ್ಲಾದೇಶ ಗಡಿಯಲ್ಲಿ ಅಕ್ರಮ ನುಸುಳುಕೋರರನ್ನು ತಡೆಯಲು ಗಡಿ ಭದ್ರತಾ ಪಡೆ ಹೊಸ ಮತ್ತು ಅಚ್ಚರಿ ಮೂಡಿಸುವ ಕ್ರಮದ ಕುರಿತು ಚರ್ಚೆ ನಡೆಸುತ್ತಿರುವ ವರದಿಗಳು ಗಮನ ಸೆಳೆದಿವೆ.

ತಂತಿಬೇಲಿ ಅಳವಡಿಸಲು ಅಸಾಧ್ಯವಾಗಿರುವ ನದಿ, ಜೌಗು ಮತ್ತು ಕಷ್ಟಕರ ಪ್ರದೇಶಗಳಲ್ಲಿ ಹಾವುಗಳು ಹಾಗೂ ಮೊಸಳೆಗಳನ್ನು ನೈಸರ್ಗಿಕ ತಡೆಗೋಡೆಯಾಗಿ ಬಳಸುವ ಸಾಧ್ಯತೆಯನ್ನು BSF ಪರಿಶೀಲಿಸುತ್ತಿದೆ ಎನ್ನಲಾಗಿದೆ.

ಭಾರತ–ಬಾಂಗ್ಲಾದೇಶದ ಒಟ್ಟು 4,096 ಕಿ.ಮೀ ಗಡಿಯಲ್ಲಿ ಕೆಲವು ಭಾಗಗಳು ನದಿ ಮತ್ತು ಜೌಗು ಪ್ರದೇಶಗಳಿಂದ ಕೂಡಿದ್ದು, ವಿಶೇಷವಾಗಿ ಸುಮಾರು 175 ಕಿ.ಮೀ ಪ್ರದೇಶದಲ್ಲಿ ಸಾಮಾನ್ಯ ಬೇಲಿ ನಿರ್ಮಾಣ ಕಷ್ಟಕರವಾಗಿದೆ. ಇಂತಹ ಸ್ಥಳಗಳಲ್ಲೇ ಅಕ್ರಮ ಪ್ರವೇಶದ ಪ್ರಕರಣಗಳು ಹೆಚ್ಚಾಗುತ್ತಿರುವ ಹಿನ್ನೆಲೆಯಲ್ಲಿ ಈ ವಿನೂತನ ಪ್ರಸ್ತಾಪವನ್ನು ಉನ್ನತ ಮಟ್ಟದಲ್ಲಿ ಚರ್ಚಿಸಲಾಗಿದೆ ಎಂದು ಮೂಲಗಳು ತಿಳಿಸಿವೆ.

ಇದನ್ನೂ ಓದಿ:

ಫೆಬ್ರವರಿ ಮತ್ತು ಮಾರ್ಚ್ ತಿಂಗಳಲ್ಲಿ ನಡೆದ ಉನ್ನತ ಮಟ್ಟದ ಸಭೆಗಳಲ್ಲಿ ಈ ವಿಚಾರ ಪ್ರಸ್ತಾಪವಾಗಿದ್ದು, ಪೂರ್ವ ಹಾಗೂ ಈಶಾನ್ಯ ವಲಯದ ಅಧಿಕಾರಿಗಳಿಗೆ ಕಾರ್ಯಸಾಧ್ಯತೆ ಕುರಿತು ವರದಿ ನೀಡುವಂತೆ ಸೂಚನೆ ನೀಡಲಾಗಿದೆ ಎಂದು ವರದಿಗಳು ಹೇಳಿವೆ. ಆದರೆ ಯಾವ ಭಾಗಗಳಲ್ಲಿ, ಎಷ್ಟು ಪ್ರಮಾಣದಲ್ಲಿ ಮತ್ತು ಯಾವ ರೀತಿಯಲ್ಲಿ ಇವುಗಳನ್ನು ಬಳಸಲಾಗುವುದು ಎಂಬುದರ ಬಗ್ಗೆ ಇನ್ನೂ ಸ್ಪಷ್ಟತೆ ಸಿಕ್ಕಿಲ್ಲ.

ಸದ್ಯಕ್ಕೆ ಇದು ಅಂತಿಮ ನಿರ್ಧಾರವಲ್ಲ; ಪ್ರಾಥಮಿಕ ಹಂತದ ಚರ್ಚೆಯಷ್ಟೇ ಎಂದು ತಿಳಿದುಬಂದಿದೆ. ಗಡಿ ಭದ್ರತೆಯಲ್ಲಿ ತಂತ್ರಜ್ಞಾನ ಜೊತೆಗೆ ನೈಸರ್ಗಿಕ ತಡೆಗಳನ್ನು ಬಳಸುವ ಈ ಆಲೋಚನೆ ದೇಶದಾದ್ಯಂತ ಕುತೂಹಲ ಮತ್ತು ಚರ್ಚೆಗೆ ಕಾರಣವಾಗಿದೆ.