ಇಂದಿನ ಜೀವನಶೈಲಿಯಲ್ಲಿ ಕಚೇರಿ ಕೆಲಸಗಳು, ಕ್ಷೇತ್ರ ಕಾರ್ಯಗಳು ಅಥವಾ ಮನೆಮಾತಿನ ಜವಾಬ್ದಾರಿಗಳು ಪ್ರತಿಯೊಬ್ಬರ ಮೇಲೂ ಒತ್ತಡ ಹಾಗೂ ಖಿನ್ನತೆಯನ್ನುಂಟುಮಾಡುತ್ತವೆ. ನಿರಂತರ ಒತ್ತಡದಿಂದ ದೇಹ-ಮನಸ್ಸು ಸುಸ್ತಾಗುವುದು ಸಹಜ. ಆದರೆ, ಇಂತಹ ಸಂದರ್ಭದಲ್ಲಿ ಯೋಗಾಸನಗಳು ಸಹಜವಾದ ಮತ್ತು ಪರಿಣಾಮಕಾರಿ ಪರಿಹಾರವಾಗುತ್ತವೆ. ಆರೋಗ್ಯ ತಜ್ಞರ ಪ್ರಕಾರ ದಿನಕ್ಕೆ ಕೇವಲ 10 ನಿಮಿಷಗಳ ಯೋಗ ಅಭ್ಯಾಸವು ಖಿನ್ನತೆ, ಒತ್ತಡ ನಿವಾರಣೆಗೆ ಮತ್ತು ಮನಸ್ಸಿಗೆ ಶಾಂತಿ ತರಲು ಸಹಾಯಕ.
ಶವಾಸನ (Shavasana):
ಈ ಆಸನವನ್ನು ‘ವಿಶ್ರಾಂತಿಯ ಆಸನ’ ಎಂದೇ ಕರೆಯಲಾಗುತ್ತದೆ. ಬೆನ್ನಿನ ಮೇಲೆ ಮಲಗಿ ಕೈ-ಕಾಲುಗಳನ್ನು ಸಡಿಲವಾಗಿ ಬಿಡಿ. ಆಳವಾದ ಉಸಿರಾಟ ಮಾಡಿ 4–5 ನಿಮಿಷ ಶಾಂತವಾಗಿರಿ. ಇದು ನರಮಂಡಲವನ್ನು ಶಾಂತಗೊಳಿಸಿ ರಕ್ತದೊತ್ತಡ ನಿಯಂತ್ರಣಕ್ಕೆ ಸಹಾಯಮಾಡುತ್ತದೆ.
ಬಾಲಾಸನ (Balasana):
ವಜ್ರಾಸನದಲ್ಲಿ ಕುಳಿತು ಮುಂದೆ ಬಾಗುವ ಈ ಆಸನವು ದೇಹಕ್ಕೆ ವಿಶ್ರಾಂತಿ ನೀಡುತ್ತದೆ. ಉಸಿರಾಟದ ಲಯದೊಂದಿಗೆ ಮಾಡುವುದರಿಂದ ದೇಹದ ನೋವು, ಒತ್ತಡ ಕಡಿಮೆಯಾಗುತ್ತದೆ. ಇದರಿಂದ ಬೆನ್ನು ಮತ್ತು ಕುತ್ತಿಗೆಯ ಸ್ನಾಯುಗಳು ಸಡಿಲಗೊಳ್ಳುತ್ತವೆ.
ಭ್ರಮರಿ ಪ್ರಾಣಾಯಾಮ (Bhramari Pranayama):
ಶಾಂತ ಸ್ಥಳದಲ್ಲಿ ಕುಳಿತು ಜೇನುನೊಣದಂತೆ ಗುನುಗು ಶಬ್ದ ಮಾಡುವ ಉಸಿರಾಟ ಕ್ರಮವೇ ಭ್ರಮರಿ. ಇದು ಮನಸ್ಸಿಗೆ ಶಾಂತಿ ನೀಡಿ ಒತ್ತಡ ಕಡಿಮೆ ಮಾಡುತ್ತದೆ. ಏಕಾಗ್ರತೆಯನ್ನು ಹೆಚ್ಚಿಸಿ ಆತಂಕವನ್ನು ತಗ್ಗಿಸುತ್ತದೆ.
ಬೆಕ್ಕು-ಹಸು ಭಂಗಿ (Marjariasana-Bitilasana):
ಮಂಡಿಯೂರಿ ಬೆನ್ನು ಬಾಗಿಸುವ ಈ ಆಸನವು ಬೆನ್ನುಮೂಳೆಗೆ ಚಲನವಲನ ನೀಡುತ್ತದೆ. ಹೊಟ್ಟೆ, ಕುತ್ತಿಗೆ ಹಾಗೂ ಬೆನ್ನು ಸ್ನಾಯುಗಳನ್ನು ಬಲಪಡಿಸಿ ಒತ್ತಡ ನಿವಾರಣೆ ಮಾಡುತ್ತದೆ.
ಸೇತುಬಂಧಾಸನ (Setu Bandhasana):
ಬೆನ್ನಿನ ಮೇಲೆ ಮಲಗಿ ಮೊಣಕಾಲುಗಳನ್ನು ಬಗ್ಗಿಸಿ ಸೊಂಟವನ್ನು ಮೇಲಕ್ಕೆತ್ತುವ ಈ ಆಸನವು ಆತಂಕ, ನಿದ್ರಾಹೀನತೆ, ಬೆನ್ನುನೋವು ನಿವಾರಿಸಲು ಉತ್ತಮ. ಇದರಿಂದ ದೇಹದಲ್ಲಿ ಶಕ್ತಿ ಹೆಚ್ಚುತ್ತದೆ.
ಖಿನ್ನತೆ ಮತ್ತು ಒತ್ತಡವನ್ನು ನಿಭಾಯಿಸಲು ಔಷಧಿ ಅಥವಾ ಕೃತಕ ಪರಿಹಾರಗಳ ಬದಲು ಯೋಗಾಸನಗಳು ಅತ್ಯಂತ ಸುರಕ್ಷಿತ ಮತ್ತು ನೈಸರ್ಗಿಕ ಮಾರ್ಗ. ದಿನನಿತ್ಯ ಕೇವಲ ಕೆಲ ನಿಮಿಷಗಳ ಅಭ್ಯಾಸವು ದೇಹಕ್ಕೆ ಆರೋಗ್ಯ, ಮನಸ್ಸಿಗೆ ಶಾಂತಿ ನೀಡುತ್ತದೆ. ಹೀಗಾಗಿ ಪ್ರತಿದಿನ ಯೋಗಾಸನಗಳನ್ನು ರೂಢಿಸಿಕೊಳ್ಳುವುದು ಸಮತೋಲನಯುತ ಜೀವನಕ್ಕೆ ಬಹಳ ಅಗತ್ಯ.
