ಪ್ರತಿ ವರ್ಷದಂತೆ ಈ ಬಾರಿ ಕೂಡ ಅಕ್ಟೋಬರ್ 8ರಂದು ದೇಶಾದ್ಯಂತ ಭಾರತೀಯ ವಾಯುಪಡೆ ದಿನವನ್ನು ವಿಜೃಂಭಣೆಯಿಂದ ಆಚರಿಸಲಾಗುತ್ತಿದೆ. 1932ರಲ್ಲಿ ಸ್ಥಾಪನೆಯಾದ ಭಾರತೀಯ ವಾಯುಪಡೆಯು ಇದೀಗ 93 ವರ್ಷಗಳ ಶ್ರೀಮಂತ ಇತಿಹಾಸವನ್ನು ಹೊಂದಿದೆ. ದೇಶದ ಭದ್ರತೆಗಾಗಿ ಜೀವ ತ್ಯಾಗ ಮಾಡಿದ ಹುತಾತ್ಮ ಯೋಧರನ್ನು ಸ್ಮರಿಸುವ ಜೊತೆಗೆ, ವಾಯುಪಡೆಯ ಸಾಧನೆಗಳನ್ನು ನೆನಪಿಸಿಕೊಳ್ಳುವ ಉದ್ದೇಶದಿಂದ ಈ ದಿನ ವಿಶೇಷ ಕಾರ್ಯಕ್ರಮಗಳನ್ನು ಹಮ್ಮಿಕೊಳ್ಳಲಾಗುತ್ತದೆ.
ಬ್ರಿಟಿಷ್ ಆಳ್ವಿಕೆಯ ಕಾಲದಲ್ಲಿ ಸಹಾಯಕ ಪಡೆ ಆಗಿ ಸ್ಥಾಪಿಸಲ್ಪಟ್ಟ ಭಾರತೀಯ ವಾಯುಪಡೆ, 1933ರ ಏಪ್ರಿಲ್ 1ರಂದು ತನ್ನ ಮೊದಲ ಅಧಿಕೃತ ಹಾರಾಟ ನಡೆಸಿತು. ಅಂದಿನಿಂದ ಕೇವಲ ಕೆಲವೇ ದಶಕಗಳಲ್ಲಿ ವಿಶ್ವದ ನಾಲ್ಕನೇ ಅತಿ ಬಲಿಷ್ಠ ವಾಯುಪಡೆಯಾಗಿ ಬೆಳೆದಿದೆ. ಗಡಿ ರಕ್ಷಣೆಯಿಂದ ಹಿಡಿದು, ಯುದ್ಧ ಕಾರ್ಯಾಚರಣೆ, ವಿಪತ್ತು ಪರಿಹಾರ ಮತ್ತು ಶಾಂತಿ ಕಾಪಾಡುವಲ್ಲಿ ಐಎಎಫ್ ನಿರ್ಣಾಯಕ ಪಾತ್ರ ವಹಿಸಿದೆ.
ವಾಯುಪಡೆಯ ದಿನದ ಮಹತ್ವ:
ಈ ದಿನವು ಕೇವಲ ಸೈನಿಕ ಶಕ್ತಿಯ ಪ್ರದರ್ಶನ ಮಾತ್ರವಲ್ಲ, ಬದಲಿಗೆ ಧೈರ್ಯ, ಸಮರ್ಪಣೆ ಮತ್ತು ತ್ಯಾಗದ ಸಂಕೇತವಾಗಿದೆ. ಪ್ರತಿವರ್ಷ ಏರ್ಫೋರ್ಸ್ ಡೇ ಸಂದರ್ಭದಲ್ಲಿ ವೈಮಾನಿಕ ಪ್ರದರ್ಶನಗಳು, ಪರೇಡ್ಗಳು ಹಾಗೂ ವಿಶೇಷ ಕಾರ್ಯಕ್ರಮಗಳ ಮೂಲಕ ಜನತೆಗೆ ವಾಯುಪಡೆಯ ಶಕ್ತಿ ಹಾಗೂ ಸಮರ್ಪಣೆಯನ್ನು ತೋರಿಸಲಾಗುತ್ತದೆ. ಇದೇ ವೇಳೆ ಹುತಾತ್ಮ ಯೋಧರಿಗೆ ಗೌರವ ಸಲ್ಲಿಸಲಾಗುತ್ತದೆ.
