ಹೊಸದಿಗಂತ ಡಿಜಿಟಲ್‌ ಡೆಸ್ಕ್:
ಮುಂಬರುವ ಹಬ್ಬದ ಸೀಸನ್ ಅನ್ನು ದೃಷ್ಟಿಯಲ್ಲಿಟ್ಟುಕೊಂಡು ಕೇಂದ್ರ ಸರ್ಕಾರವು ರಾಜ್ಯ ಸರ್ಕಾರಗಳ ಅಭಿವೃದ್ಧಿ ಕಾರ್ಯಗಳಿಗೆ ಆರ್ಥಿಕ ಬಲ ತುಂಬಿದೆ. ಕೇಂದ್ರ ಹಣಕಾಸು ಸಚಿವಾಲಯವು ಶನಿವಾರದಂದು (ಅ.31) ರಾಜ್ಯಗಳಿಗೆ ನಿಯಮಿತ ಮಾಸಿಕ ತೆರಿಗೆ ಹಂಚಿಕೆಯ ಹೊರತಾಗಿ ಹೆಚ್ಚುವರಿಯಾಗಿ 1,09,019 ಕೋಟಿ ರೂ. ಮೊತ್ತದ ತೆರಿಗೆ ಹಂಚಿಕೆ ಕಂತನ್ನು ಬಿಡುಗಡೆ ಮಾಡಿದೆ. ಇದು ಪ್ರಸಕ್ತ 2026-27ನೇ ಹಣಕಾಸು ವರ್ಷದ ಎರಡನೇ ಹೆಚ್ಚುವರಿ ಕಂತಾಗಿದೆ. ಇದರಲ್ಲಿ ನಮ್ಮ ಕರ್ನಾಟಕಕ್ಕೆ 4,504 ಕೋಟಿ ರೂ. ಲಭಿಸಿದ್ದು, ರಾಜ್ಯದಲ್ಲಿ ಚಾಲ್ತಿಯಲ್ಲಿರುವ ಮೂಲಸೌಕರ್ಯ ಯೋಜನೆಗಳಿಗೆ ಆಸರೆ ಸಿಕ್ಕಂತಾಗಿದೆ.
ಪ್ರತಿ ತಿಂಗಳು ನಿಯಮಿತವಾಗಿ ನೀಡುವ ತೆರಿಗೆ ಹಂಚಿಕೆಯ ಹೊರತಾಗಿ, ಪ್ರಸಕ್ತ ಹಣಕಾಸು ವರ್ಷದಲ್ಲಿ ಕೇಂದ್ರ ಸರ್ಕಾರವು ನೀಡುತ್ತಿರುವ ಎರಡನೇ ಹೆಚ್ಚುವರಿ ಮುಂಗಡ ಕಂತು ಇದಾಗಿದೆ. ಇದಕ್ಕೂ ಮುನ್ನ ಕಳೆದ ಆಗಸ್ಟ್ 1 ರಂದು ಕೂಡ ಇಷ್ಟೇ ಪ್ರಮಾಣದ ನಿಧಿಯನ್ನು ರಾಜ್ಯಗಳ ನೆರವಿಗಾಗಿ ಬಿಡುಗಡೆ ಮಾಡಲಾಗಿತ್ತು. ಕೇಂದ್ರದ ಈ ಹೆಚ್ಚುವರಿ ತೆರಿಗೆ ಹಂಚಿಕೆಯಲ್ಲಿ ಎಂದಿನಂತೆ ಉತ್ತರ ಪ್ರದೇಶವು ಗರಿಷ್ಠ ಮೊತ್ತವನ್ನು ಪಡೆದುಕೊಂಡಿದೆ. ಉತ್ತರ ಪ್ರದೇಶಕ್ಕೆ 19,208 ಕೋಟಿ ರೂ. ಸಿಕ್ಕರೆ, ಬಿಹಾರಕ್ಕೆ 10,845 ಕೋಟಿ ರೂ.ಹಾಗೂ ಮಧ್ಯಪ್ರದೇಶಕ್ಕೆ 8,010 ಕೋಟಿ ರೂ. ಹಂಚಿಕೆಯಾಗಿದೆ.
ಕರ್ನಾಟಕಕ್ಕೆ 9ನೇ ಸ್ಥಾನ
ಸೆಪ್ಟೆಂಬರ್ ತಿಂಗಳಿನಲ್ಲಿ ದೇಶದ ಒಟ್ಟು ಜಿಎಸ್‌ಟಿ ಸಂಗ್ರಹವು ಶೇ. 14.7 ರಷ್ಟು ಏರಿಕೆ ಕಂಡು 2.03 ಲಕ್ಷ ಕೋಟಿ ರೂ. ದಾಟಿದೆ. ಇದರಲ್ಲಿ ಕರ್ನಾಟಕವು ಶೇ. 16ರಷ್ಟು ಭಾರೀ ಪ್ರಗತಿಯೊಂದಿಗೆ ಬರೋಬ್ಬರಿ 13,884 ಕೋಟಿ ರೂ. ಸಂಗ್ರಹಿಸಿ ದೇಶದಲ್ಲೇ ಎರಡನೇ ಸ್ಥಾನದಲ್ಲಿದೆ. ಆದಾಗ್ಯೂ, ಆಯೋಗದ ಹಂಚಿಕೆ ಸೂತ್ರದನ್ವಯ ಒಟ್ಟು ಹಂಚಿಕೆಯಲ್ಲಿ ಕರ್ನಾಟಕಕ್ಕೆ ಒಂಬತ್ತನೇ ಸ್ಥಾನ ಲಭಿಸಿದೆ.
ಯಾವ್ಯಾವ ಪ್ರಮುಖ ರಾಜ್ಯಗಳಿಗೆ ಎಷ್ಟು ಸಿಕ್ಕಿದೆ?
ಉತ್ತರ ಪ್ರದೇಶ: 19,208 ಕೋಟಿ ರೂ., ಬಿಹಾರ 10,845 ಕೋಟಿ ರೂ., ಮಧ್ಯಪ್ರದೇಶ: 8,010 ಕೋಟಿ ರೂ., ಪಶ್ಚಿಮ ಬಂಗಾಳ: 7,866 ಕೋಟಿ ರೂ., ಮಹಾರಾಷ್ಟ್ರ: 7,022 ಕೋಟಿ ರೂ., ಆಂಧ್ರಪ್ರದೇಶ: 4,597 ಕೋಟಿ ರೂ., ಕರ್ನಾಟಕ: 4,504 ಕೋಟಿ ರೂ., ತಮಿಳುನಾಡು: 4,466 ಕೋಟಿ ರೂ. ಪಡೆದುಕೊಂಡಿವೆ.
ಇದನ್ನೂ ಓದಿ:
16ನೇ ಹಣಕಾಸು ಆಯೋಗದ ಶಿಫಾರಸುಗಳ ಚೌಕಟ್ಟಿನ ಅಡಿಯಲ್ಲಿ, ರಾಜ್ಯಗಳು ಕೇಂದ್ರ ತೆರಿಗೆಗಳ ಒಟ್ಟು ಪೂಲ್‌ನಿಂದ ಶೇಕಡಾ 41 ರಷ್ಟು ಪಡೆಯಲು ಅರ್ಹವಾಗಿವೆ. ಹಬ್ಬದ ಈ ಸಂದರ್ಭದಲ್ಲಿ ಬಿಡುಗಡೆಯಾಗಿರುವ ಈ ಮುಂಗಡ ಹಣವು ಆರ್ಥಿಕ ಕೊರತೆಯಿಂದ ತತ್ತರಿಸುತ್ತಿರುವ ರಾಜ್ಯಗಳ ಕೈಹಿಡಿಯಲಿದೆ.
