ಹೊಸದಿಗಂತ ಡಿಜಿಟಲ್ ಡೆಸ್ಕ್:
ಬಾಲಿವುಡ್‌ನ ಖ್ಯಾತ ನಿರ್ದೇಶಕ ನಿತೇಶ್ ತಿವಾರಿ ಅವರ ನಿರ್ದೇಶನದಲ್ಲಿ ಮೂಡಿಬರುತ್ತಿರುವ ಬಹುನಿರೀಕ್ಷಿತ ‘ರಾಮಾಯಣ’ ಚಲನಚಿತ್ರದ ಟ್ರೈಲರ್ ಬಿಡುಗಡೆ ಸಮಾರಂಭವು ಗಾರ್ಡನ್ ಸಿಟಿ ಬೆಂಗಳೂರಿನಲ್ಲಿ ಅತ್ಯಂತ ಅದ್ದೂರಿಯಾಗಿ ನೆರವೇರಿತು. ಈ ಐತಿಹಾಸಿಕ ಕ್ಷಣಕ್ಕೆ ಸಾಕ್ಷಿಯಾದ ಭಾರತದ ಹೆಮ್ಮೆಯ ಸ್ವರಮಾಂತ್ರಿಕ, ಆಸ್ಕರ್ ವಿಜೇತ ಸಂಗೀತ ನಿರ್ದೇಶಕ ಎ.ಆರ್. ರೆಹಮಾನ್ ಅವರು ಚಿತ್ರದ ಸಂಗೀತ ಪಯಣದ ರೋಚಕ ವಿವರಗಳನ್ನು ಅಭಿಮಾನಿಗಳೊಂದಿಗೆ ಹಂಚಿಕೊಂಡರು.
ರಾಮಾಯಣದಂತಹ ಪವಿತ್ರ ಹಾಗೂ ಬೃಹತ್ ಕಾವ್ಯಕ್ಕೆ ಸಂಗೀತ ಸಂಯೋಜಿಸುವುದು ಸಾಮಾನ್ಯ ಮಾತಲ್ಲ. ಈ ಬಗ್ಗೆ ಮಾತನಾಡಿದ ಎ.ಆರ್. ರೆಹಮಾನ್, “ಈ ಚಿತ್ರದ ಪ್ರತಿಯೊಂದು ಧ್ವನಿ ತುಣುಕು ಹಾಗೂ ಹಿನ್ನೆಲೆ ಸಂಗೀತಕ್ಕಾಗಿ ನಮ್ಮ ಇಡೀ ತಂಡ ಹಗಲಿರುಳು ಶ್ರಮಿಸಿದೆ. ಹಲವು ದಿನಗಳಲ್ಲಿ ನಾವು ಸತತವಾಗಿ 18 ರಿಂದ 23 ಗಂಟೆಗಳ ಕಾಲ ವಿಶ್ರಾಂತಿಯಿಲ್ಲದೆ ಕೆಲಸ ಮಾಡಿದ್ದೇವೆ. ಈ ಮಹಾಕಾವ್ಯದ ಭಾವನೆಗಳಿಗೆ ಜೀವ ತುಂಬಲು ನಮಗೆ ಸವಾಲಾಗಿತ್ತು” ಎಂದು ವಿವರಿಸಿದರು.
ಚಿತ್ರದ ಪ್ರತಿಯೊಂದು ಹಾಡು ಹಾಗೂ ಸಂಗೀತ ತುಣುಕನ್ನು ಅತ್ಯಂತ ಅಚ್ಚುಕಟ್ಟಾಗಿ ಮೂಡಿಸಲು ರೆಹಮಾನ್ ತಂಡವು ಕನಿಷ್ಠ 32 ರಿಂದ 34 ವಿಭಿನ್ನ ಆವೃತ್ತಿಗಳನ್ನು ಸಿದ್ಧಪಡಿಸಿತ್ತು. ಅವುಗಳಲ್ಲಿ ಅತ್ಯಂತ ಸೂಕ್ತವಾದ ಹಾಗೂ ಮನಸ್ಸಿಗೆ ಮುಟ್ಟುವ ಆವೃತ್ತಿಯನ್ನು ಮಾತ್ರ ಅಂತಿಮವಾಗಿ ಆಯ್ಕೆ ಮಾಡಲಾಗಿದೆ.
ಈ ಚಿತ್ರದ ಸಂಗೀತ ಕೆಲಸಗಳು ಕೇವಲ ಭಾರತಕ್ಕೆಷ್ಟೇ ಸೀಮಿತವಾಗಿರದೆ ಜಾಗತಿಕ ಮಟ್ಟದಲ್ಲಿ ನಡೆದಿವೆ. ಲಾಸ್ ಏಂಜಲೀಸ್, ಲಂಡನ್, ಮುಂಬೈ ಹಾಗೂ ಚೆನ್ನೈ ನಗರಗಳ ಅತ್ಯಾಧುನಿಕ ಸ್ಟುಡಿಯೋಗಳಲ್ಲಿ ಧ್ವನಿಮುದ್ರಣ ಮತ್ತು ಸಂಸ್ಕರಣೆ ಕಾರ್ಯಗಳನ್ನು ಮಾಡಲಾಗಿದೆ.
ಈ ಚಿತ್ರದ ಮತ್ತೊಂದು ಪ್ರಮುಖ ಆಕರ್ಷಣೆ ಎಂದರೆ ಹಾಲಿವುಡ್ ಸಂಗೀತ ಸಂಯೋಜಕ ಹ್ಯಾನ್ಸ್ ಝಿಮ್ಮರ್ ಅವರ ಸಹಯೋಗ. ಹ್ಯಾನ್ಸ್ ಝಿಮ್ಮರ್ ಅವರೊಂದಿಗೆ ಕೂಡಿ ರಾಮಾಯಣಕ್ಕೆ ಸಂಗೀತ ನಿರ್ಮಿಸುತ್ತಿರುವುದು ತಮ್ಮ ವೃತ್ತಿಜೀವನದ ಹೆಮ್ಮೆಯ ಕ್ಷಣಗಳಲ್ಲಿ ಒಂದಾಗಿದೆ ಎಂದು ರೆಹಮಾನ್ ಹರುಷ ವ್ಯಕ್ತಪಡಿಸಿದರು. ಭಾರತೀಯ ಪರಂಪರೆ ಹಾಗೂ ಜಾಗತಿಕ ಮಟ್ಟದ ತಂತ್ರಜ್ಞಾನ ಮೇಳೈಸಿರುವ ಈ ಪ್ರಾಜೆಕ್ಟ್‌ನಲ್ಲಿ ಭಾಗಿಯಾಗಿರುವುದು ತಮಗೆ ಅತೀವ ತೃಪ್ತಿ ಹಾಗೂ ಸಂತಸ ತಂದಿದೆ ಎಂದು ಅವರು ಹೇಳಿದರು.
ಒಟ್ಟಿನಲ್ಲಿ, ನಿತೇಶ್ ತಿವಾರಿ ಅವರ ದೃಷ್ಟಿಕೋನ, ಎ.ಆರ್. ರೆಹಮಾನ್ ಹಾಗೂ ಹ್ಯಾನ್ಸ್ ಝಿಮ್ಮರ್ ಅವರ ನಾದಪ್ರಪಂಚ ಸೇರಿ ‘ರಾಮಾಯಣ’ ಚಿತ್ರವು ಭಾರತೀಯ ಬೆಳ್ಳಿತೆರೆಯ ಇತಿಹಾಸದಲ್ಲೇ ಹೊಸ ದಾಖಲೆ ಬರೆಯುವ ಮುನ್ಸೂಚನೆ ನೀಡಿದೆ.
