ಹೊಸದಿಗಂತ ಡಿಜಿಟಲ್ ಡೆಸ್ಕ್:
ಸಾವಿರ ವರ್ಷಗಳ ಇತಿಹಾಸವನ್ನು ಹೊತ್ತುಕೊಂಡಿರುವ ಸೋಮನಾಥ ದೇವಾಲಯದ ಅಚಲ ಪರಂಪರೆಯನ್ನು ಸ್ಮರಿಸಿ ಪ್ರಧಾನಿ ನರೇಂದ್ರ ಮೋದಿ ಭಾವನಾತ್ಮಕ ಲೇಖನ ಬರೆದಿದ್ದಾರೆ. ಮಹ್ಮದ್ ಘಜ್ನಿ ಸೋಮನಾಥದ ಮೇಲೆ ದಾಳಿ ನಡೆಸಿದ 1000ನೇ ವಾರ್ಷಿಕೋತ್ಸವದ ಸಂದರ್ಭದಲ್ಲಿ, ಶ್ರೀ ಸೋಮನಾಥ ಟ್ರಸ್ಟ್ ಅಧ್ಯಕ್ಷರಾಗಿರುವ ಮೋದಿ, ಈ ದೇವಾಲಯವನ್ನು ಕೇವಲ ಆರಾಧನಾ ಸ್ಥಳವಲ್ಲ, ಭಾರತದ ಆತ್ಮ ಮತ್ತು ನಾಗರಿಕತೆಯ ಪ್ರತೀಕ ಎಂದು ವರ್ಣಿಸಿದ್ದಾರೆ.
ಸೋಮನಾಥ ಎಂಬ ಹೆಸರು ಕೇಳಿದ ಕ್ಷಣವೇ ಹೃದಯದಲ್ಲಿ ಹೆಮ್ಮೆ ಮೂಡುತ್ತದೆ ಎಂದು ಅವರು ಬರೆಯುತ್ತಾ, ಇದು ಭಾರತದ ಅಚಲ ನಂಬಿಕೆ, ಸಂಸ್ಕೃತಿ ಮತ್ತು ಶಾಶ್ವತತೆಯ ಸಂಕೇತವಾಗಿದೆ ಎಂದು ತಿಳಿಸಿದ್ದಾರೆ. ಗುಜರಾತ್ನ ಪ್ರಭಾಸ್ ಪಠಾಣ್ನಲ್ಲಿ ಇರುವ ಸೋಮನಾಥ ದೇವಾಲಯವು 12 ಜ್ಯೋತಿರ್ಲಿಂಗಗಳಲ್ಲಿ ಮೊದಲನೆಯದು ಎಂಬುದನ್ನು ಉಲ್ಲೇಖಿಸಿದ ಪ್ರಧಾನಿ, ಧಾರ್ಮಿಕ ಶ್ಲೋಕಗಳ ಮೂಲಕ ಇದರ ಆಧ್ಯಾತ್ಮಿಕ ಮಹತ್ವವನ್ನು ವಿವರಿಸಿದ್ದಾರೆ.
1026ರಲ್ಲಿ ಮಹ್ಮದ್ ಘಜ್ನಿ ನಡೆಸಿದ ದಾಳಿಯನ್ನು ಅವರು ಕ್ರೂರತೆ ಮತ್ತು ವಿನಾಶದ ಸಂಕೇತ ಎಂದು ಬಣ್ಣಿಸಿದ್ದು, ಅದು ಕೇವಲ ದೇವಾಲಯವನ್ನಲ್ಲ, ಸಮಾಜದ ನೈತಿಕತೆಯ ಮೇಲೂ ಪ್ರಹಾರ ಮಾಡಿತ್ತು ಎಂದು ಹೇಳಿದ್ದಾರೆ. ಆದರೂ ಸೋಮನಾಥದ ಕಥೆ ವಿನಾಶದದಲ್ಲ, ಪುನರ್ನಿರ್ಮಾಣ ಮತ್ತು ಧೈರ್ಯದ ಕಥೆ ಎಂದು ಅವರು ಸ್ಪಷ್ಟಪಡಿಸಿದ್ದಾರೆ. ಪದೇ ಪದೇ ನಾಶವಾದರೂ ಪ್ರತಿ ಪೀಳಿಗೆ ದೇವಾಲಯವನ್ನು ಮರುನಿರ್ಮಿಸಿದ್ದು, ಇದು ಭಾರತೀಯರ ಅಚಲ ಇಚ್ಛಾಶಕ್ತಿಗೆ ಸಾಕ್ಷಿಯಾಗಿದೆ ಎಂದು ಹೇಳಿದ್ದಾರೆ.
ಇದನ್ನೂ ಓದಿ: Rice series 36 | ಮಂಗಳೂರು ಶೈಲಿಯ ರುಚಿಕರ ವೆಜ್ ಪಲಾವ್: ಮನೆಯಲ್ಲೇ ಸಿಂಪಲ್ ಆಗಿ ಮಾಡಿ
ಸ್ವಾತಂತ್ರ್ಯ ನಂತರ ಸರ್ದಾರ್ ವಲ್ಲಭಭಾಯಿ ಪಟೇಲ್ ಅವರ ನೇತೃತ್ವದಲ್ಲಿ ನಡೆದ ಪುನರ್ನಿರ್ಮಾಣವನ್ನು ಮೋದಿ ಸ್ಮರಿಸಿದ್ದು, 1951ರಲ್ಲಿ ದೇವಾಲಯವನ್ನು ಭಕ್ತರಿಗೆ ತೆರೆದ ಘಟನೆ ಇತಿಹಾಸಾತ್ಮಕ ತಿರುವು ಎಂದು ವಿವರಿಸಿದ್ದಾರೆ. ಭಗವದ್ಗೀತೆಯ ಶ್ಲೋಕ ಉಲ್ಲೇಖಿಸಿ, ಶಾಶ್ವತವಾದದ್ದು ಎಂದಿಗೂ ನಾಶವಾಗುವುದಿಲ್ಲ ಎಂಬ ಸಂದೇಶವನ್ನು ಪ್ರಧಾನಿ ನೀಡಿದ್ದಾರೆ.
ಇಂದು ಸೋಮನಾಥದಂತೆ ಭಾರತವೂ ಪುನರುತ್ಥಾನಗೊಂಡಿದೆ. ವಿಶ್ವ ವೇದಿಕೆಯಲ್ಲಿ ಭರವಸೆಯ ರಾಷ್ಟ್ರವಾಗಿ ಭಾರತ ಹೊರಹೊಮ್ಮುತ್ತಿದ್ದು, “ಅಭಿವೃದ್ಧಿ ಹೊಂದಿದ ಭಾರತ” ಸಂಕಲ್ಪದೊಂದಿಗೆ ಮುನ್ನಡೆಯುತ್ತಿದೆ ಎಂದು ಮೋದಿ ವಿಶ್ವಾಸ ವ್ಯಕ್ತಪಡಿಸಿದ್ದಾರೆ.
