ಕರಾವಳಿಯ ಮುತ್ತು ಎಂದೇ ಕರೆಯಲ್ಪಡುವ ಕುಂದಾಪುರವು ತನ್ನ ನೈಸರ್ಗಿಕ ಸೌಂದರ್ಯ ಮತ್ತು ಧಾರ್ಮಿಕ ಕೇಂದ್ರಗಳಿಂದ ಪ್ರವಾಸಿಗರನ್ನು ತನ್ನತ್ತ ಸೆಳೆಯುತ್ತಿದೆ. ಮರವಂತೆಯ ರಾಷ್ಟ್ರೀಯ ಹೆದ್ದಾರಿಯಿಂದ ಹಿಡಿದು ಆನೆಗುಡ್ಡೆಯ ಗಣಪತಿಯವರೆಗೆ ಪ್ರತಿಯೊಂದು ಸ್ಥಳವೂ ತನ್ನದೇ ಆದ ವಿಶಿಷ್ಟತೆಯನ್ನು ಹೊಂದಿದೆ. ಇತ್ತೀಚಿನ ವರ್ಷಗಳಲ್ಲಿ ಕೋಡಿ ಬೀಚ್ನ ಸೀ ವಾಕ್ ಪ್ರವಾಸಿಗರ ಪ್ರಮುಖ ಆಕರ್ಷಣೆಯಾಗಿ ಮಾರ್ಪಟ್ಟಿದೆ. ವಾರಾಂತ್ಯದ ರಜೆ ಕಳೆಯಲು ಮಾತ್ರವಲ್ಲದೆ, ದೈವಿಕ ಅನುಭೂತಿ ಪಡೆಯಲು ಕುಂದಾಪುರ ಈಗ ಹೇಳಿ ಮಾಡಿಸಿದ ಜಾಗವಾಗಿದೆ.
ಇಲ್ಲಿ ನೀವು ಭೇಟಿ ನೀಡಲೇಬೇಕಾದ ಪ್ರಮುಖ ಸ್ಥಳಗಳು ಇವು:
ತ್ರಾಸಿ – ಮರವಂತೆ ಬೀಚ್
ಒಂದು ಬದಿಯಲ್ಲಿ ಅರಬ್ಬೀ ಸಮುದ್ರ, ಇನ್ನೊಂದು ಬದಿಯಲ್ಲಿ ಸೌಪರ್ಣಿಕಾ ನದಿ – ಇವುಗಳ ಮಧ್ಯೆ ಸಾಗುವ ರಾಷ್ಟ್ರೀಯ ಹೆದ್ದಾರಿಯ ದೃಶ್ಯ ಅದ್ಭುತ. ಸೂರ್ಯಾಸ್ತ ನೋಡಲು ಇದು ಅತ್ಯುತ್ತಮ ಜಾಗ.
ಆನೆಗುಡ್ಡೆ ಶ್ರೀ ವಿನಾಯಕ ದೇವಸ್ಥಾನ
ಕುಂದಾಪುರದಿಂದ ಕೂಗಳತೆ ದೂರದಲ್ಲಿರುವ ಕುಂಭಾಶಿಯಲ್ಲಿ ಈ ಸುಪ್ರಸಿದ್ಧ ಗಣಪತಿ ದೇವಸ್ಥಾನವಿದೆ. ಯಾವುದೇ ಶುಭ ಕಾರ್ಯ ಮಾಡುವ ಮುನ್ನ ಇಲ್ಲಿಗೆ ಭೇಟಿ ನೀಡುವುದು ಭಕ್ತರ ನಂಬಿಕೆ.
ಕೋಡಿ ಬೀಚ್ ಮತ್ತು ಸೀ ವಾಕ್
ನದಿ ಮತ್ತು ಸಮುದ್ರ ಸೇರುವ ಜಾಗ (ಸಂಗಮ) ಇಲ್ಲಿನ ವಿಶೇಷ. ಇಲ್ಲಿ ನಿರ್ಮಿಸಲಾದ ‘ಸೀ ವಾಕ್’ ಮೇಲೆ ಸಂಜೆ ಹೊತ್ತು ನಡೆಯುವುದು ಮನಸ್ಸಿಗೆ ತುಂಬಾ ಮುದ ನೀಡುತ್ತದೆ.
ಕುಂದೇಶ್ವರ ದೇವಸ್ಥಾನ
ಕುಂದಾಪುರ ಪೇಟೆಯ ಹೃದಯಭಾಗದಲ್ಲಿರುವ ಈ ಪುರಾತನ ಶಿವನ ದೇವಸ್ಥಾನದಿಂದಲೇ ಈ ಊರಿಗೆ ‘ಕುಂದಾಪುರ’ ಎಂಬ ಹೆಸರು ಬಂದಿದೆ ಎಂದು ಹೇಳಲಾಗುತ್ತದೆ.
ಹಟ್ಟಿಯಂಗಡಿ ಸಿದ್ಧಿವಿನಾಯಕ ದೇವಸ್ಥಾನ
ವಾರಾಹಿ ನದಿಯ ದಡದಲ್ಲಿರುವ ಈ ದೇವಸ್ಥಾನವು ಎಂಟನೇ ಶತಮಾನದಷ್ಟು ಹಳೆಯದಾದ ಸುಂದರ ಗಣಪತಿ ವಿಗ್ರಹವನ್ನು ಹೊಂದಿದೆ.
ಒತ್ತಿನೆಣೆ ವ್ಯೂ ಪಾಯಿಂಟ್
ಬೈಂದೂರು ಸಮೀಪವಿರುವ ಇಲ್ಲಿಂದ ಸಮುದ್ರ ಮತ್ತು ನದಿ ಸೇರುವ ದೃಶ್ಯವನ್ನು ಎತ್ತರದ ಜಾಗದಿಂದ ನೋಡಬಹುದು. ಇಲ್ಲಿನ ಸೂರ್ಯಾಸ್ತದ ದೃಶ್ಯ ಕಣ್ಮನ ಸೆಳೆಯುವಂತದ್ದು.
