ಹುಟ್ಟಿದ ಕೆಲವೇ ತಿಂಗಳಲ್ಲಿ ಮಗುವಿನ ಕಿವಿಯಲ್ಲಿ ಚಿಕ್ಕ ಚಿನ್ನದ ಓಲೆ ಕಾಣಿಸಿಕೊಂಡರೆ ಅದೊಂದು ಸಂಭ್ರಮದ ಕ್ಷಣ. ಕೆಲವರಿಗೆ ಇದು ಅಲಂಕಾರವಾಗಿ ಕಾಣಿಸಿದರೆ, ಇನ್ನೂ ಕೆಲವರಿಗೆ ಇದು ಸಂಪ್ರದಾಯ. ಆದರೆ ಸಣ್ಣ ವಯಸ್ಸಿನಲ್ಲೇ ಮಕ್ಕಳಿಗೆ ಕಿವಿ ಚುಚ್ಚಿಸುವ ಹಿಂದಿನ ಕಾರಣ ಕೇವಲ ಫ್ಯಾಷನ್ ಅಲ್ಲ. ಅದರ ಹಿಂದೆ ಆರೋಗ್ಯ, ಮನೋವಿಜ್ಞಾನ ಮತ್ತು ಪುರಾತನ ನಂಬಿಕೆಗಳ ಮಿಶ್ರಣವಿದೆ.
ನೋವು ಕಡಿಮೆ ಅನುಭವವಾಗುತ್ತೆ: ಬಾಲ್ಯದಲ್ಲಿ ನರಗಳು ಸಂಪೂರ್ಣವಾಗಿ ಅಭಿವೃದ್ಧಿಯಾಗಿರುವುದಿಲ್ಲ. ಹೀಗಾಗಿ ಕಿವಿ ಚುಚ್ಚಿಸುವ ಸಮಯದಲ್ಲಿ ನೋವು ಕಡಿಮೆ ಅನುಭವವಾಗುತ್ತದೆ ಎಂಬ ನಂಬಿಕೆ ಇದೆ. ದೊಡ್ಡವರಿಗಿಂತ ಮಕ್ಕಳು ಬೇಗನೆ ನೋವಿನಿಂದ ಚೇತರಿಸಿಕೊಳ್ಳುತ್ತಾರೆ.
ಆರೋಗ್ಯದ ಲಾಭ ಎಂಬ ನಂಬಿಕೆ: ಆಯುರ್ವೇದದ ಪ್ರಕಾರ, ಇಯರ್ ಲೋಬ್ ನಲ್ಲಿ ಕೆಲವು ನರಬಿಂದುಗಳು ಇರುತ್ತವೆ. ಬಾಲ್ಯದಲ್ಲೇ ಅವುಗಳನ್ನು ಚುಚ್ಚುವುದರಿಂದ ಮೆದುಳಿನ ಬೆಳವಣಿಗೆ, ದೃಷ್ಟಿ ಹಾಗೂ ಶ್ರವಣ ಶಕ್ತಿಗೆ ಸಹಾಯಕವಾಗುತ್ತದೆ ಎಂಬ ನಂಬಿಕೆ ಇದೆ.
ರೋಗನಿರೋಧಕ ಶಕ್ತಿ ಉತ್ತಮ: ಸಣ್ಣ ವಯಸ್ಸಿನಲ್ಲಿ ಚರ್ಮ ಬೇಗ ಗುಣಮುಖವಾಗುತ್ತದೆ. ಸೋಂಕು ಉಂಟಾಗುವ ಸಾಧ್ಯತೆ ಕಡಿಮೆ ಎನ್ನಲಾಗುತ್ತದೆ. ಹೀಗಾಗಿ ಕಿವಿ ಚುಚ್ಚಿಸಿದ ಗಾಯ ಶೀಘ್ರದಲ್ಲಿ ಗುಣವಾಗುತ್ತದೆ.
ಇದನ್ನೂ ಓದಿ: ಪೊಲೀಸ್ ಠಾಣೆಯಲ್ಲಿ ಬಹಿರಂಗವಾಯ್ತು ಪ್ರೇಮಿಯ ಹಳೆ ಪುರಾಣ: ತಾಳಿ ಕಿತ್ತೆಸೆದು ಮನೆಗೆ ಹೋದ ಯುವತಿ
ಸಾಂಸ್ಕೃತಿಕ ಹಾಗೂ ಧಾರ್ಮಿಕ ಮಹತ್ವ: ಭಾರತೀಯ ಸಂಪ್ರದಾಯದಲ್ಲಿ ಕಿವಿ ಚುಚ್ಚಿಸುವುದು ಒಂದು ಸಂಸ್ಕಾರ. ಇದನ್ನು “ಕರ್ಣವೇದ ಸಂಸ್ಕಾರ” ಎಂದು ಕರೆಯಲಾಗುತ್ತದೆ. ಇದು ಮಕ್ಕಳ ಬೆಳವಣಿಗೆಯ ಒಂದು ಹಂತವೆಂದು ಪರಿಗಣಿಸಲಾಗಿದೆ.
ಭವಿಷ್ಯದಲ್ಲಿ ಭಯ ತಪ್ಪಿಸಲು: ದೊಡ್ಡವರಾದ ಮೇಲೆ ಕಿವಿ ಚುಚ್ಚಿಸಿಕೊಳ್ಳಲು ಭಯ, ಸಂಶಯ ಹೆಚ್ಚು. ಬಾಲ್ಯದಲ್ಲೇ ಇದನ್ನು ಮಾಡಿದರೆ ಆ ಭಯವೇ ಇರದು.
ಒಟ್ಟಾರೆಯಾಗಿ, ಸಣ್ಣ ವಯಸ್ಸಿನಲ್ಲಿ ಕಿವಿ ಚುಚ್ಚಿಸುವುದು ಕೇವಲ ಅಲಂಕಾರವಲ್ಲ. ಆರೋಗ್ಯ, ಸಂಸ್ಕೃತಿ ಮತ್ತು ಅನುಭವದ ಸರಳತೆಯೊಂದಿಗೆ ಜೋಡಿಸಿಕೊಂಡಿರುವ ಪುರಾತನ ಪದ್ಧತಿ ಎಂದರೂ ತಪ್ಪಾಗಲಾರದು.
