ಹೊಸದಿಗಂತ ಡಿಜಿಟಲ್ ಡೆಸ್ಕ್:
ಭಾರತದ ವಿಕೆಟ್ ಕೀಪರ್-ಬ್ಯಾಟ್ಸ್‌ಮನ್ ಹಾಗೂ ಕನ್ನಡಿಗ ಕೆಎಲ್ ರಾಹುಲ್, ಐಪಿಎಲ್‌ನಲ್ಲಿ ನಾಯಕತ್ವ ವಹಿಸುವುದು ಅಂತಾರಾಷ್ಟ್ರೀಯ ಕ್ರಿಕೆಟ್‌ಗಿಂತ ಮಾನಸಿಕವಾಗಿ ಮತ್ತು ದೈಹಿಕವಾಗಿ ಹೆಚ್ಚು ದಣಿವನ್ನು ಉಂಟುಮಾಡುತ್ತದೆ ಎಂಬ ಮಾಹಿತಿಯನ್ನು ಬಹಿರಂಗಪಡಿಸಿದ್ದಾರೆ. ನಿರಂತರವಾದ ಸಭೆಗಳು, ಅನೇಕ ಪ್ರಶ್ನೆಗಳು ಮತ್ತು ಫ್ರಾಂಚೈಸಿ ಮಾಲೀಕರಿಗೆ ತೀರ್ಮಾನಗಳ ವಿವರಗಳನ್ನು ನೀಡಬೇಕಾಗಿರುವ ಒತ್ತಡ, ಟೂರ್ನಿಯ ಕೆಲವೇ ವಾರಗಳಲ್ಲಿ ಆಟಗಾರರ ಮೇಲೆ ಅಪಾರವಾದ ಪ್ರಭಾವ ಬೀರಬಹುದು ಎಂದು ಅವರು ಸ್ಪಷ್ಟಪಡಿಸಿದ್ದಾರೆ.
ಐಪಿಎಲ್‌ನ 2024ರ ಸೀಸನ್‌ನಲ್ಲಿ ಸಂಭವಿಸಿದ ವಿವಾದದ ನಂತರ, ರಾಹುಲ್ ಮೇಲೆ ನಾಯಕತ್ವದ ಒತ್ತಡ ಹೇಗೆ ಪರಿಣಾಮ ಬೀರಿತ್ತು ಎಂಬುದು ಈಗ ಮತ್ತೊಮ್ಮೆ ಚರ್ಚೆಯಾಗಿದೆ. ವಿಶೇಷವಾಗಿ, ಲಖನೌ ಸೂಪರ್‌ ಜೈಂಟ್ಸ್‌ ಪರ ನಾಯಕತ್ವ ವಹಿಸಿದ್ದ ಸಂದರ್ಭದಲ್ಲಿ, ಪಂದ್ಯ ನಂತರ ನಡೆದ ತೀವ್ರ ವಾಗ್ವಾದವೇ ಈ ಒತ್ತಡದ ಸ್ಪಷ್ಟ ನಿದರ್ಶನ ಎಂದು ಅವರು ಹೇಳಿದ್ದಾರೆ.
ಯೂಟ್ಯೂಬ್ ಸಂದರ್ಶನದಲ್ಲಿ ಮಾತನಾಡಿದ ಅವರು, “ಐಪಿಎಲ್‌ನಲ್ಲಿ ನಾಯಕನಾಗಿರುವುದು ನಿರಂತರ ಪ್ರಶ್ನೆಗಳ ಹೊಡೆತಕ್ಕೆ ಸಿಲುಕುವಂತೆಯೇ. ಕ್ರೀಡಾ ಹಿನ್ನೆಲೆ ಇಲ್ಲದವರಿಗೆ ಪಂದ್ಯಗಳ ಸೂಕ್ಷ್ಮ ವಿಷಯಗಳನ್ನು ವಿವರಿಸುವುದು ಅತ್ಯಂತ ಕಷ್ಟ. ಕೆಲವೊಮ್ಮೆ ಇದನ್ನು ಕ್ರಿಮಿನಲ್ ವಿಚಾರಣೆಯಂತೆ ಅನುಭವಿಸುತ್ತಿದ್ದೆ,” ಎಂದು ಹೇಳಿದ್ದಾರೆ.
ಅಂತಾರಾಷ್ಟ್ರೀಯ ಕ್ರಿಕೆಟ್‌ನಲ್ಲಿ ಪರಿಸ್ಥಿತಿ ಸಂಪೂರ್ಣ ಬೇರೆಯಾದ್ದರಿಂದ, ಅಲ್ಲಿ ಕೋಚ್‌ಗಳು ಮತ್ತು ಆಯ್ಕೆದಾರರು ಆಟದ ಸೂಕ್ಷ್ಮತೆಗಳನ್ನು ತಿಳಿದಿರುವುದರಿಂದ ನಾಯಕತ್ವದ ಒತ್ತಡ ಕಡಿಮೆ ಇರುತ್ತದೆ ಎಂಬುದನ್ನೂ ರಾಹುಲ್ ಸ್ಪಷ್ಟಪಡಿಸಿದ್ದಾರೆ.
ಮೂರು ಋತುಗಳು ಲಖನೌ ತಂಡವನ್ನು ಮುನ್ನಡೆಸಿದ ನಂತರ, 2025ರ ಹರಾಜಿನಲ್ಲಿ ಅವರನ್ನು ದೆಹಲಿ ಕ್ಯಾಪಿಟಲ್ಸ್ 14 ಕೋಟಿಗೆ ಖರೀದಿಸಿತು. ನಾಯಕತ್ವ ನೀಡದಿದ್ದರೂ, ಡಿಸಿ ರಾಹುಲ್‌ನ್ನು 2026ರ ಐಪಿಎಲ್‌ಗೂ ರಿಟೇನ್ ಮಾಡಿಕೊಂಡಿದೆ.
