ಮಧ್ಯಾಹ್ನ ಊಟ ಮಾಡಿದ ತಕ್ಷಣ ಕಣ್ಣು ಸ್ವತಃ ಮುಚ್ಚಿಕೊಳ್ಳುವಂತೆ ಆಗುತ್ತೆ ಅಲ್ವಾ? ಒಬ್ಬರಿಬ್ಬರು ಅಲ್ಲ, ಬಹುತೇಕರಿಗೇ ಇದೇ ಸಮಸ್ಯೆ ಅಂತಾನೂ ನಮಗೆ ಗೊತ್ತು. ಕೆಲಸ ಮಾಡಬೇಕು ಅಂದುಕೊಂಡರೂ ಕುರ್ಚಿಯಲ್ಲೇ ತಲೆ ಬಾಗುವಂತಹ ಅನುಭವವಾಗುತ್ತದೆ. ಇದಕ್ಕೆ ಸೋಮಾರಿತನವೇ ಕಾರಣ ಅಂತ ನಾವು ಭಾವಿಸುತ್ತೇವೆ. ಆದರೆ ನಿಜಕ್ಕೂ ಇದರ ಹಿಂದೆ ದೇಹದಲ್ಲೇ ನಡೆಯುವ ವೈಜ್ಞಾನಿಕ ಬದಲಾವಣೆಗಳು ಕಾರಣವಾಗಿವೆ.
ಮೊದಲನೆಯದಾಗಿ, ಊಟ ಮಾಡಿದ ನಂತರ ಜೀರ್ಣಕ್ರಿಯೆ ಶುರುವಾಗುತ್ತದೆ. ಜೀರ್ಣಕ್ರಿಯೆಗೆ ದೇಹಕ್ಕೆ ಹೆಚ್ಚು ಶಕ್ತಿ ಬೇಕಾಗುತ್ತದೆ. ಹೀಗಾಗಿ ಮೆದುಳು ಮತ್ತು ಸ್ನಾಯುಗಳ ಕಡೆಗೆ ಹೋಗುವ ರಕ್ತಪ್ರವಾಹ ಸ್ವಲ್ಪ ಕಡಿಮೆಯಾಗಿ ಹೊಟ್ಟೆಯ ಕಡೆಗೆ ಹೆಚ್ಚಾಗುತ್ತದೆ. ಇದರಿಂದ ಸಹಜವಾಗಿ ದಣಿವು ಹಾಗೂ ನಿದ್ದೆಯ ಅನುಭವ ಬರುತ್ತದೆ.
ಇನ್ನೊಂದು ಪ್ರಮುಖ ಕಾರಣ ಎಂದರೆ ಕಾರ್ಬೋಹೈಡ್ರೇಟ್ಗಳು. ಅನ್ನ, ಚಪಾತಿ, ಬಿಸಿಬೇಳೆಬಾತ್ ಮುಂತಾದ ಆಹಾರಗಳಲ್ಲಿ ಕಾರ್ಬೋಹೈಡ್ರೇಟ್ ಹೆಚ್ಚು ಇರುತ್ತದೆ. ಇವು ದೇಹದಲ್ಲಿ ಸೆರಟೋನಿನ್ ಮತ್ತು ಮೆಲಟೊನಿನ್ ಎಂಬ ಹಾರ್ಮೋನ್ಗಳ ಉತ್ಪಾದನೆಯನ್ನು ಹೆಚ್ಚಿಸುತ್ತವೆ. ಈ ಇಬ್ಬರೂ ನಿದ್ದೆ ತರಿಸುವ ಹಾರ್ಮೋನ್ಗಳು.
ಮಧ್ಯಾಹ್ನ ಸಾಮಾನ್ಯವಾಗಿ ನಮ್ಮ ದೇಹದ ಜೈವಿಕ ಗಡಿಯಾರವು ಸ್ವಲ್ಪ “ಸ್ಲೋ ಮೋಡ್”ಗೆ ಹೋಗುತ್ತದೆ. ಇದನ್ನು “ಪೋಸ್ಟ್ ಲಂಚ್ ಡಿಪ್” ಎನ್ನಲಾಗುತ್ತದೆ. ಇದು ದೇಹದ ಸಹಜವಾದ ಸ್ಥಿತಿಯೇ ಹೊರತು ಯಾವುದೇ ರೋಗವಲ್ಲ.
ಭಾರೀ ಊಟ, ಹೆಚ್ಚು ಎಣ್ಣೆ-ಮಸಾಲೆ, ಸಿಹಿ ಪದಾರ್ಥಗಳು ಕೂಡ ನಿದ್ದೆಯನ್ನು ಇನ್ನಷ್ಟು ಹೆಚ್ಚಿಸಬಹುದು. ಆದ್ದರಿಂದ ಮಧ್ಯಾಹ್ನ ಹಗುರವಾದ, ಸಮತೋಲಿತ ಆಹಾರ ಸೇವಿಸುವುದು, ಊಟದ ನಂತರ ತಕ್ಷಣ ಮಲಗದೆ 10–15 ನಿಮಿಷ ತಿರುಗಾಡುವುದು, ಸಾಕಷ್ಟು ನೀರು ಕುಡಿಯುವುದು ನಿದ್ದೆಯನ್ನು ನಿಯಂತ್ರಿಸಲು ಸಹಾಯ ಮಾಡುತ್ತದೆ.
