ಹೊಸದಿಗಂತ ಬೆಂಗಳೂರು:
ಕ್ರಿಕೆಟ್ ಲೋಕದ ಮಾಜಿ ನಾಯಕ ಸೌರವ್ ಗಂಗೂಲಿ ಈಗ ಮೋಟಾರ್ ಸ್ಪೋರ್ಟ್ಸ್ ಮೈದಾನದಲ್ಲಿ ಹೊಸ ಇನಿಂಗ್ಸ್ ಆರಂಭಿಸಲು ಸಿದ್ಧರಾಗಿದ್ದಾರೆ. ಫೆಬ್ರವರಿ 14 ಮತ್ತು 15, 2026 ರಂದು ಗೋವಾದ ಮನೋಹರ್ ಅಂತಾರಾಷ್ಟ್ರೀಯ ವಿಮಾನ ನಿಲ್ದಾಣದಲ್ಲಿ ನಡೆಯಲಿರುವ ಇಂಡಿಯನ್ ರೇಸಿಂಗ್ ಫೆಸ್ಟಿವಲ್ ಎಲ್ಲರ ಗಮನ ಸೆಳೆಯುತ್ತಿದೆ.
ಕೋಲ್ಕತ್ತಾ ರಾಯಲ್ ಟೈಗರ್ಸ್ ತಂಡದ ಮಾಲೀಕರಾಗಿರುವ ಗಂಗೂಲಿ, ಈ ಕ್ರೀಡೆಯನ್ನು ಕ್ರಿಕೆಟ್ಗೆ ಹೋಲಿಸುತ್ತಾ ಕುತೂಹಲಕಾರಿ ವಿಷಯಗಳನ್ನು ಹಂಚಿಕೊಂಡಿದ್ದಾರೆ.
“ಸ್ಟ್ರೀಟ್ ರೇಸಿಂಗ್ ಎನ್ನುವುದು ಕೇವಲ ವೇಗದ ಆಟವಲ್ಲ, ಅದು ಇಡೀ ತಂಡದ ಶಿಸ್ತಿನ ಪರೀಕ್ಷೆ. ಕ್ರಿಕೆಟ್ನಲ್ಲಿ ಒತ್ತಡದ ಸಂದರ್ಭಗಳು ಹೇಗೆ ಆಟಗಾರನ ನಿಜವಾದ ಸಾಮರ್ಥ್ಯವನ್ನು ಹೊರಹಾಕುತ್ತವೆಯೋ, ರೇಸಿಂಗ್ನಲ್ಲೂ ಅಷ್ಟೇ. ಇಲ್ಲಿ ಸಣ್ಣ ತಪ್ಪಿಗೂ ಅವಕಾಶವಿಲ್ಲ,” ಎಂದು ಗಂಗೂಲಿ ಅಭಿಪ್ರಾಯಪಟ್ಟಿದ್ದಾರೆ.
ಭಾರತೀಯ ಕ್ರಿಕೆಟ್ನ ಚಿತ್ರಣವನ್ನೇ ಬದಲಿಸಿದ IPL ಮಾದರಿಯಲ್ಲೇ ಈ IRF ಬೆಳೆಯುತ್ತಿದೆ. ಇದು ಅಂತಾರಾಷ್ಟ್ರೀಯ ಚಾಲಕರು ಮತ್ತು ಭಾರತೀಯ ಪ್ರತಿಭೆಗಳಿಗೆ ಸಮಾನ ವೇದಿಕೆ ಕಲ್ಪಿಸಿದೆ ಎಂದು ಅವರು ಶ್ಲಾಘಿಸಿದ್ದಾರೆ.
ಗೋವಾದಲ್ಲಿ ಇದು ಹೊಸ ಸರ್ಕ್ಯೂಟ್ ಆದ ಕಾರಣ, ಹಳೆಯ ಅಂಕಿಅಂಶಗಳು ಇಲ್ಲಿ ಕೆಲಸ ಮಾಡುವುದಿಲ್ಲ. ಚಾಲಕ, ಕಾರು ಮತ್ತು ಇಂಜಿನಿಯರ್ಗಳ ನಡುವಿನ ಅದ್ಭುತ ಹೊಂದಾಣಿಕೆ ಮಾತ್ರ ತಂಡಕ್ಕೆ ಜಯ ತಂದುಕೊಡಬಲ್ಲದು ಎಂಬುದು ‘ದಾದಾ’ ಲೆಕ್ಕಾಚಾರ.
ಯುರೋಪಿಯನ್ ಅನುಭವ ಹೊಂದಿರುವ ಟಾಮ್ ಕ್ಯಾನಿಂಗ್ ಮತ್ತು ಭಾರತೀಯ ರೇಸಿಂಗ್ ಲೋಕದ ವೇಗದ ಚಾಲಕ ಸೋಹಿಲ್ ಶಾ ಮೇಲೆ ಗಂಗೂಲಿ ಹೆಚ್ಚಿನ ಭರವಸೆ ಇಟ್ಟಿದ್ದಾರೆ.
