ಇಂದಿನ ತಂತ್ರಜ್ಞಾನ ಯುಗದಲ್ಲಿ ಮಕ್ಕಳು ಪುಸ್ತಕಗಳಿಗಿಂತ ಮೊಬೈಲ್ ಮತ್ತು ಟಿವಿಗೆ ಹೆಚ್ಚು ಗಮನ ಕೊಡುತ್ತಿದ್ದಾರೆ. ಆದರೆ, ಪುಸ್ತಕಗಳ ಮಹತ್ವವನ್ನು ಮಕ್ಕಳಿಗೆ ತೋರಿಸುವುದು ಪೋಷಕರ ಪ್ರಮುಖ ಕರ್ತವ್ಯ. ಪೋಷಕರು ಸ್ವತಃ ಓದುವ ಮೂಲಕ, ಓದಿನ ಮಹತ್ವವನ್ನು ಸರಳ ಉದಾಹರಣೆಗಳು ಮತ್ತು ಪ್ರೇರಣಾದಾಯಕ ಮಾತುಗಳ ಮೂಲಕ ಮಕ್ಕಳಿಗೆ ತಿಳಿಸಬೇಕು. ಪುಸ್ತಕಗಳ ಪ್ರಪಂಚವನ್ನು ಪರಿಚಯಿಸಿದರೆ, ಅದು ಮಕ್ಕಳ ಜೀವನದಲ್ಲಿ ಬೃಹತ್ ಬದಲಾವಣೆ ತರುತ್ತದೆ.
ಹೆಚ್ಚು ಓದಿದಂತೆ ಹೆಚ್ಚು ಜ್ಞಾನ
ಮಕ್ಕಳಿಗೆ ಓದುವುದರಿಂದ ಜ್ಞಾನ ಹೆಚ್ಚುತ್ತದೆ ಎಂಬುದನ್ನು ತಿಳಿಸಬೇಕು. ನಮ್ಮ ಗಾದೆ ಮಾತೇ ಹೇಳುತ್ತದೆ – “ಓದು ಒಕ್ಕಾಲು ಬುದ್ಧಿ ಮುಕ್ಕಾಲು”. ಪುಸ್ತಕಗಳನ್ನು ಓದುವ ಅಭ್ಯಾಸವು ಮಕ್ಕಳಲ್ಲಿ ಕಲ್ಪನೆಯ ಶಕ್ತಿಯನ್ನು ಬೆಳೆಸುತ್ತದೆ ಹಾಗೂ ಹೊಸ ವಿಚಾರಗಳನ್ನು ಅನ್ವೇಷಿಸುವ ಆಸಕ್ತಿಯನ್ನು ಮೂಡಿಸುತ್ತದೆ.
ಪುಸ್ತಕವೇ ವಿಶ್ವ ಪ್ರವಾಸದ ಟಿಕೆಟ್
ಮಕ್ಕಳಿಗೆ ಓದುವುದನ್ನು ವಿಶ್ವವನ್ನು ಸುತ್ತುವ ಟಿಕೆಟ್‌ಗೂ ಹೋಲಿಸಿ ವಿವರಿಸಬಹುದು. ಒಂದು ಪುಸ್ತಕ ಓದುವುದರಿಂದಲೇ ಮಕ್ಕಳು ಅನೇಕ ದೇಶ, ಸಂಸ್ಕೃತಿ ಮತ್ತು ವಿಚಾರಗಳನ್ನು ತಿಳಿದುಕೊಳ್ಳುತ್ತಾರೆ. ಇದು ಅವರಲ್ಲಿ ಕುತೂಹಲವನ್ನು ಮೂಡಿಸಿ ಜ್ಞಾನಕ್ಕೆ ದಾರಿ ಮಾಡಿಕೊಡುತ್ತದೆ.
ಓದುವ ಮೂಲಕ ನಾಯಕತ್ವ ಬೆಳವಣಿಗೆ
ಪುಸ್ತಕ ಓದುವುದರಿಂದ ಮಕ್ಕಳಲ್ಲಿ ಆತ್ಮವಿಶ್ವಾಸ ಹಾಗೂ ನಾಯಕತ್ವ ಗುಣ ಬೆಳೆಯುತ್ತದೆ. ಬಲಿಷ್ಠ ಬುದ್ಧಿಶಕ್ತಿಯು ಅವರಿಗೆ ಜೀವನದಲ್ಲಿ ಧನಾತ್ಮಕ ಪರಿಣಾಮ ಬೀರುತ್ತದೆ. ಇಂದಿನ ಓದುಗ ನಾಳೆಯ ನಾಯಕ ಎಂಬ ಮಾತು ಮಕ್ಕಳಿಗೆ ಪ್ರೇರಣೆ ನೀಡುತ್ತದೆ.
ಪುಸ್ತಕ – ನಂಬಿಗಸ್ತ ಸ್ನೇಹಿತ
ಪುಸ್ತಕ ಸ್ನೇಹಿತ, ಶಿಕ್ಷಕ ಮತ್ತು ಮನರಂಜಕನ ಪಾತ್ರವನ್ನು ನಿರ್ವಹಿಸುತ್ತದೆ. ಪೋಷಕರು ಮಕ್ಕಳಿಗೆ ಗಿಫ್ಟ್ ನೀಡಬೇಕೆಂದರೆ ಆಟಿಕೆಗಳಿಗಿಂತ ಪುಸ್ತಕಗಳನ್ನು ಕೊಟ್ಟರೆ ಉತ್ತಮ. ಹೀಗೆ ಅವರು ಪುಸ್ತಕಗಳತ್ತ ಆಕರ್ಷಿತರಾಗಿ ಓದುವುದನ್ನು ರೂಢಿಸಿಕೊಳ್ಳುತ್ತಾರೆ.
ಪುಸ್ತಕ ಓದುವ ಅಭ್ಯಾಸವು ಮಕ್ಕಳ ವ್ಯಕ್ತಿತ್ವ ವಿಕಸನಕ್ಕೆ, ಕಲ್ಪನೆ ಶಕ್ತಿಯ ಬೆಳವಣಿಗೆಗೆ ಹಾಗೂ ನಾಯಕತ್ವ ಗುಣ ಬೆಳೆಸಲು ಸಹಾಯಕ. ಪೋಷಕರು ಸರಿಯಾದ ಮಾರ್ಗದರ್ಶನ ನೀಡಿದರೆ ಓದು ಮಕ್ಕಳಿಗೆ ಒಂದು ವ್ಯಸನದಂತೆ ಬದಲಾಗುತ್ತದೆ. ಹೀಗಾಗಿ ಓದಿನ ಹಾದಿಯಲ್ಲಿ ಮಕ್ಕಳನ್ನು ನಡೆಯಿಸುವುದು ಪೋಷಕರ ಕೈಯಲ್ಲಿರುವ ಅತ್ಯಂತ ಅಮೂಲ್ಯ ಜವಾಬ್ದಾರಿ.
