ಹೊಸದಿಗಂತ ಡಿಜಿಟಲ್‌ ಡೆಸ್ಕ್:
ಗುಜರಾತ್‌ನ ಪ್ರಸಿದ್ಧ ಹಬ್ಬ ನವರಾತ್ರಿಯ ಸಂಭ್ರಮದ ನಡುವೆಯೇ ಭಾರೀ ವಂಚನೆ ಜಾಲವೊಂದನ್ನು ಅಹಮದಾಬಾದ್ ಸೈಬರ್ ಕ್ರೈಂ ಪೊಲೀಸರು ಭೇದಿಸಿದ್ದಾರೆ. ನಗರದ ಪ್ರತಿಷ್ಠಿತ ನವರಾತ್ರಿ ಕಾರ್ಯಕ್ರಮಗಳ ನಕಲಿ ಆನ್‌ಲೈನ್ ಪಾಸ್ ಹಾಗೂ ಟಿಕೆಟ್‌ಗಳನ್ನು ಮಾರಾಟ ಮಾಡಿ ಸಾರ್ವಜನಿಕರಿಗೆ ವಂಚಿಸುತ್ತಿದ್ದ ಪ್ರಕರಣ ಬೆಳಕಿಗೆ ಬಂದಿದ್ದು, ಪೊಲೀಸರು ಅಧಿಕೃತ ದೂರು ದಾಖಲಿಸಿಕೊಂಡಿದ್ದಾರೆ.
ಖಾಸಗಿ ಕಂಪನಿಯೊಂದರ ವ್ಯವಸ್ಥಾಪಕರೊಬ್ಬರು ನೀಡಿದ ದೂರಿನ ಮೇರೆಗೆ ಪೊಲೀಸರು ಈ ಕ್ರಮ ಕೈಗೊಂಡಿದ್ದಾರೆ. ಈ ಕಂಪನಿಯು ಅಹಮದಾಬಾದ್‌ನಲ್ಲಿ ಜನಪ್ರಿಯವಾಗಿರುವ ‘ಅನಂತ್ ಬ್ರಹ್ಮಾಂಡ್’ ಎಂಬ ನವರಾತ್ರಿ ಗರ್ಬಾ ಸಂಭ್ರಮವನ್ನು ಆಯೋಜಿಸುತ್ತಿತ್ತು. ಇದನ್ನೇ ಬಂಡವಾಳ ಮಾಡಿಕೊಂಡ ವಂಚಕರು ದೊಡ್ಡ ಮಟ್ಟದ ವಂಚನೆಗೆ ಜಾಲ ಹೆಣೆದಿದ್ದರು.
ನಕಲಿ ಇನ್‌ಸ್ಟಾಗ್ರಾಮ್ ಖಾತೆ ಮೂಲಕ ವಂಚನೆ
ಪೊಲೀಸ್ ವರದಿಯ ಪ್ರಕಾರ, ಈ ವಂಚನೆಯು ಆಗಸ್ಟ್ 19 ರಿಂದ ಅಕ್ಟೋಬರ್ 14 ರ ಅವಧಿಯಲ್ಲಿ ನಡೆದಿದೆ. ಅಪರಿಚಿತ ವಂಚಕರು ಇನ್‌ಸ್ಟಾಗ್ರಾಮ್‌ನಲ್ಲಿ veer.rajjputtt ಎಂಬ ನಕಲಿ ಖಾತೆಯನ್ನು ತೆರೆದಿದ್ದರು. ಅಲ್ಲದೆ, ಕೊನೆಯಲ್ಲಿ 808 ಸಂಖ್ಯೆ ಇರುವ ಮೊಬೈಲ್ ಸಂಖ್ಯೆಯನ್ನು ಬಳಸಿ ತಾವು ಕಾರ್ಯಕ್ರಮದ ಸಂಘಟಕರು ಎಂದು ಬಿಂಬಿಸಿಕೊಂಡಿದ್ದರು. ಅಷ್ಟೇ ಅಲ್ಲದೆ, ಸಾರ್ವಜನಿಕರನ್ನು ನಂಬಿಸಲು ಆಯೋಜಕ ಕಂಪನಿಯ ಹೆಸರನ್ನೇ ಹೋಲುವ ನಕಲಿ ಇಮೇಲ್ ಐಡಿಯನ್ನೂ ಸೃಷ್ಟಿಸಿದ್ದರು.
‘ಅನಂತ್ ಬ್ರಹ್ಮಾಂಡ್ ಗರ್ಬಾ’ದ ಅಧಿಕೃತ ಹೆಸರು, ಲೋಗೋ ಮತ್ತು ಬ್ರ್ಯಾಂಡಿಂಗ್ ಬಳಸಿ 4,000 ದಿಂದ 10,000 ವರೆಗಿನ ಅಸಲಿ ಪಾಸ್‌ಗಳ ಮೇಲೆ ಭಾರೀ ರಿಯಾಯಿತಿ ನೀಡುವುದಾಗಿ ಸಾಮಾಜಿಕ ಜಾಲತಾಣಗಳಲ್ಲಿ ಜಾಹೀರಾತು ನೀಡಿದ್ದರು. ಇದನ್ನು ನಂಬಿದ ನೂರಾರು ಜನರು ಆ ನಕಲಿ ಖಾತೆಗಳಿಗೆ ಹಣ ಪಾವತಿಸಿದ್ದಾರೆ. ಹಣ ಸಂದಾಯವಾದ ತಕ್ಷಣ ವಂಚಕರು ಜನರಿಗೆ ನಕಲಿ ಕ್ಯೂಆರ್ ಕೋಡ್ ಮತ್ತು ಅಸಲಿಯಂತೆ ಕಾಣುವ ನಕಲಿ ಇಮೇಲ್ ದೃಢೀಕರಣ ಪತ್ರಗಳನ್ನು ಕಳುಹಿಸುತ್ತಿದ್ದರು.
ಹಗರಣ ಬೆಳಕಿಗೆ ಬಂದಿದ್ದು ಹೇಗೆ?
ಕೆಲವು ಜಾಗರೂಕ ಗ್ರಾಹಕರು ಸಾಮಾಜಿಕ ಜಾಲತಾಣಗಳಲ್ಲಿ ಸಿಗುತ್ತಿದ್ದ ಭಾರೀ ರಿಯಾಯಿತಿಯ ಆಫರ್‌ಗಳನ್ನು ಕಂಡು ಸಂಶಯಗೊಂಡು, ನೇರವಾಗಿ ಕಾರ್ಯಕ್ರಮದ ನಿಜವಾದ ಮ್ಯಾನೇಜ್‌ಮೆಂಟ್ ತಂಡವನ್ನು ಸಂಪರ್ಕಿಸಿ ಕ್ರಾಸ್ ವೆರಿಫೈ ಮಾಡಿದ್ದಾರೆ. ಆಗಲೇ ತಮ್ಮ ಕಂಪನಿಯ ಹೆಸರಿನಲ್ಲಿ ಸಾರ್ವಜನಿಕರನ್ನು ವಂಚಿಸುತ್ತಿರುವುದು ಸಂಘಟಕರ ಗಮನಕ್ಕೆ ಬಂದಿದೆ. ಹಬ್ಬದ ಸೀಸನ್‌ನಲ್ಲಿ ಜನರನ್ನು ಲೂಟಿ ಮಾಡುತ್ತಿರುವುದನ್ನು ಅರಿತ ಕಂಪನಿಯ ಪ್ರತಿನಿಧಿಗಳು ತಕ್ಷಣ ಸೈಬರ್ ಪೊಲೀಸರನ್ನು ಸಂಪರ್ಕಿಸಿ ದೂರು ನೀಡಿದ್ದಾರೆ. ಸದ್ಯ ಪೊಲೀಸರು ಭಾರತೀಯ ನ್ಯಾಯ ಸಂಹಿತೆ ಮತ್ತು ಮಾಹಿತಿ ತಂತ್ರಜ್ಞಾನ ಕಾಯ್ದೆಯಡಿ ಪ್ರಕರಣ ದಾಖಲಿಸಿಕೊಂಡು ತನಿಖೆ ಆರಂಭಿಸಿದ್ದಾರೆ.
ಸೈಬರ್ ಡಿಸಿಪಿ ಡಾ. ಲವಿನಾ ಸಿನ್ಹಾ ಎಚ್ಚರಿಕೆ
ಈ ಕುರಿತು ನಾಗರಿಕರಿಗೆ ಜಾಗೃತಿ ಮೂಡಿಸಿರುವ ಅಹಮದಾಬಾದ್ ಸೈಬರ್ ಕ್ರೈಂ ಡಿಸಿಪಿ ಡಾ. ಲವಿನಾ ಸಿನ್ಹಾ, “ಯಾರೂ ಕೂಡ ಅಪರಿಚಿತ ವ್ಯಕ್ತಿಗಳಿಂದ ಅಥವಾ ಅಧಿಕೃತವಲ್ಲದ ಸೋಷಿಯಲ್ ಮೀಡಿಯಾ ಪ್ರೊಫೈಲ್‌ಗಳ ಮೂಲಕ ಟಿಕೆಟ್ ಮತ್ತು ಪಾಸ್‌ಗಳನ್ನು ಖರೀದಿಸಬಾರದು. ಸೈಬರ್ ವಂಚನೆಗೆ ಒಳಗಾಗದಿರಲು ಕೇವಲ ಅಧಿಕೃತ ವೆಬ್‌ಸೈಟ್‌ ಹಾಗೂ ಲಿಂಕ್‌ಗಳ ಮೂಲಕವೇ ಹಣ ಪಾವತಿಸಬೇಕು” ಎಂದು ಸೂಚನೆ ನೀಡಿದ್ದಾರೆ.
ಇದನ್ನೂ ಓದಿ:
ಸಾರ್ವಜನಿಕರಿಗೆ ಇಂತಹ ಯಾವುದೇ ನಕಲಿ ಲಿಂಕ್‌ಗಳು, ಸಾಮಾಜಿಕ ಜಾಲತಾಣದ ಪೇಜ್‌ಗಳು ಅಥವಾ ಟಿಕೆಟ್ ವಂಚನೆ ಕಂಡುಬಂದಲ್ಲಿ ತಕ್ಷಣವೇ 1930 ಸಹಾಯವಾಣಿಗೆ ಕರೆ ಮಾಡಿ ದೂರು ನೀಡಲು ಅಥವಾ ಹತ್ತಿರದ ಪೊಲೀಸ್ ಠಾಣೆಯನ್ನು ಸಂಪರ್ಕಿಸಲು ಸೈಬರ್ ಕ್ರೈಂ ವಿಭಾಗದ ಪೊಲೀಸರು ಮನವಿ ಮಾಡಿದ್ದಾರೆ.
