ಚಳಿಗಾಲ ಬಂತು ಅಂದ್ರೆ ದೇಹದ ದಿನಚರಿಯೇ ಸ್ವಲ್ಪ ಬದಲಾಗುತ್ತದೆ. ತಂಪು ಹವಾಮಾನ, ಕಡಿಮೆಯಾದ ಸೂರ್ಯನ ಬೆಳಕು ಮತ್ತು ಆಲಸ್ಯದ ಮನಸ್ಥಿತಿ ಇವೆಲ್ಲವೂ ಸೇರಿ ದೇಹದ ಹಾರ್ಮೋನುಗಳ ಮೇಲೆ ಪ್ರಭಾವ ಬೀರುತ್ತವೆ. ಈ ಬದಲಾವಣೆಗಳನ್ನು ಸಮಯಕ್ಕೆ ಸರಿಯಾಗಿ ಅರ್ಥಮಾಡಿಕೊಂಡು ನಿರ್ವಹಿಸದಿದ್ದರೆ, ತೂಕ ಹೆಚ್ಚಾಗುವುದು ಸಹಜ. ಹಲವರು ಗಮನಿಸದೇ ಹೋದರೆ, ಈ ಋತು ದೇಹಕ್ಕೆ ಹೆಚ್ಚುವರಿ ಕ್ಯಾಲೋರಿ ಸಂಗ್ರಹಿಸುವ ವಾತಾವರಣವನ್ನು ಸೃಷ್ಟಿಸುತ್ತದೆ.
ಚಳಿಗಾಲದಲ್ಲಿ ಹಸಿವು ಏಕೆ ಹೆಚ್ಚಾಗುತ್ತದೆ?:
ಈ ಸಮಯದಲ್ಲಿ ಸಿರೋಟೋನಿನ್ ಮತ್ತು ಮೆಲಟೋನಿನ್ ಹಾರ್ಮೋನುಗಳಲ್ಲಿ ಬದಲಾವಣೆ ಆಗುತ್ತದೆ. ಸೂರ್ಯನ ಬೆಳಕು ಕಡಿಮೆಯಾದಂತೆ ಮನಸ್ಥಿತಿಯಲ್ಲಿ ಬದಲಾವಣೆ ಉಂಟಾಗಿ, ಸಿಹಿ, ಕರಿದ ಹಾಗೂ ಕಾರ್ಬೋಹೈಡ್ರೇಟ್ ಆಹಾರಗಳ ಹಂಬಲ ಹೆಚ್ಚುತ್ತದೆ. ಇದರಿಂದ ಪರಾಠಾ, ಸಿಹಿತಿಂಡಿಗಳು, ಡೀಪ್ ಫ್ರೈಡ್ ಆಹಾರಗಳ ಸೇವನೆ ಹೆಚ್ಚಾಗುತ್ತದೆ.
ದೈಹಿಕ ಚಟುವಟಿಕೆ ಕಡಿಮೆಯಾಗುವುದು:
ಚಳಿ ಕಾರಣದಿಂದ ಹೊರಾಂಗಣ ಚಟುವಟಿಕೆಗಳು ಕಡಿಮೆಯಾಗುತ್ತವೆ. ಕ್ಯಾಲೋರಿ ಬರ್ನ್ ಕಡಿಮೆಯಾಗುತ್ತದೆ. ಹಬ್ಬಗಳು, ರಾತ್ರಿ ತಡವಾಗಿ ತಿನ್ನುವ ತಿಂಡಿಗಳು ಮತ್ತು ಕಡಿಮೆ ನೀರು ಕುಡಿಯುವ ಅಭ್ಯಾಸವೂ ತೂಕ ಹೆಚ್ಚಳಕ್ಕೆ ಕಾರಣವಾಗುತ್ತದೆ.
ಆಹಾರದಲ್ಲಿ ಜಾಗ್ರತೆ ಅಗತ್ಯ:
ಹೆಚ್ಚು ಕ್ಯಾಲೋರಿ ಆಹಾರಗಳನ್ನು ಸಂಪೂರ್ಣ ತ್ಯಜಿಸುವ ಅಗತ್ಯವಿಲ್ಲ, ಆದರೆ ಪ್ರಮಾಣ ಮುಖ್ಯ. ವಾರಕ್ಕೊಮ್ಮೆ ಸಣ್ಣ ಪ್ರಮಾಣದಲ್ಲಿ ಸಿಹಿತಿಂಡಿಗಳನ್ನು ಸೇವಿಸುವುದು ಉತ್ತಮ. ಜಾಗರೂಕತೆಯಿಂದ ತಿನ್ನುವುದರಿಂದ ಅನಗತ್ಯ ಕ್ಯಾಲೋರಿ ಕಡಿಮೆಯಾಗುತ್ತದೆ.
ಪ್ರೋಟೀನ್ ಮತ್ತು ನೀರಿನ ಪಾತ್ರ:
ಪ್ರೋಟೀನ್ ಭರಿತ ಆಹಾರಗಳು ಹಸಿವನ್ನು ನಿಯಂತ್ರಿಸಿ ಶಕ್ತಿಯನ್ನು ಸ್ಥಿರವಾಗಿಡುತ್ತವೆ. ಜೊತೆಗೆ ದಿನಕ್ಕೆ 6–8 ಗ್ಲಾಸ್ ನೀರು, ಗ್ರೀನ್ ಚಹಾ ಅಥವಾ ಬೆಚ್ಚಗಿನ ನೀರು ಕುಡಿಯುವುದು ಚಯಾಪಚಯ ಕ್ರಿಯೆಗೆ ಸಹಕಾರಿ.
ವ್ಯಾಯಾಮವನ್ನು ಮರೆಯದಿರಿ:
ಒಳಾಂಗಣ ನಡಿಗೆ, ಯೋಗ, ಮೆಟ್ಟಿಲು ಹತ್ತುವುದು ಅಥವಾ ದಿನಕ್ಕೆ ಕನಿಷ್ಠ 20 ನಿಮಿಷ ವ್ಯಾಯಾಮ ತೂಕ ನಿಯಂತ್ರಣದಲ್ಲಿ ಸಹಾಯ ಮಾಡುತ್ತದೆ. ಚಳಿಗಾಲದಲ್ಲೂ ಸಕ್ರಿಯವಾಗಿರುವುದೇ ಆರೋಗ್ಯದ ಗುಟ್ಟು.
