ತೂಕ ಇಳಿಸಿಕೊಳ್ಳಬೇಕು ಅಂದಾಗ ಹಲವರು ಮೊದಲು ಮಾಡುವ ನಿರ್ಧಾರ – “ರಾತ್ರಿ ಊಟವೇ ಬಿಡೋಣ!” ಅನ್ನೋದು. ಆದರೆ ನಿಜವಾಗಿಯೂ ರಾತ್ರಿ ಊಟ ಮಾಡದೆ ಇದ್ದರೆ ತೂಕ ಕಡಿಮೆಯಾಗುತ್ತಾ? ಈ ಪ್ರಶ್ನೆಗೆ ಉತ್ತರ ಇಲ್ಲಿದೆ.
ರಾತ್ರಿ ಊಟ ಬಿಡುವುದರಿಂದ ದಿನದ ಒಟ್ಟು ಕ್ಯಾಲೊರಿಗಳು ಕಡಿಮೆಯಾಗಬಹುದು. ಇದರಿಂದ ಕೆಲವರಿಗೆ ತಾತ್ಕಾಲಿಕವಾಗಿ ತೂಕ ಇಳಿದಂತೆ ಕಾಣಬಹುದು. ಆದರೆ ದೇಹದ ಕಾರ್ಯವೈಖರಿ ಕೇವಲ ಒಂದು ಹೊತ್ತಿನ ಊಟದ ಮೇಲೆ ಮಾತ್ರ ಅವಲಂಬಿತವಲ್ಲ. ನೀವು ದಿನದ ಬೇರೆ ಸಮಯದಲ್ಲಿ ಹೆಚ್ಚು ತಿನ್ನುತ್ತಿದ್ದರೆ ಅಥವಾ ಜಂಕ್ ಆಹಾರ ಸೇವಿಸುತ್ತಿದ್ದರೆ, ರಾತ್ರಿ ಊಟ ಬಿಟ್ಟರೂ ಪ್ರಯೋಜನ ಕಡಿಮೆ.
ಇನ್ನೊಂದು ಪ್ರಮುಖ ವಿಷಯ ಎಂದರೆ ಮೆಟಾಬಾಲಿಸಂ. ದೀರ್ಘ ಸಮಯ ಹೊಟ್ಟೆ ಖಾಲಿ ಇಟ್ಟರೆ ದೇಹ “ಸ್ಟಾರ್ವೇಶನ್ ಮೋಡ್”ಗೆ ಹೋಗಬಹುದು. ಇದರಿಂದ ದೇಹ ಶಕ್ತಿಯನ್ನು ಉಳಿಸಿಕೊಳ್ಳಲು ಕೊಬ್ಬನ್ನು ಸುಲಭವಾಗಿ ಕರಗಿಸದೇ ಇರಬಹುದು. ಹೀಗಾಗಿ ದೀರ್ಘಾವಧಿಯಲ್ಲಿ ತೂಕ ಇಳಿಕೆ ಮಂದಗಿಸಬಹುದು.
ಇದನ್ನೂ ಓದಿ:
ಆರೋಗ್ಯ ತಜ್ಞರ ಅಭಿಪ್ರಾಯವೇನಂದರೆ, ರಾತ್ರಿ ಊಟ ಸಂಪೂರ್ಣ ಬಿಟ್ಟುಬಿಡುವುದಕ್ಕಿಂತ ಲೈಟ್ ಹಾಗೂ ಸಮತೋಲನ ಆಹಾರ ತೆಗೆದುಕೊಳ್ಳುವುದು ಉತ್ತಮ. ತರಕಾರಿ, ಸೂಪ್, ಸ್ಯಾಲಡ್, ಕಡಿಮೆ ಕಾರ್ಬೋಹೈಡ್ರೇಟ್ ಇರುವ ಆಹಾರ ಆಯ್ಕೆ ಮಾಡಬಹುದು. ಮಲಗುವ ಮುನ್ನ ಕನಿಷ್ಠ ಎರಡು ಗಂಟೆ ಅಂತರ ಇರಲಿ.
ತೂಕ ಇಳಿಕೆಗೆ ಮುಖ್ಯವಾದುದು ನಿಯಮಿತ ವ್ಯಾಯಾಮ, ಸಮತೋಲನ ಆಹಾರ ಮತ್ತು ನಿರಂತರತೆ. ಊಟ ಬಿಡುವುದಕ್ಕಿಂತ ಸರಿಯಾದ ಆಯ್ಕೆ ಮಾಡುವುದು ದೇಹಕ್ಕೂ, ಮನಸ್ಸಿಗೂ ಉತ್ತಮ.
