ದಕ್ಷಿಣ ಭಾರತದ ಊಟದ ಅಸ್ತಿತ್ವವೇ ರಸಂ! ಆದರೆ ಅದರಲ್ಲಿ ಪಚ್ಚ ಪುಳಿ ರಸಂ (Pacha Puli Rasam) ಒಂದು ವಿಶಿಷ್ಟ ಸ್ಥಾನ ಪಡೆದಿದೆ. “ಪಚ್ಚ” ಎಂದರೆ ಹಸಿ, “ಪುಳಿ” ಎಂದರೆ ಹುಣಸೆ. ಅಂದರೆ ಈ ರಸಂ ಬೇಯಿಸದೇ, ಕಚ್ಚಾ ಹುಣಸೆ ನೀರಿನಿಂದ ತಯಾರಾಗುತ್ತದೆ. ಈ ರುಚಿಕರ ರಸಂ ತಮಿಳುನಾಡಿನಿಂದ ವಿಶಿಷ್ಟ ರುಚಿಯನ್ನು ಸಾರಿ ಹೇಳುತ್ತೆ.
ಬೇಕಾಗುವ ಪದಾರ್ಥಗಳು:
ಹುಣಸೆ — ಒಂದು ನಿಂಬೆ ಅಳತೆ
ಬೆಳ್ಳುಳ್ಳಿ — 5 ರಿಂದ 6
ಹಸಿಮೆಣಸು — 2
ಉಪ್ಪು — ರುಚಿಗೆ ತಕ್ಕಂತೆ
ಸಾಸಿವೆ — ½ ಟೀ ಸ್ಪೂನ್
ಮೆಣಸು ಪುಡಿ — ½ ಟೀ ಸ್ಪೂನ್
ಜೀರಿಗೆ — ½ ಟೀ ಸ್ಪೂನ್
ಎಣ್ಣೆ — 1 ಟೀ ಸ್ಪೂನ್
ಕರಿಬೇವು — ಸ್ವಲ್ಪ
ಕೊತ್ತಂಬರಿ ಸೊಪ್ಪು — ಅಲಂಕರಿಸಲು
ತಯಾರಿಸುವ ವಿಧಾನ:
ಮೊದಲಿಗೆ ಹುಣಸೆಯನ್ನು ಬೆಚ್ಚಗಿನ ನೀರಿನಲ್ಲಿ ನೆನೆಸಿ ಇಡಿ. ಬೆಳ್ಳುಳ್ಳಿ ಮತ್ತು ಹಸಿಮೆಣಸನ್ನು ಮಿಕ್ಸಿಯಲ್ಲಿ ಸಣ್ಣದಾಗಿ ರುಬ್ಬಿಕೊಳ್ಳಿ ಅಥವಾ ಕುಟ್ಟಾಣಿಯಲ್ಲಿ ಜಜ್ಜಿಕೊಂಡರು ಸಾಕು.
ಒಂದು ಪಾತ್ರೆಯಲ್ಲಿ ಎಣ್ಣೆ ಹಾಕಿ ಬಿಸಿ ಮಾಡಿ, ಸಾಸಿವೆ,ಕರಿಬೇವು ಹಾಕಿ. ಬಳಿಕ ಬೆಳ್ಳುಳ್ಳಿ-ಮೆಣಸಿನ ಮಿಶ್ರಣವನ್ನು ಹಾಕಿ ಸ್ವಲ್ಪ ಬಣ್ಣ ಬದಲಾಗುವವವರೆಗೆ ಹುರಿಯಿರಿ. ಈಗ ಹುಣಸೆಹಣ್ಣು ನೀರು ಮತ್ತು ಉಪ್ಪು ಸೇರಿಸಿ ಚೆನ್ನಾಗಿ ಕಲಸಿ.
ಈ ರಸಂ ಅನ್ನು ಕುದಿಸಬಾರದು. ಹಸಿ ಹುಳಿ ರುಚಿಯೇ ಇದರ ವೈಶಿಷ್ಟ್ಯ. ಕೊನೆಯಲ್ಲಿ ಕೊತ್ತಂಬರಿ ಸೊಪ್ಪು ಹಾಕಿ ಅಲಂಕರಿಸಿ ಬಡಿಸಬಹುದು.
