ಹೊಸದಿಗಂತ ಡಿಜಿಟಲ್ ಡೆಸ್ಕ್:
ಬೆಂಗಳೂರಿನ ಪರಪ್ಪನ ಅಗ್ರಹಾರ ಜೈಲಿನಲ್ಲಿ ಕೈದಿಗಳು ಸ್ಮಾರ್ಟ್‌ಫೋನ್‌ಗಳನ್ನು ಬಳಸುತ್ತಿರುವ ವಿಡಿಯೋ ವೈರಲ್‌ ಆಗಿರುವುದು ದೇಶದ ಆಂತರಿಕ ಭದ್ರತೆ ಕುರಿತು ಗಂಭೀರ ಚರ್ಚೆಗೆ ಗ್ರಾಸವಾಗಿದೆ. ಅತ್ಯಾಚಾರ ಆರೋಪಿಗಳೊಂದಿಗೆ ಐಸಿಸ್ ಸಂಘಟನೆಗೆ ಸದಸ್ಯರ ಸೇರ್ಪಡೆ ಮಾಡುವ ಆರೋಪದ ಮೇಲೆ ಎನ್‌ಐಎನಿಂದ ಬಂಧಿತನಾದ ಹಮೀದ್ ಶಕೀಲ್ ಮನ್ನಾ ಸಹ ಜೈಲಿನೊಳಗೆ ಸ್ಮಾರ್ಟ್‌ಫೋನ್ ಬಳಸುತ್ತಿರುವುದು ಕಂಡುಬಂದಿದೆ. ಇದು ಕಾರಾಗೃಹದಲ್ಲಿ ಕೈದಿಗಳಿಗೆ ಸಿಗುತ್ತಿರುವ ‘ರಾಜಾತಿಥ್ಯ’ದ ಅಪಾಯಕಾರಿ ಮುಖವನ್ನು ಬಯಲು ಮಾಡಿದೆ.
ಈ ಹಿನ್ನೆಲೆಯಲ್ಲಿ ಕೇಂದ್ರ ಸಚಿವೆ ಶೋಭಾ ಕರಂದ್ಲಾಜೆ ಅವರು ಕೇಂದ್ರ ಗೃಹ ಸಚಿವ ಅಮಿತ್ ಶಾ ಅವರಿಗೆ ತಕ್ಷಣ ಮಧ್ಯಪ್ರವೇಶಿಸುವಂತೆ ಆಗ್ರಹಿಸಿ ಪತ್ರ ಬರೆದಿದ್ದಾರೆ. ದೇಶದ ಎಲ್ಲಾ ಕಾರಾಗೃಹಗಳ ಸುರಕ್ಷತೆಗಾಗಿ ರಾಷ್ಟ್ರೀಯ ಮಾನದಂಡ ಕಾರ್ಯಾಚರಣಾ ಕ್ರಮ (National SOP) ಜಾರಿಗೆ ತರಲು ಅವರು ವಿನಂತಿಸಿದ್ದಾರೆ.
ಕಾರಾಗೃಹವೇ ಉಗ್ರರ ಕಮಾಂಡ್ ಸೆಂಟರ್‌!
ಸಚಿವೆಯವರ ಪತ್ರವು ಜೈಲು ನಿರ್ವಹಣಾ ವ್ಯವಸ್ಥೆಯಲ್ಲಿನ ಗಂಭೀರ ದೌರ್ಬಲ್ಯವನ್ನು ಎತ್ತಿ ತೋರಿಸಿದೆ. ನ್ಯಾಯಾಂಗ ಬಂಧನದಲ್ಲಿರುವ ಹಮೀದ್ ಶಕೀಲ್ ಮನ್ನಾ ಜೈಲಿನೊಳಗೆ ಸ್ಮಾರ್ಟ್‌ಫೋನ್ ಬಳಸುತ್ತಿರುವುದು, ಅವನು ತನ್ನ ಉಗ್ರ ಚಟುವಟಿಕೆಗಳನ್ನು ಮುಂದುವರಿಸಲು ಸಾಧ್ಯವಾಗಿದೆ ಎಂಬುದನ್ನು ಜಗಜ್ಜಾಹೀರು ಮಾಡಿದೆ. ಈ ಘಟನೆಗೆ ಮುನ್ನ, ಎನ್‌ಐಎ ತನಿಖೆಯಲ್ಲಿ ಮತ್ತೊಬ್ಬ ಉಗ್ರ ನಜೀರ್ ಸಹ ಬೆಂಗಳೂರಿನ ಕೇಂದ್ರ ಕಾರಾಗೃಹದಲ್ಲಿಯೇ ಉಗ್ರ ಜಾಲದ ತಾತ್ವಿಕ ಮತ್ತು ಕಾರ್ಯಾತ್ಮಕ ‘ಕಮಾಂಡ್ ಸೆಂಟರ್‌’ ಆಗಿ ಕಾರ್ಯನಿರ್ವಹಿಸುತ್ತಿದ್ದ ಸಂಗತಿ ಬೆಳಕಿಗೆ ಬಂದಿತ್ತು. ನಜೀರ್ ಜೈಲಿನೊಳಗೆ ಮೊಬೈಲ್ ಕಳ್ಳಸಾಗಣೆ ಮಾಡಿಸಿಕೊಂಡು ಹೊರಗಿನ ಉಗ್ರರೊಂದಿಗೆ ಸಂಪರ್ಕ ಸಾಧಿಸುತ್ತಿದ್ದ ಎಂಬುದು ಬಹಿರಂಗಗೊಂಡಿತ್ತು.
ಈ ಸರಣಿ ಘಟನೆಗಳು, ಕಾರಾಗೃಹ ವ್ಯವಸ್ಥೆಯೊಳಗಿನ ಭ್ರಷ್ಟಾಚಾರ ಮತ್ತು ಉಗ್ರಗಾಮಿ ನುಸುಳಿಕೆಯ ಸಂಘಟಿತ ಜಾಲವನ್ನು ಸ್ಪಷ್ಟವಾಗಿ ಸೂಚಿಸುತ್ತವೆ. ಪುನರ್ವಸತಿ ಮತ್ತು ಸುಧಾರಣೆಯ ಕೇಂದ್ರಗಳಾಗಬೇಕಾದ ಜೈಲುಗಳು ಇಂದು ಉಗ್ರಗಾಮಿ ಚಿಂತನೆಗಳ ವಿಸ್ತರಣಾ ಕೇಂದ್ರಗಳಾಗಿ ಮಾರ್ಪಟ್ಟಿರುವುದು ದೇಶದ ಒಳಭದ್ರತೆಗೆ ಅಪಾಯಕಾರಿಯಾಗಿದೆ ಎಂದು ಶೋಭಾ ಕರಂದ್ಲಾಜೆ ಆತಂಕ ವ್ಯಕ್ತಪಡಿಸಿದ್ದಾರೆ.
ತುರ್ತಾಗಿ ರಾಷ್ಟ್ರೀಯ SOP ಜಾರಿಗೊಳಿಸಿ
ಈ ಗಂಭೀರ ಬೆಳವಣಿಗೆಗಳ ಹಿನ್ನೆಲೆಯಲ್ಲಿ, ಗೃಹ ವ್ಯವಹಾರಗಳ ಸಚಿವಾಲಯವು ತುರ್ತಾಗಿ ರಾಷ್ಟ್ರೀಯ SOP ಜಾರಿಗೊಳಿಸುವುದು ಅತ್ಯಗತ್ಯ ಎಂದು ಸಚಿವೆ ಶೋಭಾ ಆಗ್ರಹಿಸಿದ್ದಾರೆ. ಈ SOP ಒಳಗೊಳ್ಳಬೇಕಾದ ಪ್ರಮುಖ ಅಂಶಗಳು ಇವು:
ಉಗ್ರ ಕೈದಿಗಳ ಪ್ರತ್ಯೇಕೀಕರಣ: ಉಗ್ರ ಕೈದಿಗಳು ಮತ್ತು ಉಗ್ರರೆಂದು ಸಂಶಯ ಇರುವವರನ್ನು ಸಾಮಾನ್ಯ ಕೈದಿಗಳಿಂದ ಪ್ರತ್ಯೇಕವಾಗಿ ಇರಿಸುವ ವ್ಯವಸ್ಥೆ.
ತಾಂತ್ರಿಕ ನಿಗಾ: ಸಂವಹನ ಸಾಧನಗಳ ಕಳ್ಳಸಾಗಣೆಯನ್ನು ಪತ್ತೆಹಚ್ಚಲು ಮತ್ತು ತಡೆಗಟ್ಟಲು ತಾಂತ್ರಿಕ ನಿಗಾ ಮತ್ತು ಇ-ಆಡಿಟ್ ಕ್ರಮಗಳು.
ಸಿಬ್ಬಂದಿ ನಿಯಂತ್ರಣ: ಸಿಬ್ಬಂದಿಯ ನಿಯಮಿತ ಬದಲಾವಣೆ ಮತ್ತು ಪರಿಶೀಲನೆ, ಹಾಗೆಯೇ ತಜ್ಞರ ಮೇಲ್ವಿಚಾರಣೆ.
ಈ ಕ್ರಮಗಳು ಕಾರಾಗೃಹಗಳ ಭದ್ರತೆಯನ್ನು ಬಲಪಡಿಸಲಿವೆ. ಕರ್ನಾಟಕದಲ್ಲಿ ನಡೆದ ಇತ್ತೀಚಿನ ಘಟನೆಗಳು ತಕ್ಷಣದ ಸುಧಾರಣೆಯ ಅಗತ್ಯವನ್ನು ಸೂಚಿಸುತ್ತಿದ್ದು, ಕ್ರಮ ಕೈಗೊಳ್ಳದಿದ್ದರೆ ಜೈಲುಗಳು ಉಗ್ರಗಾಮಿ ಚಟುವಟಿಕೆಗಳಿಗೆ ಸುರಕ್ಷಿತ ಆಶ್ರಯಗಳಾಗಿ ಉಳಿಯುವ ಅಪಾಯವಿದೆ ಎಂದು ಪತ್ರದಲ್ಲಿ ಎಚ್ಚರಿಕೆ ನೀಡಲಾಗಿದೆ.
