November 22, 2026
Sunday, November 22, 2026
spot_img

ಸೋಲು ಯಶಸ್ಸಿನ ಮೊದಲ ಮೆಟ್ಟಿಲು: ಸವಾಲುಗಳಿಗೆ ಬೆನ್ನು ತೋರಿಸದೆ ಎದುರಿಸಿ ನಿಲ್ಲಿ: ರಾಜನಾಥ್ ಸಿಂಗ್  

ಹೊಸದಿಗಂತ ಡಿಜಿಟಲ್‌ ಡೆಸ್ಕ್:‌

ಜೀವನದಲ್ಲಿ ಎದುರಾಗುವ ವೈಫಲ್ಯಗಳನ್ನು ಕಂಡು ಹೆದರದೆ, ಅವುಗಳನ್ನು ಯಶಸ್ಸಿನ ಮೆಟ್ಟಿಲುಗಳನ್ನಾಗಿ ಬದಲಾಯಿಸಿಕೊಳ್ಳಿ ಎಂದು ರಕ್ಷಣಾ ಸಚಿವ ರಾಜನಾಥ್ ಸಿಂಗ್ ವಿದ್ಯಾರ್ಥಿಗಳಿಗೆ ಕರೆ ನೀಡಿದ್ದಾರೆ. “ನಿಮ್ಮ ಪರಿಸ್ಥಿತಿ ಹೇಗೇ ಇರಲಿ, ಅದು ನಿಮ್ಮ ಭವಿಷ್ಯವನ್ನು ನಿರ್ಧರಿಸುವುದಿಲ್ಲ. ಬದಲಾಗಿ, ನೀವು ಹಾಕುವ ಪರಿಶ್ರಮವೇ ನಿಮ್ಮ ಬದುಕನ್ನು ರೂಪಿಸುತ್ತದೆ” ಎಂದು ಅವರು ಹೇಳಿದ್ದಾರೆ.

ಇಂದು ಲಕ್ನೋದ ಬಾಬು ಬನಾರಸಿ ದಾಸ್ ವಿಶ್ವವಿದ್ಯಾಲಯದ (BBDU) ಘಟಿಕೋತ್ಸವ ಸಮಾರಂಭವನ್ನು ಉದ್ದೇಶಿಸಿ ಮಾತನಾಡಿದ ಅವರು, ವಿಜ್ಞಾನಿ ಥಾಮಸ್ ಆಲ್ವಾ ಎಡಿಸನ್ ಮತ್ತು ಸ್ವಾಮಿ ವಿವೇಕಾನಂದರ ಜೀವನದ ಘಟನೆಗಳನ್ನು ಉದಾಹರಣೆಯಾಗಿ ನೀಡಿ ಪದವೀಧರ ವಿದ್ಯಾರ್ಥಿಗಳಲ್ಲಿ ಆತ್ಮವಿಶ್ವಾಸ ತುಂಬಿದರು.

ಸೋಲು ಎಂಬುದು ದೋಷವಲ್ಲ, ಯಶಸ್ಸಿನ ಭಾಗ

ಬಾಲ್ಯದಲ್ಲಿ ಶ್ರವಣ ದೋಷ ಸೇರಿದಂತೆ ಹಲವು ಕಷ್ಟಗಳನ್ನು ಎದುರಿಸಿಯೂ ಜಗತ್ತೇ ಮೆಚ್ಚುವ ಆವಿಷ್ಕಾರಗಳನ್ನು ಮಾಡಿದ ಎಡಿಸನ್ ಅವರ ಛಲವನ್ನು ಸಿಂಗ್ ಸ್ಮರಿಸಿದರು. ಕಂಪ್ಯೂಟರ್ ಮತ್ತು ಐಟಿ ಜಗತ್ತಿನ ಭಾಷೆಯಲ್ಲಿ ಹೇಳುವುದಾದರೆ “ಸೋಲು ಎಂಬುದು ಒಂದು ವೈಶಿಷ್ಟ್ಯವೇ ಹೊರತು ದೋಷವಲ್ಲ” ಎಂದ ಸಚಿವರು, ಶಾಲಾ-ಕಾಲೇಜುಗಳಲ್ಲಿ ಶಿಕ್ಷಣ ಪಡೆಯಲು ಶುಲ್ಕ ಪಾವತಿಸುವಂತೆ, ಜೀವನದಲ್ಲಿ ಕಲಿತು ಮುಂದೆ ಸಾಗಲು ಸೋಲಿನ ಬೆಲೆಯನ್ನೂ ತೆರಲು ಸಿದ್ಧರಿರಬೇಕು ಎಂದರು. ವಾರಾಣಸಿಯಲ್ಲಿ ಕೋತಿಗಳು ಬೆನ್ನಟ್ಟಿದಾಗ ಸ್ವಾಮಿ ವಿವೇಕಾನಂದರು ಓಡಿಹೋಗದೆ ತಿರುಗಿ ನಿಂತು ಎದುರಿಸಿದ ಘಟನೆಯನ್ನು ಉಲ್ಲೇಖಿಸಿ, ಕಷ್ಟಗಳಿಂದ ಪಲಾಯನ ಮಾಡದೆ ಧೈರ್ಯವಾಗಿ ಎದುರಿಸಿ ಎಂದು ಕಿವಿಮಾತು ಹೇಳಿದರು.

ವಜ್ರದಂತೆ ತಾಳ್ಮೆಯಿಂದಿರಿ

ವಿಶ್ವವಿದ್ಯಾಲಯದ ಪರೀಕ್ಷೆಗಳಿಗೆ ನಿಗದಿತ ಪಠ್ಯಕ್ರಮವಿರುತ್ತದೆ, ಆದರೆ ವೃತ್ತಿಪರ ಜಗತ್ತಿನಲ್ಲಿ ಪ್ರತಿದಿನ ಹೊಸ ಸವಾಲುಗಳು ಎದುರಾಗುತ್ತವೆ. ಬಿಸಿಲಿನಲ್ಲಿ ಇಟ್ಟಾಗ ನಕಲಿ ಗಾಜು ಬಿಸಿಯಾದರೆ, ಅಸಲಿ ವಜ್ರ ತಣ್ಣಗಿರುತ್ತದೆ ಎಂಬ ರಾಜನೊಬ್ಬನ ಕಥೆಯನ್ನು ಹೇಳಿದ ಸಿಂಗ್, “ಕಷ್ಟದ ಸಂದರ್ಭಗಳಲ್ಲಿ ತಾಳ್ಮೆ ಕಳೆದುಕೊಂಡು ಬಿಸಿಯಾಗಬೇಡಿ, ಹತಾಶರಾಗಬೇಡಿ. ಆಗ ನೀವು ಸಮಾಜಕ್ಕೆ ವಜ್ರದಂತೆ ಹೊಳೆಯುತ್ತೀರಿ” ಎಂದು ಹುರಿದುಂಬಿಸಿದರು.

ಲಕ್ನೋ ಮಣ್ಣಿನಲ್ಲೇ ಬ್ರಹ್ಮೋಸ್ ನಿರ್ಮಾಣ

ಪ್ರಧಾನಮಂತ್ರಿ ಇಂಟರ್ನ್‌ಶಿಪ್ ಯೋಜನೆ, ರಾಷ್ಟ್ರೀಯ ಸಂಶೋಧನಾ ಪ್ರತಿಷ್ಠಾನ ಮತ್ತು ಮೇಕ್ ಇನ್ ಇಂಡಿಯಾ ಮೂಲಕ ಯುವಜನತೆಗೆ ಹೊಸ ಅವಕಾಶಗಳನ್ನು ಕಲ್ಪಿಸಲಾಗುತ್ತಿದೆ ಎಂದರು. ಲಕ್ನೋ ಸಂಸದನಾದ ಬಳಿಕ ಇಲ್ಲಿ ಬೃಹತ್ ರಕ್ಷಣಾ ಯೋಜನೆಗಳು ಮತ್ತು ಡಿಆರ್‌ಡಿಒ ಪ್ರಯೋಗಾಲಯ ಸ್ಥಾಪಿಸಲಾಗಿದೆ.

ಇಂದು ಲಕ್ನೋ ಮಣ್ಣಿನಲ್ಲೇ ಬ್ರಹ್ಮೋಸ್ ಕ್ಷಿಪಣಿ ತಯಾರಾಗುತ್ತಿದ್ದು, ‘ಆಪರೇಷನ್ ಸಿಂಧೂರ್’ ವೇಳೆ ಅದರ ಸಾಮರ್ಥ್ಯವನ್ನು ದೇಶವೇ ಕಂಡಿದೆ ಎಂದರು. ಅಲ್ಲದೆ, ಬಾಹ್ಯಾಕಾಶದಲ್ಲಿ ಉಪಗ್ರಹಗಳ ಡಾಕಿಂಗ್ ಮತ್ತು ಅನ್‌ಡಾಕಿಂಗ್ ತಂತ್ರಜ್ಞಾನ ಹೊಂದಿರುವ ವಿಶ್ವದ ನಾಲ್ಕನೇ ರಾಷ್ಟ್ರವಾಗಿ ಭಾರತ ಹೊರಹೊಮ್ಮಿದೆ ಎಂದು ಹೆಮ್ಮೆ ವ್ಯಕ್ತಪಡಿಸಿದರು.

Must Read

Skip to toolbar