ಹೊಸದಿಗಂತ ಡಿಜಿಟಲ್‌ ಡೆಸ್ಕ್:
ಜಿ 20 ಶೃಂಗಸಭೆ ಹಿನ್ನೆಲೆಯಲ್ಲಿ ದೆಹಲಿಗೆ ಪಾರ್ಸೆಲ್ ಸೇವೆಯನ್ನು ಭಾರತೀಯ ರೈಲ್ವೆ ಇಲಾಖೆ ರದ್ದುಗೊಳಿಸಿದೆ. ಸೆಪ್ಟೆಂಬರ್ 10 ರವರೆಗೆ ಯಾವುದೇ ಸರಕು-ಸೇವೆ ರವಾನೆಯಾಗುವುದಿಲ್ಲ ಎಂದು ರೈಲ್ವೆ ತಿಳಿಸಿದೆ. ನವದೆಹಲಿ, ಹಳೇ ದೆಹಲಿ, ಹಜರತ್ ನಿಜಾಮುದ್ದೀನ್, ಆನಂದ್ ವಿಹಾರ್ ಟರ್ಮಿನಲ್ ಮತ್ತು ಸರಾಯ್ ರೋಹಿಲ್ಲಾ ಸೇರಿದಂತೆ ಹಲವಾರು ರೈಲು ನಿಲ್ದಾಣಗಳಲ್ಲಿ ನಿರ್ಬಂಧಗಳನ್ನು ವಿಧಿಸಲಾಗಿದೆ. ಈ ನಿಲ್ದಾಣಗಳಿಂದ ಹೊರಡುವ, ಕೊನೆಗೊಳ್ಳುವ ಪ್ಯಾಸೆಂಜರ್ ರೈಲು, ಗುತ್ತಿಗೆಯನ್ನು ಒಳಗೊಂಡಂತೆ ಯಾವುದೇ ಪಾರ್ಸೆಲ್ ಕೋಚ್‌ಗಳನ್ನು ಹೊಂದಿರುವುದಿಲ್ಲ. ಎಲ್ಲಾ ಪಾರ್ಸೆಲ್ ಕಾರ್ಗೋ ಎಕ್ಸ್‌ಪ್ರೆಸ್ ರೈಲುಗಳನ್ನು ಸಹ ರದ್ದುಗೊಳಿಸಲಾಗಿದೆ.
G20 ಶೃಂಗಸಭೆಯ ಭದ್ರತಾ ವ್ಯವಸ್ಥೆಗಳನ್ನು ಗಮನದಲ್ಲಿಟ್ಟುಕೊಂಡು, ಉತ್ತರ ರೈಲ್ವೆಯು ಸೆಪ್ಟೆಂಬರ್ 8 ರಿಂದ 10 ರವರೆಗೆ ದೆಹಲಿಯಲ್ಲಿ ಪಾರ್ಸೆಲ್ ವ್ಯಾನ್‌ಗಳ ಚಲನೆಯನ್ನು ನಿರ್ಬಂಧಿಸಿದೆ. ಜಿ20 ನಾಯಕರ ಶೃಂಗಸಭೆ ಸೆಪ್ಟೆಂಬರ್ 9-10ರವರೆಗೆ ನಡೆಯಲಿದೆ. ರೈಲು ನಿಲ್ದಾಣಗಳಿಂದ ಬರುವ ಸಂಚಾರಕ್ಕೂ ನಿರ್ಬಂಧ ಹೇರಲಾಗಿದೆ.
ಪಾರ್ಸೆಲ್ ಗೋದಾಮುಗಳು ಮತ್ತು ಪ್ಲಾಟ್‌ಫಾರ್ಮ್‌ಗಳಲ್ಲಿ ಯಾವುದೇ ಪಾರ್ಸೆಲ್ ಪ್ಯಾಕೇಜ್‌ಗಳು ಇರುವುದಿಲ್ಲ. ಭದ್ರತಾ ಕಾರಣಗಳಿಗಾಗಿ, ಸಮ್ಮೇಳನದ ಸಮಯದಲ್ಲಿ ಪ್ರಯಾಣಿಕರ ಬೋಗಿಗಳಲ್ಲಿ ವೈಯಕ್ತಿಕ ವಸ್ತುಗಳನ್ನು ಮಾತ್ರ ಅನುಮತಿಸಲಾಗುತ್ತದೆ. ಸಮಾವೇಶದ ವೇಳೆ ದೆಹಲಿಯಲ್ಲಿ ಬಿಗಿ ಭದ್ರತೆ ಏರ್ಪಡಿಸಲಾಗಿದೆ.
