ಹೊಸದಿಗಂತ ಡಿಜಿಟಲ್ ಡೆಸ್ಕ್:
ರಾಮ ಮಂದಿರ ಮತ್ತು ದೇಶದ ಪ್ರಮುಖ ಹಬ್ಬಗಳನ್ನು ಟೀಕಿಸುವ ಮೂಲಕ ಹಿಂದೂ ಧರ್ಮದ ಮೇಲಿನ ತಮ್ಮ ನಿಲುವನ್ನು ಪ್ರಶ್ನಿಸಿರುವ ಆರ್ಜೆಡಿ ಮತ್ತು ಕಾಂಗ್ರೆಸ್ ನಾಯಕರು, ಇತ್ತೀಚೆಗೆ ಹ್ಯಾಲೋವೀನ್ನಂತಹ ಅಂತಾರಾಷ್ಟ್ರೀಯ ಹಬ್ಬಗಳನ್ನು ಆಚರಿಸುತ್ತಾ ‘ಬ್ಯುಸಿಯಾಗಿದ್ದಾರೆ’ ಎಂದು ಪ್ರಧಾನಿ ನರೇಂದ್ರ ಮೋದಿ ಅವರು ಆರ್ಜೆಡಿ ವರಿಷ್ಠ ಲಾಲು ಪ್ರಸಾದ್ ಯಾದವ್ ಮತ್ತು ಅವರ ಪಕ್ಷವನ್ನು ತೀವ್ರವಾಗಿ ಲೇವಡಿ ಮಾಡಿದ್ದಾರೆ.
ಚುನಾವಣಾ ಪ್ರಚಾರದ ಸಭೆಯಲ್ಲಿ ಮಾತನಾಡಿದ ಪ್ರಧಾನಿ ಮೋದಿ, ಆರ್ಜೆಡಿ ನಾಯಕರು ಮಹಾಕುಂಭ ಮತ್ತು ಛತ್ ಪೂಜೆಯಂತಹ ಹಬ್ಬಗಳನ್ನು ‘ನಾಟಕ’ ಎಂದು ಟೀಕಿಸುತ್ತಿರುವ ಹಿಂದಿನ ವಿಡಿಯೋ/ಹೇಳಿಕೆಗಳನ್ನು ಉಲ್ಲೇಖಿಸಿ ಟೀಕಿಸಿದರು.
“ಈ ಆರ್ಜೆಡಿ ಮತ್ತು ಕಾಂಗ್ರೆಸ್ ಜನರು ಜಗತ್ತಿನಾದ್ಯಂತ ಸುತ್ತುತ್ತಾರೆ. ಅದರ ಬಗ್ಗೆ ನಾವೂ ಸಾಮಾಜಿಕ ಮಾಧ್ಯಮಗಳಲ್ಲಿ ಓದುತ್ತೇವೆ. ಆದರೆ, ಇವರಿಗೆ ಅಯೋಧ್ಯೆಯ ರಾಮ ಮಂದಿರಕ್ಕೆ ಭೇಟಿ ನೀಡಲು ಸಮಯ ಸಿಗುತ್ತಿಲ್ಲ. ಅಲ್ಲಿ ನಿಷಾದ್ ರಾಜ್ಗಾಗಿ ಒಂದು ದೇವಸ್ಥಾನ ನಿರ್ಮಿಸಲಾಗಿದೆ. ಅಯೋಧ್ಯೆಯಲ್ಲಿ ಭಗವಾನ್ ವಾಲ್ಮೀಕಿ ದೇವಸ್ಥಾನವೂ ಇದೆ. ಶಬರಿ ಮಾತೆಯ ದೇವಸ್ಥಾನವೂ ಇದೆ. ಇವರಿಗೆ ರಾಮನಿಗೆ ಪೂಜೆ ಸಲ್ಲಿಸಲು ಇಷ್ಟವಿಲ್ಲದಿದ್ದರೆ, ಕನಿಷ್ಠ ನಿಷಾದ್ ರಾಜ್ನ ಪಾದಗಳಿಗೆ ತಲೆಬಾಗಲಿ. ಅದಕ್ಕೆ ಏಕೆ ನಾಚಿಕೆಪಡಬೇಕು?” ಎಂದು ಪ್ರಧಾನಿ ಮೋದಿ ತೀಕ್ಷ್ಣವಾಗಿ ಪ್ರಶ್ನಿಸಿದರು.
ಆರ್ಜೆಡಿ ನಾಯಕರ ಕುಟುಂಬದ ಸದಸ್ಯರು ಹ್ಯಾಲೋವೀನ್ ಆಚರಿಸುತ್ತಿರುವ ವಿಡಿಯೋಗಳು ವೈರಲ್ ಆದ ನಂತರ ಈ ವಿವಾದ ಭುಗಿಲೆದ್ದಿದ್ದು, ಆಡಳಿತ ಪಕ್ಷವು ವಿರೋಧ ಪಕ್ಷದ ನಾಯಕರ ‘ಸಾಂಸ್ಕೃತಿಕ ವೈರುಧ್ಯ’ದ ಬಗ್ಗೆ ಬಲವಾಗಿ ವಾಗ್ದಾಳಿ ನಡೆಸಿದೆ. ವಿರೋಧ ಪಕ್ಷದವರು ವಿದೇಶಿ ಹಬ್ಬಗಳನ್ನು ಸಡಗರದಿಂದ ಆಚರಿಸುತ್ತಾರೆ, ಆದರೆ ದೇಶದ ನಂಬಿಕೆ ಮತ್ತು ಸಂಸ್ಕೃತಿಗೆ ಗೌರವ ನೀಡುವುದಿಲ್ಲ ಎಂದು ಪ್ರಧಾನಿ ಮೋದಿ ಆರೋಪಿಸಿದರು.
