ಗಂಡ–ಹೆಂಡತಿಯ ಸಂಬಂಧ ಎಂದರೆ ಕೇವಲ ಒಟ್ಟಾಗಿ ಬದುಕುವುದು ಅಲ್ಲ, ಅದು ಪ್ರೀತಿ, ನಂಬಿಕೆ, ಸಹನೆ ಮತ್ತು ಪರಸ್ಪರ ಗೌರವದ ಸುಂದರ ಮಿಶ್ರಣ. ಆದರೆ ಕೆಲವೊಮ್ಮೆ ಸಣ್ಣಪುಟ್ಟ ಮಾತಿನ ಜಗಳಗಳು, ಮನಸ್ತಾಪಗಳು ಅಥವಾ ಕೆಲಸದ ಒತ್ತಡದಿಂದ ಈ ಸಂಬಂಧದಲ್ಲಿ ಬಿರುಕು ಮೂಡುವ ಸಾಧ್ಯತೆ ಇರುತ್ತದೆ. ಆ ಕಾರಣಕ್ಕಾಗಿ ಪ್ರತಿದಿನವೂ ಪರಸ್ಪರ ಪ್ರೀತಿಯ ಸೂಚನೆ ನೀಡುವುದು ಮತ್ತು ಒಬ್ಬರಿಗೊಬ್ಬರು ಸಮಯ ನೀಡುವುದು ಅತ್ಯಂತ ಅಗತ್ಯ. ಇಂತಹ ಸಣ್ಣ ಅಭ್ಯಾಸಗಳು ದಾಂಪತ್ಯ ಜೀವನವನ್ನು ಇನ್ನಷ್ಟು ಗಾಢಗೊಳಿಸುತ್ತವೆ ಹಾಗೂ ಕುಟುಂಬದಲ್ಲಿ ಸಂತೋಷದ ವಾತಾವರಣ ನಿರ್ಮಿಸುತ್ತವೆ.
- ಒಂದು ಸಣ್ಣ ಅಪ್ಪುಗೆ: ಎಷ್ಟು ಬ್ಯುಸಿ ಆಗಿದ್ದರೂ ಸಹ ಕೆಲಸದಿಂದ ಮನೆಗೆ ಬಂದಾಗ ಸಂಗಾತಿಗೆ ಒಂದು ಪ್ರೀತಿಯ ಅಪ್ಪುಗೆ ನೀಡಿ. ಇದು ಕೇವಲ ಪ್ರೀತಿ ತೋರಿಸುವ ಕೃತ್ಯವಲ್ಲ, “ಆಕ್ಸಿಟೋಸಿನ್” ಎಂಬ ಸಂತೋಷ ಹಾರ್ಮೋನ್‌ನ್ನು ಬಿಡುಗಡೆ ಮಾಡುವ ಪರಿಣಾಮಕಾರಿ ವಿಧಾನವೂ ಹೌದು.
- ಪರಸ್ಪರ ಮಾತನಾಡಲು ಸಮಯ ಮೀಸಲಿಡಿ: ಈ ಕಾಲದಲ್ಲಿ ಎಲ್ಲರೂ ಫೋನ್ ಮತ್ತು ಸೋಷಿಯಲ್ ಮೀಡಿಯಾದಲ್ಲಿ ತೊಡಗಿಸಿಕೊಂಡು ಸಂಗಾತಿಯೊಂದಿಗೆ ಸಮಯ ಕಳೆಯುವುದನ್ನು ಮರೆತಿದ್ದಾರೆ. ಆದರೆ ಪ್ರತಿದಿನ ರಾತ್ರಿ ಮಲಗುವ ಮೊದಲು ಕೆಲ ನಿಮಿಷಗಳಾದರೂ ಪರಸ್ಪರ ಮಾತನಾಡಿ. ದಿನದ ಅನುಭವ, ಸಮಸ್ಯೆ, ಸಂತೋಷ ಹಂಚಿಕೊಳ್ಳಿ.
- ಒಂದು ಪ್ರೀತಿಯ ಶುಭಾಶಯ: ಬೆಳಿಗ್ಗೆ ಎದ್ದ ತಕ್ಷಣ ಸಂಗಾತಿಗೆ “ಗುಡ್ ಮಾರ್ನಿಂಗ್” ಮತ್ತು ರಾತ್ರಿ ಮಲಗುವ ಮುನ್ನ “ಗುಡ್ ನೈಟ್” ಹೇಳುವುದನ್ನು ಮರಿಬೇಡಿ. ಸಣ್ಣ ಸಂಜ್ಞೆಯಾದರೂ, ಅದು ದಿನದ ಒತ್ತಡ ಮತ್ತು ಮುನಿಸುಗಳನ್ನು ಕರಗಿಸುವ ಶಕ್ತಿಯಿದೆ. ಒಂದು ಸಣ್ಣ ಮುತ್ತು ಅಥವಾ ನಗು ದಿನದ ಆರಂಭ ಮತ್ತು ಅಂತ್ಯವನ್ನು ಸುಂದರಗೊಳಿಸುತ್ತದೆ.
- ಸಹಕಾರದ ಮನೋಭಾವ ಬೆಳೆಸಿಕೊಳ್ಳಿ: ಮನೆ ಕೆಲಸಗಳು ಇಬ್ಬರದ್ದೂ ಎಂದು ಮನಗಂಡು, ಒಬ್ಬರಿಗೊಬ್ಬರು ಸಹಾಯ ಮಾಡುವುದು ಅತ್ಯಂತ ಮುಖ್ಯ. ಗಂಡ ಹೆಂಡತಿಗೆ ಕಾಫಿ ಮಾಡಿಕೊಡಬಹುದು, ಹೆಂಡತಿ ಗಂಡನ ಇಷ್ಟದ ಅಡುಗೆ ತಯಾರಿಸಬಹುದು. ಇಂತಹ ಕಾಳಜಿ ತುಂಬಿದ ಕಾರ್ಯಗಳು ಪ್ರೀತಿಯ ನಂಟನ್ನು ಮತ್ತಷ್ಟು ಬಲಪಡಿಸುತ್ತವೆ.
- ಸಣ್ಣ ವಿಷಯಕ್ಕೂ ಕೃತಜ್ಞತೆ ತೋರಿಸಿ: “ನಿನ್ನಿಂದ ತುಂಬಾ ಸಹಾಯ ಆಯ್ತು”, “ನಿನ್ನಿಲ್ಲದೆ ಸಾಧ್ಯವಿರಲಿಲ್ಲ” ಎಂಬಂತಹ ಸಣ್ಣ ಮಾತುಗಳೂ ಸಂಗಾತಿಯ ಮನಸ್ಸನ್ನು ಗೆಲ್ಲುತ್ತವೆ. ಕೃತಜ್ಞತೆಯ ಶಬ್ದಗಳು ಯಾವುದೇ ದುಃಖ ಅಥವಾ ಒತ್ತಡವನ್ನು ಕರಗಿಸಬಲ್ಲವು.
