ಹೊಸದಿಗಂತ ಡಿಜಿಟಲ್ ಡೆಸ್ಕ್:
ಡಾಲರ್‌ ಎದುರು ರೂಪಾಯಿ ಮೌಲ್ಯ ಕುಸಿತಗೊಂಡಿದ್ದು, ಇಂದು ರೂಪಾಯಿ ಮೌಲ್ಯ 83 ಕ್ಕೆ ತಲುಪಿದೆ.
ಕರೆನ್ಸಿ ಮಾರುಕಟ್ಟೆಯ ಮುಕ್ತಾಯದ ವೇಳೆಗೆ, ರೂಪಾಯಿ 66 ಪೈಸೆ ಅಥವಾ ಶೇಕಡಾ 0.8 ರಷ್ಟು ಕುಸಿತದೊಂದಿಗೆ ಮೊದಲ ಬಾರಿಗೆ 83.02 ರೂಪಾಯಿಗೆ ಕೊನೆಗೊಂಡಿದೆ.
ಇದಕ್ಕೆ ಅಮೆರಿಕನ್‌ ಕರೆನ್ಸಿಯ ಪ್ರಾಬಲ್ಯ ಮತ್ತು ಹೂಡಿಕೆದಾರರ ನಿರುತ್ಸಾಹವೇ ಕಾರಣ ಎನ್ನಲಾಗ್ತಿದೆ. ಹಿಂದಿನ ವಹಿವಾಟಿನ ದಿನದಂದು ರೂಪಾಯಿ ಮೌಲ್ಯದಲ್ಲಿ 10 ಪೈಸೆ ಕುಸಿತ ಕಂಡು 82.39ಕ್ಕೆ ತಲುಪಿತ್ತು.
ಉಕ್ರೇನ್‌ನಲ್ಲಿ ಭೌಗೋಳಿಕ ರಾಜಕೀಯ ಅಪಾಯದ ಹೆಚ್ಚಳ, ಅಮೆರಿಕದ ಫೆಡ್ ಮತ್ತು ಬ್ಯಾಂಕ್ ಆಫ್ ಇಂಗ್ಲೆಂಡ್‌ನ ದರ ಹೆಚ್ಚಳ ಇವೆಲ್ಲವೂ ರೂಪಾಯಿ ಮೌಲ್ಯಕ್ಕೆ ಹೊಡೆತ ನೀಡುತ್ತಿವೆ.
ಇದಲ್ಲದೆ ಸಾಗರೋತ್ತರ ಮಾರುಕಟ್ಟೆಯಲ್ಲಿ ಅಮೇರಿಕನ್ ಕರೆನ್ಸಿಯ ಬಲ ಹೆಚ್ಚಾಗಿದೆ. ದೇಶೀಯ ಷೇರುಗಳ ಬಗ್ಗೆ ನಕಾರಾತ್ಮಕ ಪ್ರವೃತ್ತಿಯೂ ರೂಪಾಯಿ ಅಪಮೌಲ್ಯಕ್ಕೆ ಕಾರಣವಾಗಿದೆ ಎನ್ನಲಾಗುತ್ತಿದೆ.
