ನಮ್ಮ ಆಹಾರದಲ್ಲಿ ಪ್ರೋಟೀನ್ ಮತ್ತು ಫೈಬರ್ ಹೆಚ್ಚಿರುವ ಪದಾರ್ಥಗಳನ್ನು ಸೇರಿಸುವುದು ಬಹಳ ಮುಖ್ಯ. ಹೆಸರುಬೇಳೆ, ವಿಶೇಷವಾಗಿ ಹಳದಿ ಮತ್ತು ಹಸಿರು ಮೂಂಗ್ ದಾಲ್, ಫೈಬರ್ ಮತ್ತು ಪೌಷ್ಟಿಕಾಂಶದ ಭರಪೂರ ಮೂಲವಾಗಿದೆ. ಇದನ್ನು ನಗ್ಗೆಟ್ಸ್ ರೂಪದಲ್ಲಿ ತಯಾರಿಸಿದರೆ ಬಿಸಿಬಿಸಿಯಾಗಿ ಸವಿಯಬಹುದು.
ಬೇಕಾಗುವ ಸಾಮಗ್ರಿಗಳು:
ಹಳದಿ ಮೂಂಗ್ ದಾಲ್ – 1/2 ಕಪ್
ಹಸಿರು ಮೂಂಗ್ ದಾಲ್ – 1/2 ಕಪ್
ಉಪ್ಪು – ರುಚಿಗೆ ತಕ್ಕಷ್ಟು
ಹೆಚ್ಚಿದ ಈರುಳ್ಳಿ – ಅರ್ಧ
ಹೆಚ್ಚಿದ ಹಸಿರು ಮೆಣಸಿನಕಾಯಿ – 2
ಹೆಚ್ಚಿದ ಕ್ಯಾರೆಟ್ – ಕಾಲು ಕಪ್
ಕರಿಬೇವು – 6–7 ಎಲೆ
ಬ್ರೆಡ್ ತುಂಡುಗಳು – 1 ಕಪ್
ಅಚ್ಚಖಾರದ ಪುಡಿ – 1 ಚಮಚ
ಪೆಪ್ಪರ್ ಪೌಡರ್ – ಕಾಲು ಚಮಚ
ಚಾಟ್ ಮಸಾಲ – ಅರ್ಧ ಚಮಚ
ಜೀರಿಗೆ – ಅರ್ಧ ಚಮಚ
ಜೋಳದ ಹಿಟ್ಟು – 2 ಚಮಚ
ಎಣ್ಣೆ – ಅಗತ್ಯಕ್ಕೆ ತಕ್ಕಷ್ಟು
ತಯಾರಿಸುವ ವಿಧಾನ:
ಮೊದಲಿಗೆ ಹಳದಿ ಮತ್ತು ಹಸಿರು ಹೆಸರುಬೇಳೆಗಳನ್ನು ಚೆನ್ನಾಗಿ ತೊಳೆದು 2–3 ಗಂಟೆಗಳ ಕಾಲ ನೆನೆಸಿಡಿ. ನೆನೆಸಿದ ಬೇಳೆಗಳನ್ನು ಅರ್ಧಷ್ಟು ನೀರಿನಲ್ಲಿ ಬೇಯಿಸಿ, ನಂತರ ತಣ್ಣಗಾಗಲು ಬಿಡಿ. 2 ಚಮಚ ಬೇಳೆಯನ್ನು ತೆಗೆದು ಬದಿಗಿಟ್ಟುಕೊಳ್ಳಿ, ಉಳಿದ ಬೇಳೆಗಳನ್ನು ಮಿಕ್ಸರ್‌ನಲ್ಲಿ ಹಾಕಿ ರುಬ್ಬಿಕೊಳ್ಳಿ.
ದೊಡ್ಡ ಬೌಲಿನಲ್ಲಿ ರುಬ್ಬಿದ ಮಿಶ್ರಣವನ್ನು ಹಾಕಿ, ಅದಕ್ಕೆ ತರಕಾರಿಗಳು, ಬೇಳೆ, ಉಪ್ಪು, ಮಸಾಲೆ, ಬ್ರೆಡ್ ತುಂಡುಗಳನ್ನು ಸೇರಿಸಿ. ಕೊನೆಗೆ ಜೋಳದ ಹಿಟ್ಟನ್ನು ಸೇರಿಸಿ ಚೆನ್ನಾಗಿ ಕಲಸಿ ಹಿಟ್ಟನ್ನು ತಯಾರಿಸಿಕೊಳ್ಳಿ.
ಈ ಮಿಶ್ರಣವನ್ನು ಸ್ವಲ್ಪ ಸ್ವಲ್ಪ ತೆಗೆದು ನಿಮ್ಮ ಇಚ್ಛೆಯ ಆಕಾರದಲ್ಲಿ ತಯಾರಿಸಿಕೊಂಡು ಏರ್‌ಫ್ರೈಯರ್ ಅನ್ನು 180°C ಗೆ ಬಿಸಿಗಿಟ್ಟ ಮೇಲೆ Nuggets ಮೇಲೆ ಸ್ವಲ್ಪ ಎಣ್ಣೆ ಸವರಿಸಿ 15 ನಿಮಿಷ ಬೇಯಿಸಿ. ಬೇಕಿದ್ದರೆ ಎಣ್ಣೆಯಲ್ಲಿ ಫ್ರೈ ಮಾಡಿಕೊಳ್ಳಬಹುದು.
