ನಮ್ಮ ಬದುಕಿನಲ್ಲಿ ಮಾತಿಗಿಂತ ಹೆಚ್ಚು ಪ್ರಭಾವ ಬೀರುವ ಅಂಶ ನಮ್ಮ ದೇಹಭಾಷೆ. ಬಾಡಿ ಲಾಂಗ್ವೇಜ್‌ ಅಂದರೆ ಕೇವಲ ನಿಲ್ಲುವ ವಿಧಾನ ಅಥವಾ ಮುಖಭಾವ ಮಾತ್ರವಲ್ಲ, ಅದು ನಮ್ಮ ಆತ್ಮವಿಶ್ವಾಸ, ವ್ಯಕ್ತಿತ್ವ ಮತ್ತು ವೃತ್ತಿ ಬದುಕನ್ನು ಬದಲಾಯಿಸಬಲ್ಲ ಶಕ್ತಿಯುತ ಸಾಧನವಾಗಿದೆ. ವೈಯಕ್ತಿಕ ಬದುಕಿನಿಂದ ವೃತ್ತಿಜೀವನದವರೆಗೂ ಬಾಡಿ ಲಾಂಗ್ವೇಜ್‌ ಒಳ್ಳೆಯ ಮುದ್ರೆ ಮೂಡಿಸಲು ಮುಖ್ಯ ಪಾತ್ರ ವಹಿಸುತ್ತದೆ.
EYE Contact ಸರಿಯಾಗಿರಲಿ
ಸಂಭಾಷಣೆಯ ವೇಳೆ ಎದುರಿಗಿರುವವರ ಕಣ್ಣಿಗೆ ಸರಿಯಾಗಿ ನೋಡುವುದು ಮುಖ್ಯ. ಇದು ನೀವು ಗಮನವಿಟ್ಟು ಕೇಳುತ್ತಿದ್ದೀರಿ ಎಂಬ ಭಾವನೆಯನ್ನು ಕೊಡುತ್ತದೆ. ಆದರೆ ಸಮತೋಲನ ಕಾಪಾಡುವುದು ಅಗತ್ಯ, ಅತಿಯಾದ ದೃಷ್ಟಿ ಎದುರಾಳಿಯನ್ನು ಮುಜುಗರಕ್ಕೆ ಗುರಿಪಡಿಸಬಹುದು.
ನಿಲ್ಲುವ ಭಂಗಿ ಧನಾತ್ಮಕವಾಗಿರಲಿ
ನೀವು ನಿಲ್ಲುವ ವಿಧಾನವೇ ನಿಮ್ಮ ಆತ್ಮವಿಶ್ವಾಸವನ್ನು ತೋರಿಸುತ್ತದೆ. ಭುಜಗಳು ಹಿಂದಕ್ಕೆ ಸರಿದು, ತಲೆ ಎತ್ತರವಾಗಿ ಇರುವ ನಿಲುವು ಒಂದು ರೂಮಿಗೆ ಪ್ರವೇಶಿಸುವಷ್ಟರಲ್ಲಿ ನಿಮ್ಮಲ್ಲಿ ಧನಾತ್ಮಕ ಪ್ರಭಾವ ಮೂಡಿಸುತ್ತದೆ.
ಮಾತಿನಲ್ಲಿ ಸ್ಪಷ್ಟತೆ ಇರಲಿ
ಸಂದರ್ಶನವಾಗಲಿ ಅಥವಾ ಸಭೆಯಾಗಲಿ, ನಿಮ್ಮ ಮಾತಿನಲ್ಲಿ ದೃಢತೆ ಮತ್ತು ಸ್ಪಷ್ಟತೆ ಇರಬೇಕು. ಅತಿಯಾಗಿ ತಡಕಾಡುವುದು ಅಥವಾ ಅಸ್ಪಷ್ಟವಾಗಿ ಮಾತನಾಡುವುದಕ್ಕಿಂತ ನಿಧಾನವಾಗಿ ಸ್ಪಷ್ಟವಾಗಿ ಹೇಳುವುದು ಉತ್ತಮ.
ಮುಖಭಾವ ಮತ್ತು ಮಂದಹಾಸ
ಸಂಭಾಷಣೆಯ ವೇಳೆ ಒಂದು ಸರಳ ಮಂದಹಾಸ ನಿಮ್ಮ ವ್ಯಕ್ತಿತ್ವವನ್ನು ಇನ್ನಷ್ಟು ಆಕರ್ಷಕವಾಗಿಸುತ್ತದೆ. ಭಾವೋದ್ರಿಕ್ತವಾಗಿ ಮಾತನಾಡುವುದಕ್ಕಿಂತ ಸಮತೋಲನ ಕಾಪಾಡಿದ ಮುಖಭಾವ ಹೆಚ್ಚು ಒಳ್ಳೆಯ ಮುದ್ರೆ ಮೂಡಿಸುತ್ತದೆ.
