ಮತ್ತೆ ಶುರುವಾಯ್ತು ಥೈಲ್ಯಾಂಡ್–ಕಾಂಬೋಡಿಯಾ ಉದ್ವಿಗ್ನತೆ! ಗಡಿ ಪ್ರದೇಶದಲ್ಲಿ ಗುಂಡಿನ ಸದ್ದು, ಥಾಯ್ ಸೈನಿಕ ಸಾವು

ಹೊಸದಿಗಂತ ಡಿಜಿಟಲ್ ಡೆಸ್ಕ್:

ಥೈಲ್ಯಾಂಡ್ ಮತ್ತು ಕಾಂಬೋಡಿಯಾ ನಡುವಿನ ಗಡಿ ರೇಖೆಯಲ್ಲಿ ಮತ್ತೆ ಘರ್ಷಣೆ ಭುಗಿಲೆದ್ದಿದೆ. ಸೋಮವಾರ ಗಡಿ ಸಮೀಪ ನಡೆದ ಸಶಸ್ತ್ರ ಸಂಘರ್ಷದಲ್ಲಿ ಥೈಲ್ಯಾಂಡ್ ಸೇನೆಯ ಒಬ್ಬ ಸೈನಿಕ ಪ್ರಾಣ ಕಳೆದುಕೊಂಡಿದ್ದು, ಹಲವರು ಗಾಯಗೊಂಡಿದ್ದಾರೆ. ಈ ಘಟನೆಯ ಬಳಿಕ ಗಡಿಭಾಗದಲ್ಲಿ ಭದ್ರತಾ ಸ್ಥಿತಿ ತೀವ್ರಗೊಂಡಿದ್ದು, ಎರಡೂ ದೇಶಗಳ ನಡುವಿನ ಹಳೆಯ ಗಡಿ ವಿವಾದ ಮತ್ತೊಮ್ಮೆ ಅಂತಾರಾಷ್ಟ್ರೀಯ ಗಮನ ಸೆಳೆದಿದೆ.

ಥೈಲ್ಯಾಂಡ್ ಸೇನೆಯ ಮಾಹಿತಿ ಪ್ರಕಾರ, ಉಬೊನ್ ರಚತನಿ ಪ್ರಾಂತ್ಯದ ಗಡಿ ಪ್ರದೇಶದಲ್ಲಿ ಕಾಂಬೋಡಿಯನ್ ಪಡೆಗಳು ಗುಂಡಿನ ದಾಳಿ ನಡೆಸಿದ್ದು, ಅದರ ಪರಿಣಾಮ ಥಾಯ್ ಸೈನಿಕ ಸಾವನ್ನಪ್ಪಿದ್ದಾರೆ. ಇದಕ್ಕೆ ಪ್ರತಿಕ್ರಿಯೆಯಾಗಿ ಥೈಲ್ಯಾಂಡ್ ವಾಯುಪಡೆ ಕಾಂಬೋಡಿಯನ್ ಮಿಲಿಟರಿ ಸ್ಥಾನಗಳ ಮೇಲೆ ಗುರಿ ಇಟ್ಟು ವಾಯುದಾಳಿಗೆ ಮುಂದಾಗಿದೆ. ಈ ದಾಳಿ ಸಂಪೂರ್ಣವಾಗಿ ರಕ್ಷಣಾತ್ಮಕ ಕ್ರಮವಾಗಿದ್ದು, ಮಿಲಿಟರಿ ಮೂಲಸೌಕರ್ಯಗಳನ್ನೇ ಗುರಿಯಾಗಿಸಿತ್ತು ಎಂದು ಥೈಲ್ಯಾಂಡ್ ಸ್ಪಷ್ಟಪಡಿಸಿದೆ.

ಆದರೆ ಕಾಂಬೋಡಿಯಾ ಈ ಆರೋಪಗಳನ್ನು ತಳ್ಳಿ ಹಾಕಿದ್ದು, ಥೈಲ್ಯಾಂಡ್ ಮೊದಲಿಗೆ ತನ್ನ ಭೂಭಾಗದ ಮೇಲೆ ದಾಳಿ ನಡೆಸಿದೆ ಎಂದು ಹೇಳಿದೆ. ಕದನ ವಿರಾಮ ಒಪ್ಪಂದವನ್ನು ಉಲ್ಲಂಘಿಸಿದ್ದು ಥೈಲ್ಯಾಂಡ್‌ ಎಂದು ಕಾಂಬೋಡಿಯಾದ ರಕ್ಷಣಾ ಸಚಿವಾಲಯ ಪ್ರತಿಕ್ರಿಯಿಸಿದೆ. ಪರಸ್ಪರ ಆರೋಪ-ಪ್ರತ್ಯಾರೋಪಗಳಿಂದ ಉದ್ವಿಗ್ನತೆ ಇನ್ನಷ್ಟು ಗಂಭೀರಗೊಂಡಿದೆ.