ಹೊಸದಿಗಂತ ಡಿಜಿಟಲ್ ಡೆಸ್ಕ್:
ದುಬೈನ ಐಸಿಸಿ ಅಕಾಡೆಮಿ ಮೈದಾನದಲ್ಲಿ ನಡೆಯುತ್ತಿರುವ ಅಂಡರ್–19 ಏಷ್ಯಾಕಪ್ ಟೂರ್ನಿಯಲ್ಲಿ ಭಾನುವಾರ ಭಾರತ ಮತ್ತು ಪಾಕಿಸ್ತಾನ ಯುವ ತಂಡಗಳು ಮುಖಾಮುಖಿಯಾಗಿವೆ. ಕ್ರಿಕೆಟ್ ಅಭಿಮಾನಿಗಳಲ್ಲಿ ಭಾರೀ ಕುತೂಹಲ ಮೂಡಿಸಿದ್ದ ಈ ಪಂದ್ಯದಲ್ಲಿ, ಮೊದಲು ಬ್ಯಾಟಿಂಗ್ ಮಾಡಿದ ಭಾರತ ಆರಂಭದಲ್ಲೇ ಸಂಕಷ್ಟಕ್ಕೆ ಸಿಲುಕಿದೆ.
ಉದ್ಘಾಟನಾ ಪಂದ್ಯದಲ್ಲಿ ಅಬ್ಬರದ ಶತಕ ಸಿಡಿಸಿ ಗಮನ ಸೆಳೆದಿದ್ದ ಯುವ ಬ್ಯಾಟರ್ ವೈಭವ್ ಸೂರ್ಯವಂಶಿ, ಪಾಕಿಸ್ತಾನ ಎದುರು ನಿರೀಕ್ಷೆಗೂ ಮೀರಿ ಬೇಗನೆ ಪೆವಿಲಿಯನ್ ಸೇರಿದರು.
ಟಾಸ್ ಗೆದ್ದು ಮೊದಲು ಬೌಲಿಂಗ್ ಆಯ್ದುಕೊಂಡ ಪಾಕಿಸ್ತಾನ ತಂಡ ಆರಂಭದಿಂದಲೇ ಕಠಿಣ ಒತ್ತಡ ಹೇರಿತು. ಇನ್ನಿಂಗ್ಸ್ ಆರಂಭದಲ್ಲೇ ಒಂದು ಬೌಂಡರಿ ಮೂಲಕ ಭರವಸೆ ಮೂಡಿಸಿದ್ದ ವೈಭವ್, ನಾಲ್ಕನೇ ಓವರ್ನಲ್ಲಿ ಮೊಹಮ್ಮದ್ ಸಯ್ಯಮ್ ಬೌಲಿಂಗ್ಗೆ ಬಲಿಯಾದರು. ಕೇವಲ 6 ಎಸೆತಗಳಲ್ಲಿ 5 ರನ್ ಗಳಿಸಿ ಔಟ್ ಆದ ಅವರು, ದೊಡ್ಡ ಪಂದ್ಯದಲ್ಲಿ ಅಭಿಮಾನಿಗಳಿಗೆ ನಿರಾಸೆ ತಂದರು.
ವೈಭವ್ ವಿಕೆಟ್ ಪತನದ ಬಳಿಕ ನಾಯಕ ಆಯುಷ್ ಮಾತ್ರೆ ಮತ್ತು ಆರೋನ್ ಜಾರ್ಜ್ ಇನ್ನಿಂಗ್ಸ್ನ್ನು ಸ್ಥಿರಗೊಳಿಸಿದರು. ಈ ಜೋಡಿ ಎರಡನೇ ವಿಕೆಟ್ಗೆ 49 ರನ್ಗಳ ಅಮೂಲ್ಯ ಜೊತೆಯಾಟವಾಡಿ ತಂಡಕ್ಕೆ ಆಸರೆಯಾದರು. ಆಯುಷ್ 38 ರನ್ ಗಳಿಸಿ ಔಟ್ ಆದರೆ, ಆರೋನ್ ಜಾರ್ಜ್ ಹೊಣೆಗಾರಿಕೆ ಹೊತ್ತು ಬ್ಯಾಟಿಂಗ್ ನಡೆಸಿದರು. 88 ಎಸೆತಗಳಲ್ಲಿ 12 ಬೌಂಡರಿ ಮತ್ತು ಒಂದು ಸಿಕ್ಸರ್ ಸಹಿತ 85 ರನ್ ಬಾರಿಸಿದ ಅವರು, ಭಾರತವನ್ನು ಸ್ಪರ್ಧಾತ್ಮಕ ಸ್ಥಿತಿಗೆ ತಲುಪಿಸಿದರು.
33 ಓವರ್ಗಳ ಅಂತ್ಯಕ್ಕೆ ಭಾರತ 6 ವಿಕೆಟ್ ಕಳೆದುಕೊಂಡು 182 ರನ್ ಗಳಿಸಿದ್ದು, ಉಳಿದ ಬ್ಯಾಟರ್ಗಳ ಮೇಲೆ ಉತ್ತಮ ಮೊತ್ತ ಕಲೆಹಾಕುವ ಹೊಣೆ ಇದೆ. ಪಂದ್ಯ ತೀವ್ರತೆಯನ್ನು ಪಡೆದುಕೊಂಡಿದ್ದು, ಮುಂದಿನ ಓವರ್ಗಳು ನಿರ್ಣಾಯಕವಾಗಿವೆ.
