November 17, 2026
Tuesday, November 17, 2026
spot_img

ಚಳಿಗಾಲದಲ್ಲಿ ಚರ್ಮಕ್ಕೆ ಬೇಕು ಸ್ಪೆಷಲ್‌ ಕೇರ್‌: ಈ ತಪ್ಪುಗಳನ್ನು ಮಾಡಲೇಬೇಡಿ

ಚಳಿಗಾಲ ಆರಂಭವಾಗಿದೆ. ರಾಜ್ಯದಲ್ಲಿ ಕೊರೆಯುವ ಚಳಿಯಿಂದಾಗಿ ಜನ ಹೈರಾಣಾಗಿದ್ದಾರೆ. ಚಳಿಗಾಲದಲ್ಲಿ ಆರೋಗ್ಯ ಸಮಸ್ಯೆಗಳು, ಚರ್ಮಸಮಸ್ಯೆಗಳು ಹೆಚ್ಚಿರುತ್ತವೆ. ಹೀಗಾಗಿ ಇದರ ಬಗ್ಗೆ ಹೆಚ್ಚಿನ ಕಾಳಜಿ ವಹಿಸುವುದು ಉತ್ತಮವಾಗಿದೆ. ಚಳಿಗಾಲದಲ್ಲಿ ಮಾಡುವ ಕೆಲವು ತಪ್ಪುಗಳಿಂದ ಚರ್ಮ ಹಾಳಾಗುತ್ತದೆ, ಕಾಂತಿಯಿಲ್ಲದಂತಾಗುತ್ತದೆ. ಚಳಿಗಾಲದಲ್ಲಿ ಈ ತಪ್ಪುಗಳನ್ನು ಅವಾಯ್ಡ್‌ ಮಾಡಿ..

ಚಳಿಗಾಲದಲ್ಲಿ ಬಿಸಿನೀರಿನ ಸ್ನಾನ ಹಿತವೆನಿಸಿದರೂ ಅತಿಯಾದ ಬಿಸಿ ನೀರು ಚರ್ಮದಲ್ಲಿರುವ ನೈಸರ್ಗಿಕ ತೈಲಾಂಶವನ್ನು ಕಡಿಮೆ ಮಾಡಬಹುದು. ಇದರಿಂದ ಚರ್ಮ ಮತ್ತಷ್ಟು ಒಣಗುವ ಸಾಧ್ಯತೆ ಇದೆ. ಆದ್ದರಿಂದ ಉಗುರುಬೆಚ್ಚಗಿನ ನೀರನ್ನು ಬಳಸಿ, ಹೆಚ್ಚು ಹೊತ್ತು ಸ್ನಾನ ಮಾಡುವುದನ್ನು ತಪ್ಪಿಸಿ.

ಚಳಿಗಾಲದಲ್ಲಿ ಚರ್ಮಕ್ಕೆ ತೇವಾಂಶದ ಅಗತ್ಯ ಹೆಚ್ಚಿರುತ್ತದೆ. ಸ್ನಾನ ಮಾಡಿದ ತಕ್ಷಣ ಚರ್ಮ ಸ್ವಲ್ಪ ತೇವವಾಗಿರುವಾಗಲೇ ಮಾಯಿಶ್ಚರೈಸರ್‌ ಹಚ್ಚುವುದು ಉತ್ತಮ. ಇದು ಚರ್ಮದಲ್ಲಿನ ತೇವಾಂಶವನ್ನು ಉಳಿಸಿಕೊಳ್ಳಲು ಸಹಾಯ ಮಾಡುತ್ತದೆ. ಒಣ ಚರ್ಮದವರು ದಿನದಲ್ಲಿ ಅಗತ್ಯಕ್ಕೆ ಅನುಗುಣವಾಗಿ ಮತ್ತೆ ಹಚ್ಚಬಹುದು.

ಚಳಿಗಾಲದಲ್ಲಿ ತುಟಿಗಳು ಬೇಗ ಒಣಗಿ ಬಿರುಕು ಬಿಡಬಹುದು. ತುಟಿಗಳನ್ನು ಪದೇಪದೆ ನಾಲಿಗೆಯಿಂದ ಒದ್ದೆ ಮಾಡುವುದು ಸಮಸ್ಯೆಯನ್ನು ಹೆಚ್ಚಿಸಬಹುದು. ಬದಲಿಗೆ ಲಿಪ್‌ ಬಾಮ್‌ ಅಥವಾ ಪೆಟ್ರೋಲಿಯಂ ಜೆಲ್ಲಿಯನ್ನು ಬಳಸಿ ತುಟಿಗಳ ತೇವಾಂಶ ಕಾಪಾಡಿಕೊಳ್ಳಿ.

ಚಳಿಗಾಲದಲ್ಲಿ ಬಿಸಿಲಿನ ತೀವ್ರತೆ ಕಡಿಮೆ ಇರುವುದರಿಂದ ಸನ್‌ಸ್ಕ್ರೀನ್‌ ಅಗತ್ಯವಿಲ್ಲ ಎಂದು ಹಲವರು ಭಾವಿಸುತ್ತಾರೆ. ಆದರೆ ಮೋಡ ಕವಿದ ದಿನಗಳಲ್ಲಿಯೂ ಸೂರ್ಯನ ಅಲ್ಟ್ರಾವಯಲೆಟ್‌ ಕಿರಣಗಳು ಚರ್ಮದ ಮೇಲೆ ಪರಿಣಾಮ ಬೀರಬಹುದು. ಹೀಗಾಗಿ ಹಗಲಿನಲ್ಲಿ ಹೊರಗೆ ಹೋಗುವಾಗ SPF 30 ಅಥವಾ ಅದಕ್ಕಿಂತ ಹೆಚ್ಚಿನ ಬ್ರಾಡ್‌ ಸ್ಪೆಕ್ಟ್ರಮ್‌ ಸನ್‌ಸ್ಕ್ರೀನ್‌ ಬಳಸುವುದು ಸೂಕ್ತ.

ಮುಖವನ್ನು ಆಗಾಗ್ಗೆ ತೊಳೆಯುವುದು ಅಥವಾ ಗಟ್ಟಿಯಾದ ಸೋಪ್‌ ಬಳಸುವುದು ಚರ್ಮದ ನೈಸರ್ಗಿಕ ತೇವಾಂಶವನ್ನು ಕಡಿಮೆ ಮಾಡಬಹುದು. ದಿನಕ್ಕೆ ಎರಡು ಬಾರಿ ಮೃದುವಾದ ಕ್ಲೆನ್ಸರ್‌ನಿಂದ ಮುಖ ತೊಳೆಯುವುದು ಸಾಕು. ಮುಖ ತೊಳೆದ ನಂತರ ಮಾಯಿಶ್ಚರೈಸರ್‌ ಹಚ್ಚುವುದನ್ನು ಮರೆಯಬೇಡಿ.

ಚಳಿಗಾಲದಲ್ಲಿ ಚರ್ಮ ಒಣಗಿದಾಗ ಸತ್ತ ಚರ್ಮದ ಕೋಶಗಳನ್ನು ತೆಗೆಯಲು ಕೆಲವರು ಪದೇಪದೆ ಸ್ಕ್ರಬ್‌ ಮಾಡುತ್ತಾರೆ. ಆದರೆ ಅತಿಯಾದ ಸ್ಕ್ರಬ್ಬಿಂಗ್‌ ಚರ್ಮದ ರಕ್ಷಣಾತ್ಮಕ ಪದರಕ್ಕೆ ಹಾನಿ ಉಂಟುಮಾಡಬಹುದು. ಇದರಿಂದ ಕೆಂಪಾಗುವುದು, ಉರಿ ಮತ್ತು ತುರಿಕೆ ಕಾಣಿಸಿಕೊಳ್ಳಬಹುದು. ಆದ್ದರಿಂದ ಮೃದುವಾದ ಆರೈಕೆಗೆ ಆದ್ಯತೆ ನೀಡಿ.

ಬೇಸಿಗೆಯಂತೆ ಚಳಿಗಾಲದಲ್ಲಿ ಬಾಯಾರಿಕೆ ಹೆಚ್ಚಾಗಿ ಕಾಣಿಸಿಕೊಳ್ಳುವುದಿಲ್ಲ. ಹೀಗಾಗಿ ಕೆಲವರು ನೀರು ಕುಡಿಯುವುದನ್ನು ಕಡಿಮೆ ಮಾಡುತ್ತಾರೆ. ದೇಹದ ಸಾಮಾನ್ಯ ಆರೋಗ್ಯ ಮತ್ತು ಜಲಸಮತೋಲನ ಕಾಪಾಡಿಕೊಳ್ಳಲು ದಿನವಿಡೀ ಸಾಕಷ್ಟು ನೀರು ಕುಡಿಯುವುದು ಮುಖ್ಯ.

ಮುಖಕ್ಕೆ ಮಾತ್ರ ಮಾಯಿಶ್ಚರೈಸರ್‌ ಹಚ್ಚಿ ಕೈ, ಮೊಣಕೈ, ಮೊಣಕಾಲು ಮತ್ತು ಪಾದಗಳನ್ನು ನಿರ್ಲಕ್ಷಿಸುವುದು ಸಾಮಾನ್ಯ ತಪ್ಪು. ಈ ಭಾಗಗಳಲ್ಲಿಯೂ ಚರ್ಮ ಒಣಗಬಹುದು. ಕೈ ತೊಳೆದ ನಂತರ ಮತ್ತು ಮಲಗುವ ಮುನ್ನ ಮಾಯಿಶ್ಚರೈಸರ್‌ ಹಚ್ಚಿ. ಪಾದಗಳ ಒಣ ಚರ್ಮಕ್ಕೆ ಸೂಕ್ತವಾದ ಮಾಯಿಶ್ಚರೈಸಿಂಗ್‌ ಕ್ರೀಮ್‌ ಬಳಸಬಹುದು.

Must Read