ಭಾರತದಲ್ಲಿ ಅನ್ನವನ್ನು ದಿನನಿತ್ಯದ ಆಹಾರದ ಪ್ರಮುಖ ಅಂಶವೆಂದು ಪರಿಗಣಿಸಲಾಗುತ್ತದೆ. ಆಂಧ್ರಪ್ರದೇಶದಿಂದ ಹಿಡಿದು ಕರ್ನಾಟಕ, ತಮಿಳುನಾಡು, ಪಶ್ಚಿಮ ಬಂಗಾಳ, ಅಸ್ಸಾಂ ಸೇರಿದಂತೆ ಹಲವು ರಾಜ್ಯಗಳಲ್ಲಿ ಅನ್ನವಿಲ್ಲದೆ ಊಟವೇ ಪೂರ್ಣವಾಗುವುದಿಲ್ಲ. ಆದರೆ ಅನ್ನವನ್ನು ಬೇಯಿಸುವ ವಿಧಾನದಲ್ಲಿ ಮಾತ್ರ ವೈವಿಧ್ಯತೆ ಇದೆ. ಕೆಲವರು ಪ್ರೆಶರ್ ಕುಕ್ಕರ್‌ನಲ್ಲಿ ಬೇಯಿಸುವುದನ್ನು ಆಯ್ಕೆ ಮಾಡುತ್ತಾರೆ, ಕೆಲವರು ಹಳೆಯ ಪದ್ಧತಿಯಾದ ಪಾತ್ರೆ ಬಳಸಿ ಅನ್ನವನ್ನು ಸಿದ್ಧಪಡಿಸಲು ಇಷ್ಟಪಡುತ್ತಾರೆ. ಆರೋಗ್ಯ ಮತ್ತು ರುಚಿಯ ದೃಷ್ಟಿಯಿಂದ ಯಾವುದು ಉತ್ತಮ ಎಂಬ ಪ್ರಶ್ನೆ ಎಲ್ಲರ ಮನದಲ್ಲೂ ಮೂಡುತ್ತದೆ.
ಪೋಷಕಾಂಶಗಳ ಸಂರಕ್ಷಣೆ
ಆರೋಗ್ಯ ತಜ್ಞರ ಪ್ರಕಾರ ಅನ್ನವನ್ನು ನಿಧಾನವಾಗಿ, ಪಾತ್ರೆಯಲ್ಲಿ ಬೇಯಿಸಿದರೆ ವಿಟಮಿನ್ ಬಿ, ಮೆಗ್ನೀಸಿಯಮ್ ಮುಂತಾದ ಪೋಷಕಾಂಶಗಳು ಸುರಕ್ಷಿತವಾಗಿರುತ್ತವೆ. ಪ್ರೆಶರ್ ಕುಕ್ಕರ್‌ನಲ್ಲಿ ಹೆಚ್ಚಿನ ಉಗಿ ಮತ್ತು ಒತ್ತಡದಲ್ಲಿ ಬೇಯುವುದರಿಂದ ಪೋಷಕಾಂಶಗಳ ಪ್ರಮಾಣ ಕಡಿಮೆಯಾಗುವ ಸಾಧ್ಯತೆ ಇದೆ.
ಹೆಚ್ಚುವರಿ ಪಿಷ್ಟ ನಿವಾರಣೆ
ಪಾತ್ರೆಯಲ್ಲಿ ಅನ್ನವನ್ನು ಹೆಚ್ಚು ನೀರಿನಲ್ಲಿ ಬೇಯಿಸಿ ನಂತರ ನೀರನ್ನು ಬೇರ್ಪಡಿಸಿದರೆ ಅಕ್ಕಿಯಲ್ಲಿರುವ ಹೆಚ್ಚುವರಿ ಪಿಷ್ಟ (starch) ಕಡಿಮೆಯಾಗುತ್ತದೆ. ಇದು ಜೀರ್ಣಕ್ಕೆ ಸಹಾಯಕವಾಗುವುದರ ಜೊತೆಗೆ ಗ್ಲೈಸೆಮಿಕ್ ಸೂಚ್ಯಂಕವನ್ನು ಕಡಿಮೆ ಮಾಡುತ್ತದೆ. ಸಕ್ಕರೆ ಕಾಯಿಲೆ ಇರುವವರಿಗೆ ಈ ವಿಧಾನ ಹೆಚ್ಚು ಪ್ರಯೋಜನಕಾರಿ.
ರುಚಿ ಮತ್ತು ತಿರುಳು
ಪಾತ್ರೆಯಲ್ಲಿ ಬೇಯಿಸಿದ ಅನ್ನವು ಪ್ರತ್ಯೇಕವಾಗಿ ಉದುರುದುರಾಗಿ ನಾಜೂಕಾಗಿ ಇರುತ್ತದೆ. ಬಿರಿಯಾನಿ, ಪುಲಾವ್ ಅಥವಾ ಇತರ ವಿಶೇಷ ಅಡುಗೆಗಳಿಗೆ ಇದು ಅತ್ಯುತ್ತಮ. ಆದರೆ ಪ್ರೆಶರ್ ಕುಕ್ಕರ್‌ನಲ್ಲಿ ಅನ್ನ ಜಿಗುಟಾಗಿ ತಯಾರಾಗುತ್ತದೆ. ಇಂತಹ ಅನ್ನವನ್ನು ಕೆಲವರು ಇಷ್ಟಪಡುವರು, ಆದರೆ ಸಾಮಾನ್ಯವಾಗಿ ಪಾತ್ರೆಯ ಅನ್ನ ಹೆಚ್ಚು ರುಚಿಕರ.
ಸಮಯ ಮತ್ತು ಅನುಕೂಲತೆ
ಪ್ರೆಶರ್ ಕುಕ್ಕರ್ ಬಳಕೆ ಸಮಯ ಉಳಿತಾಯಕ್ಕೆ ಸಹಾಯಕ. ಬೇಗ ಅನ್ನ ತಯಾರಾಗುತ್ತದೆ. ಆದರೆ ಪಾತ್ರೆಯಲ್ಲಿ ಅನ್ನ ಬೇಯಿಸುವುದು ಹೆಚ್ಚು ಸಮಯ ತೆಗೆದುಕೊಳ್ಳುತ್ತದೆ. ಹೀಗಾಗಿ ತುರ್ತು ಸಂದರ್ಭಗಳಲ್ಲಿ ಕುಕ್ಕರ್ ಅನುಕೂಲ, ಆದರೆ ಆರೋಗ್ಯದ ದೃಷ್ಟಿಯಿಂದ ಪಾತ್ರೆ ಮೇಲು.
ಹಳೆಯ ಪದ್ಧತಿ ಮತ್ತು ಆರೋಗ್ಯ
ಹಿಂದಿನ ಕಾಲದಲ್ಲಿ ಪಾತ್ರೆಯಲ್ಲಿ ಅನ್ನ ಬೇಯಿಸುವ ಪದ್ಧತಿಯನ್ನು ಪಾಲಿಸಲಾಗುತ್ತಿತ್ತು. ಆ ಪದ್ಧತಿ ಆರೋಗ್ಯಕರವಾಗಿದ್ದು, ಇಂದಿನ ಕಾಲದಲ್ಲೂ ತಜ್ಞರು ಅದನ್ನೇ ಶಿಫಾರಸು ಮಾಡುತ್ತಾರೆ. ನಿಧಾನವಾಗಿ ಬೇಯಿಸಿದ ಅನ್ನ ಜೀರ್ಣಕ್ಕೆ ಸುಲಭವಾಗಿದ್ದು ದೇಹಕ್ಕೆ ಹೆಚ್ಚಿನ ಶಕ್ತಿ ನೀಡುತ್ತದೆ.
ಅನ್ನವನ್ನು ಹೇಗೆ ಬೇಯಿಸಬೇಕು ಎಂಬುದು ಕೇವಲ ಸಮಯ ಅಥವಾ ಅಭ್ಯಾಸದ ವಿಷಯವಲ್ಲ. ಅದು ಆರೋಗ್ಯ, ರುಚಿ ಮತ್ತು ಪೋಷಕಾಂಶಗಳಿಗೂ ಸಂಬಂಧಿಸಿದೆ. ತಜ್ಞರ ಅಭಿಪ್ರಾಯ ಪ್ರಕಾರ ಪಾತ್ರೆಯಲ್ಲಿ ನಿಧಾನವಾಗಿ ಬೇಯಿಸಿದ ಅನ್ನವೇ ಆರೋಗ್ಯಕ್ಕೆ ಉತ್ತಮ. ಆದರೆ ಸಮಯದ ಕೊರತೆಯಲ್ಲಿ ಪ್ರೆಶರ್ ಕುಕ್ಕರ್ ಉಪಯೋಗಿಸಬಹುದು. ಹೀಗಾಗಿ ಸಾಧ್ಯವಾದಾಗಲೆಲ್ಲ ಪಾತ್ರೆಯ ಪದ್ಧತಿ ಅನುಸರಿಸುವುದರಿಂದ ದೇಹಕ್ಕೆ ಹೆಚ್ಚಿನ ಲಾಭ ಸಿಗುತ್ತದೆ.
