ಮನುಷ್ಯನ ಬದುಕಿನ ಪ್ರತಿಯೊಂದು ಹಂತಕ್ಕೂ ಮಣ್ಣು ಅಡಿಪಾಯ. ಆಹಾರ ಬೆಳೆಯುವ ಹೊಲದಿಂದ ನಮ್ಮ ಮನೆ ನಿಂತಿರುವ ನೆಲವರೆಗೂ ಮಣ್ಣು ನೀಡುವ ಕೊಡುಗೆಯನ್ನು ಹಲವರು ಗಮನಿಸುವುದೇ ಇಲ್ಲ. ಪ್ರಕೃತಿಯ ಈ ಮೌನ ಸಹಾಯಕ್ಕೆ ಜಾಗತಿಕ ಮಟ್ಟದಲ್ಲಿ ಗೌರವ ಸಲ್ಲಿಸುವ ದಿನವೇ ವಿಶ್ವ ಮಣ್ಣು ದಿನ (World Soil Day). ಮಣ್ಣಿನ ಆರೋಗ್ಯ ಕುಸಿಯುತ್ತಿರುವ ಕಾಲದಲ್ಲಿ ಜಾಗೃತಿ ಮೂಡಿಸುವ ಈ ದಿನದ ಹಿನ್ನೆಲೆ ಅತ್ಯಂತ ಮಹತ್ವದ್ದಾಗಿದೆ.
ವಿಶ್ವ ಮಣ್ಣು ದಿನದ ಇತಿಹಾಸ:
ವಿಶ್ವ ಮಣ್ಣು ದಿನದ ಸಂಕಲ್ಪವನ್ನು ಮೊದಲಿಗೆ ಥಾಯ್ಲೆಂಡ್ ದೇಶ ಮುಂದಿಟ್ಟಿತು. ಬಳಿಕ, United Nations FAO ಈ ಆಲೋಚನೆಯನ್ನು ಜಾಗತಿಕ ವೇದಿಕೆಗೆ ತೆಗೆದುಕೊಂಡು, 2013ರಲ್ಲಿ ವಿಶ್ವ ಮಣ್ಣು ದಿನವನ್ನು ಅಧಿಕೃತವಾಗಿ ಅಂಗೀಕರಿಸಲಾಯಿತು. ಡಿಸೆಂಬರ್ 5 ಅನ್ನು ಈ ದಿನಕ್ಕಾಗಿ ಆಯ್ಕೆ ಮಾಡಿದ್ದು, ಮಣ್ಣಿನ ಸಂರಕ್ಷಣೆಗೆ ಮಹತ್ವದ ಕೊಡುಗೆ ನೀಡಿದ ಥಾಯ್ಲೆಂಡ್ನ ರಾಜ ಭೂಮಿಬೋಲ್ ಅಧುಲ್ಯಾದೇಜ್ ಅವರ ಜನ್ಮದಿನದ ಗೌರವಕ್ಕಾಗಿ.
ವಿಶ್ವ ಮಣ್ಣು ದಿನದ ಮಹತ್ವ:
- ಮಣ್ಣಿನ ನಾಶ, ಕುಗ್ಗುತ್ತಿರುವ ಫಲವತ್ತತೆ ಮತ್ತು ಅತಿಯಾದ ರಾಸಾಯನಿಕ ಬಳಕೆಯ ಬಗ್ಗೆ ಜಾಗೃತಿ ಮೂಡಿಸುವುದು.
- ರೈತರಿಗೆ, ವಿದ್ಯಾರ್ಥಿಗಳಿಗೆ ಮತ್ತು ಸಮಾಜಕ್ಕೆ ಮಣ್ಣಿನ ಆರೋಗ್ಯದ ಪ್ರಾಮುಖ್ಯತೆಯನ್ನು ತಿಳಿಸುವುದು.
- ಸಮತೋಲನವಾದ ಕೃಷಿ ಪದ್ಧತಿಗಳನ್ನು ಉತ್ತೇಜಿಸಿ ಪರಿಸರ ಸ್ನೇಹಿ ಬೆಳವಣಿಗೆಗೆ ದಾರಿ ಮಾಡಿಕೊಡುವುದು.
- ಮಣ್ಣು–ನೀರು ಸಂರಕ್ಷಣೆಯ ಮೂಲಕ ಆಹಾರ ಭದ್ರತೆ ಹಾಗೂ ಹವಾಮಾನ ಸಮತೋಲನ ಸಾಧಿಸುವುದು.
- ಮುಂದಿನ ಪೀಳಿಗೆಗಾಗಿ ನೈಸರ್ಗಿಕ ಸಂಪನ್ಮೂಲಗಳನ್ನು ರಕ್ಷಿಸುವ ಜವಾಬ್ದಾರಿಯನ್ನು ನೆನಪಿಸುವುದು.
ವಿಶ್ವ ಮಣ್ಣು ದಿನದ ಉದ್ಧೇಶ ಒಂದೇ “ಮಣ್ಣು ಆರೋಗ್ಯವಾಗಿದ್ದರೆ, ಭೂಮಿ ಆರೋಗ್ಯವಾಗಿರುತ್ತದೆ.” ಪರಿಸರದ ಈ ಅಮೂಲ್ಯ ಸಂಪತ್ತನ್ನು ಉಳಿಸುವುದು ನಮ್ಮ ಎಲ್ಲರ ಕರ್ತವ್ಯ.
