ಈ ದಿನಗಳಲ್ಲಿ ಚಿಯಾ ಬೀಜಗಳು ಸೂಪರ್ಫುಡ್ ಜಗತ್ತಿನ ಸ್ಟಾರ್ ಆಗಿ ಮಿಂಚುತ್ತಿವೆ. ಅವುಗಳ ಅಪಾರ ಪೌಷ್ಟಿಕಾಂಶದ ಕಾರಣದಿಂದ, ಅನೇಕ ಜನರು ಇದನ್ನು ತಮ್ಮ ಆಹಾರದಲ್ಲಿ ಸೇರಿಸಿಕೊಳ್ಳುತ್ತಿದ್ದಾರೆ. ಸ್ಮೂಥಿ, ಓಟ್ಸ್, ಅಥವಾ ಚಿಯಾ ಪುಡಿಂಗ್ ರೂಪದಲ್ಲಿ ಇದರ ಬಳಕೆ ಹೆಚ್ಚಾಗಿದೆ. ಈ ಬೀಜಗಳು ಒಮೆಗಾ-3 ಕೊಬ್ಬಿನಾಮ್ಲಗಳು, ಫೈಬರ್ ಮತ್ತು ಪ್ರಮುಖ ಪೋಷಕಾಂಶಗಳಿಂದ ಸಮೃದ್ಧವಾಗಿದ್ದು, ಆರೋಗ್ಯಕ್ಕೆ ಹಲವಾರು ಪ್ರಯೋಜನಗಳನ್ನು ನೀಡುತ್ತವೆ.
ಆದರೆ, ಯಾವುದೇ ಆಹಾರವಾದರೂ ಮಿತಿಯಲ್ಲಿ ಸೇವಿಸಿದರೆ ಮಾತ್ರ ಲಾಭ. ಚಿಯಾ ಬೀಜಗಳ ವಿಷಯದಲ್ಲೂ ಅಷ್ಟೇ! ಅಧ್ಯಯನಗಳ ಪ್ರಕಾರ, ನೀವು ಪ್ರತಿದಿನ 40-50 ಗ್ರಾಂ (ಸುಮಾರು 3-4 ಟೇಬಲ್ ಚಮಚ) ಗಿಂತ ಹೆಚ್ಚು ಚಿಯಾ ಬೀಜಗಳನ್ನು ಸೇವಿಸಿದರೆ, ದೇಹವು ಅವುಗಳಲ್ಲಿರುವ ಪೋಷಕಾಂಶಗಳನ್ನು ಸಂಪೂರ್ಣವಾಗಿ ಹೀರಿಕೊಳ್ಳಲು ಸಾಧ್ಯವಾಗುವುದಿಲ್ಲ. ಅಷ್ಟೇ ಅಲ್ಲದೆ, ಇದು ಕೆಲವು ಗಂಭೀರ ಆರೋಗ್ಯ ಸಮಸ್ಯೆಗಳಿಗೆ ಕಾರಣವಾಗಬಹುದು.
ಸೇವನೆಯಿಂದಾಗುವ ಅಡ್ಡಪರಿಣಾಮಗಳು:
- ಜೀರ್ಣಾಂಗವ್ಯೂಹದ ತೊಂದರೆಗಳು:
ಒಂದು ಟೇಬಲ್ ಚಮಚ (ಸುಮಾರು 12 ಗ್ರಾಂ) ಚಿಯಾ ಬೀಜಗಳಲ್ಲಿ ಸುಮಾರು 5 ಗ್ರಾಂ ಫೈಬರ್ ಇರುತ್ತದೆ. ಒಮ್ಮೆಗೆ 50 ಗ್ರಾಂ ಸೇವಿಸಿದರೆ, ದೇಹಕ್ಕೆ 20 ಗ್ರಾಂ ಫೈಬರ್ ಸಿಕ್ಕಂತಾಗುತ್ತದೆ. ಇದು ವಯಸ್ಕರ ದೈನಂದಿನ ಅಗತ್ಯಕ್ಕಿಂತ (25–30 ಗ್ರಾಂ) ತುಂಬಾ ಹೆಚ್ಚಾಗಿದ್ದು, ಜೀರ್ಣಾಂಗವ್ಯೂಹದ ಮೇಲೆ ಕೆಟ್ಟ ಪರಿಣಾಮ ಬೀರುತ್ತದೆ.
ಗ್ಯಾಸ್ ಮತ್ತು ಉಬ್ಬರ: ಒಮ್ಮೆಗೆ ಅತಿಯಾದ ಫೈಬರ್ ಸೇವನೆಯಿಂದ ಹೊಟ್ಟೆಯಲ್ಲಿ ಗ್ಯಾಸ್, ಉಬ್ಬುವುದು ಮತ್ತು ತೀವ್ರವಾದ ಹೊಟ್ಟೆ ನೋವು ಉಂಟಾಗಬಹುದು.
ಮಲಬದ್ಧತೆ ಅಥವಾ ಅತಿಸಾರ: ನೀವು ಕಡಿಮೆ ನೀರು ಕುಡಿದರೆ, ಚಿಯಾ ಬೀಜಗಳು ಹೊಟ್ಟೆಯಲ್ಲಿರುವ ನೀರನ್ನು ಹೀರಿಕೊಂಡು ಮಲವನ್ನು ಗಟ್ಟಿಯಾಗಿಸಿ, ಮಲಬದ್ಧತೆಯನ್ನು ಹೆಚ್ಚಿಸಬಹುದು. ಅದೇ ಹೆಚ್ಚು ನೀರು ಕುಡಿದರೂ, ಫೈಬರ್ ಹಠಾತ್ ಹೆಚ್ಚಳದಿಂದಾಗಿ ಅತಿಸಾರ ಉಂಟಾಗುವ ಸಾಧ್ಯತೆ ಇರುತ್ತದೆ.
- ರಕ್ತದೊತ್ತಡದ ಔಷಧಗಳೊಂದಿಗೆ ಪ್ರತಿಕ್ರಿಯೆ:
ಚಿಯಾ ಬೀಜಗಳು ಒಮೆಗಾ-3 ಕೊಬ್ಬಿನಾಮ್ಲಗಳು ಮತ್ತು ಪೊಟ್ಯಾಸಿಯಮ್ನಿಂದ ಸಮೃದ್ಧವಾಗಿವೆ. ರಕ್ತದೊತ್ತಡಕ್ಕೆ ಸಂಬಂಧಿಸಿದ ಔಷಧಿಗಳನ್ನು ಸೇವಿಸುವವರು ಇದನ್ನು ಅತಿಯಾಗಿ ತೆಗೆದುಕೊಂಡರೆ, ದೇಹದಲ್ಲಿ ಪೊಟ್ಯಾಸಿಯಮ್ ಮಟ್ಟವು ಹಠಾತ್ ಏರಿಕೆಯಾಗಬಹುದು. ಇದು ಹೈಪರ್ಕೆಲೆಮಿಯಾದಂತಹ ಅಪಾಯಕಾರಿ ಸ್ಥಿತಿಗೆ ಕಾರಣವಾಗಬಹುದು. - ಉಸಿರಾಟದ ಸಮಸ್ಯೆ ಮತ್ತು ಅಲರ್ಜಿ:
ಚಿಯಾ ಬೀಜಗಳನ್ನು ನೀರಿಲ್ಲದೆ ಸೇವಿಸಿದರೆ, ಅವು 1:10 ಅನುಪಾತದಲ್ಲಿ ಹಿಗ್ಗುತ್ತವೆ. ಇದರಿಂದ ಗಂಟಲಿನಲ್ಲಿ ಸಿಲುಕಿಕೊಂಡು ಉಸಿರಾಟಕ್ಕೆ ತೊಂದರೆ ಉಂಟುಮಾಡಬಹುದು. ಇದಲ್ಲದೆ, ಚಿಯಾ ಬೀಜಗಳಿಂದ ಅಲರ್ಜಿ ಇರುವವರಲ್ಲಿ ಬಾಯಿಯಲ್ಲಿ ಕೆಟ್ಟ ರುಚಿ, ತುರಿಕೆ ಮತ್ತು ದೇಹದ ಮೇಲೆ ದದ್ದುಗಳು ಕಾಣಿಸಿಕೊಳ್ಳಬಹುದು.
ಎಷ್ಟು ಸೇವಿಸಬೇಕು? ಸುರಕ್ಷಿತ ಮಾರ್ಗ ಯಾವುದು?
ವಯಸ್ಕರು ದಿನಕ್ಕೆ 1 ರಿಂದ 2 ಟೇಬಲ್ ಚಮಚ ಚಿಯಾ ಬೀಜಗಳನ್ನು ಸೇವಿಸುವುದು ಅತ್ಯಂತ ಸೂಕ್ತವಾಗಿದೆ.
ನೀವು ಹೆಚ್ಚು ಸೇವಿಸಲು ಬಯಸಿದರೆ, ದಿನಕ್ಕೆ 1 ಚಮಚದಿಂದ ಆರಂಭಿಸಿ, ಕ್ರಮೇಣ ಪ್ರಮಾಣವನ್ನು ಹೆಚ್ಚಿಸಿ.
ಚಿಯಾ ಬೀಜಗಳನ್ನು ಸೇವಿಸಿದಾಗ ದಿನಕ್ಕೆ ಕನಿಷ್ಠ 2 – 3 ಲೀಟರ್ ನೀರು ಕುಡಿಯಲು ಮರೆಯಬೇಡಿ. ಇದು ಫೈಬರ್ ಸರಿಯಾಗಿ ಜೀರ್ಣವಾಗಲು ಸಹಾಯ ಮಾಡುತ್ತದೆ.
ಚಿಯಾ ಬೀಜಗಳನ್ನು ಯಾವಾಗಲೂ ನೀರಿನಲ್ಲಿ ನೆನೆಸಿ ಅಥವಾ ಸಾಕಷ್ಟು ದ್ರವದೊಂದಿಗೆ ಬೆರೆಸಿ ಸೇವಿಸಿ.
