ಹೊಸದಿಗಂತ ಡಿಜಿಟಲ್ ಡೆಸ್ಕ್:
ಸಿದ್ಧಾರ್ಥ್ ಮತ್ತು ಶರತ್‌ಕುಮಾರ್ ಪ್ರಮುಖ ಪಾತ್ರಗಳಲ್ಲಿ ಅಭಿನಯಿಸಿರುವ ‘3BHK’ ಚಿತ್ರವು ಇದೀಗ ಓಟಿಟಿ ರಿಲೀಸ್‌ಗೆ ಸಜ್ಜಾಗಿದೆ. ಜುಲೈ 4ರಂದು ಚಿತ್ರಮಂದಿರಗಳಲ್ಲಿ ಬಿಡುಗಡೆಯಾಗಿ ಪ್ರೇಕ್ಷಕರ ಮೆಚ್ಚುಗೆ ಪಡೆದ ಈ ಚಿತ್ರ ಇದೀಗ ಆಗಸ್ಟ್ 1ರಂದು ಅಮೆಜಾನ್ ಪ್ರೈಮ್ ವಿಡಿಯೋದಲ್ಲಿ ಪ್ರಸಾರವಾಗಲಿದೆ ಎಂದು ಚಿತ್ರತಂಡ ಅಧಿಕೃತವಾಗಿ ಘೋಷಿಸಿದೆ.
‘8 ತೋಟಕ್ಕಲ್’ ಮೂಲಕ ಗಮನ ಸೆಳೆದ ನಿರ್ದೇಶಕ ಶ್ರೀಗಣೇಶ್, ನಂತರ ‘ಕೃತಿ ಆಟಂ’ ಎಂಬ ಮಿಶ್ರ ಪ್ರತಿಕ್ರಿಯೆ ಪಡೆದ ಚಿತ್ರ ನೀಡಿದ್ದರೂ, ‘3BHK’ನಲ್ಲಿ ಮತ್ತೆ ತಮ್ಮ ನಿರ್ದೇಶನದ ಕೌಶಲ್ಯವನ್ನು ಮೆರೆದಿದ್ದಾರೆ. ಶಾಂತಿ ಟಾಕೀಸ್‌ ನಿರ್ಮಾಣ ಮಾಡಿರುವ ಈ ಚಿತ್ರವು ಮಧ್ಯಮ ವರ್ಗದ ಕುಟುಂಬದ ಬದುಕಿನ ಕಥೆಯನ್ನು ವಿವರಿಸುತ್ತದೆ.
ಚೆನ್ನೈನಂತಹ ನಗರದಲ್ಲಿ ಮನೆ ಖರೀದಿಸಲು ಹೋರಾಡುವ ಪಿತೃ ಪ್ರಧಾನ ಕುಟುಂಬ, ಆತನ ಕನಸು, ಆತನ ಪತ್ನಿಯ ಬೆಂಬಲ, ಮಕ್ಕಳ ಆಸೆ-ಆಕಾಂಕ್ಷೆಗಳನ್ನು ಈ ಚಿತ್ರ ಅತಿ ನೈಸರ್ಗಿಕ ರೀತಿಯಲ್ಲಿ ದಾಖಲಿಸಿದೆ. ಶರತ್‌ಕುಮಾರ್, ದೇವಯಾನಿ, ಯೋಗಿ ಬಾಬು, ಮೀತಾ ರಘುನಾಥ್ ಮತ್ತು ಚೈತ್ರಾ ಆಸರ್ ಪ್ರಮುಖ ಪಾತ್ರಗಳಲ್ಲಿ ಮಿಂಚಿದ್ದಾರೆ. ಶರತ್‌ಕುಮಾರ್ ಅವರ ಭಾವಪೂರ್ಣ ಅಭಿನಯ ಈ ಚಿತ್ರಕ್ಕೆ ಜೀವ ತಂದುಕೊಟ್ಟಿದೆ.
ಚಿತ್ರಕ್ಕೆ ಅಮೃತ್ ರಾಮನಾಥ್ ಸಂಗೀತ ಸಂಯೋಜನೆ ನೀಡಿದ್ದು, ದಿನೇಶ್ ಕೃಷ್ಣನ್ ಮತ್ತು ಜಿತಿನ್ ಸ್ಟಾನಿಸ್ಲಾಸ್ ಛಾಯಾಗ್ರಹಣವನ್ನು ನಿರ್ವಹಿಸಿದ್ದಾರೆ. ಕಥಾ ವಿಷಯ, ಮನಸ್ಸು ತಟ್ಟುವ ಸಂಕಷ್ಟಗಳು ಹಾಗೂ ಕುಟುಂಬದ ನಡುವಣ ಬಾಂಧವ್ಯ ಈ ಚಿತ್ರವನ್ನು ಜನಸಾಮಾನ್ಯರ ಮನಸ್ಸಿಗೆ ತಲುಪುವಂತೆ ಮಾಡಿದೆ.
ಮೂವಿ ಥಿಯೇಟರ್‌ನಲ್ಲಿ ಯಶಸ್ವಿಯಾಗಿ ಓಡಿದಂತೆ, ಓಟಿಟಿಯಲ್ಲಿಯೂ ಉತ್ತಮ ಸ್ಪಂದನೆ ಪಡೆಯಲಿದೆ ಎಂಬ ನಂಬಿಕೆಯಲ್ಲಿ ಚಿತ್ರತಂಡ ಇದೆ. ಸಿದ್ಧಾರ್ಥ್ ಅಭಿನಯದ ಈ ಭಾವನಾತ್ಮಕ ಕುಟುಂಬ ಕತೆ ನಾಳೆಯಿಂದ ನಿಮ್ಮ ಮನೆಯ ಪರದೆಯಲ್ಲೇ ಲಭ್ಯವಾಗಲಿದೆ.
