ಹೊಸದಿಗಂತ ಡಿಜಿಟಲ್ ಡೆಸ್ಕ್:
ಲಂಡನ್‌ನ ಕೆನ್ನಿಂಗ್ಟನ್ ಓವಲ್ ಮೈದಾನದಲ್ಲಿ ನಡೆಯುತ್ತಿರುವ ಭಾರತ ಹಾಗೂ ಇಂಗ್ಲೆಂಡ್ ನಡುವಿನ ಐದನೇ ಟೆಸ್ಟ್ ಪಂದ್ಯದಲ್ಲಿ ವಿಶೇಷ ಕ್ಷಣವೊಂದು ಕ್ರೀಡಾಭಿಮಾನಿಗಳ ಗಮನ ಸೆಳೆಯಿತು. ಟೀಮ್ ಇಂಡಿಯಾದ ವೇಗಿ ಮೊಹಮ್ಮದ್ ಸಿರಾಜ್ ಅವರು ವೈಟ್ ಹೆಡ್ ಬ್ಯಾಂಡ್ ಧರಿಸಿ ಬೌಲಿಂಗ್‌ಗೆ ಇಳಿದಿದ್ದು, ಇದರ ಹಿಂದೆ ಒಂದು ಮಹತ್ವದ ಕಾರಣವಿತ್ತು.
ಆಗಸ್ಟ್ 1ರಂದು ಇಂಗ್ಲೆಂಡ್‌ನ ದಿಗ್ಗಜ ಕ್ರಿಕೆಟಿಗ ಗ್ರಹಾಂ ತೋರ್ಪ್ ಅವರ 56ನೇ ಜನ್ಮದಿನದ ಸಂದರ್ಭದಂದು, ಅವರ ನೆನಪಿಗಾಗಿ ಇಂಗ್ಲಿಷ್ ಆಟಗಾರರು ತೋರ್ಪ್ ಲೋಗೋ ಇರುವ ವಿಶೇಷ ಹೆಡ್ ಬ್ಯಾಂಡ್ ಧರಿಸಿ ಮೈದಾನಕ್ಕಿಳಿದರು. ಇದಕ್ಕೆ ತಾತ್ಕಾಲಿಕವಾಗಿ ಭಾರತ ತಂಡದ ವೇಗಿ ಸಿರಾಜ್ ಕೂಡ ಸಾಥ್ ನೀಡಿ, ತಮ್ಮ ಹೆಡ್ ಬ್ಯಾಂಡ್‌ನ ಮೂಲಕ ತೋರ್ಪ್‌ಗೆ ಗೌರವ ಸಲ್ಲಿಸಿದರು. ಈ ಹೃದಯಸ್ಪರ್ಶಿ ನಡೆ ಸಾಮಾಜಿಕ ಜಾಲತಾಣಗಳಲ್ಲಿ ವ್ಯಾಪಕವಾಗಿ ವೈರಲ್ ಆಗಿದ್ದು, ಅಭಿಮಾನಿಗಳಿಂದ ಪ್ರಶಂಸೆಗಳು ಹರಿದುಬರುತ್ತಿವೆ.
ಗ್ರಹಾಂ ತೋರ್ಪ್ ಇಂಗ್ಲೆಂಡ್ ಪರ 182 ಪಂದ್ಯಗಳಲ್ಲಿ ಪ್ರತಿಷ್ಠಿತ ಕ್ರಿಕೆಟ್ ವೃತ್ತಿ ನಡೆಸಿದ ವ್ಯಕ್ತಿಯಾಗಿದ್ದು, ಅವರು 2024ರ ಆಗಸ್ಟ್ 4ರಂದು ನಿಧನರಾದರು. ತೋರ್ಪ್ ಪ್ರಾಯೋಗಿಕ ಜೀವನದಲ್ಲಿ ಪ್ರತಿಯೊಮ್ಮೆ ಮೈದಾನಕ್ಕಿಳಿದಾಗ ವೈಟ್ ಹೆಡ್ ಬ್ಯಾಂಡ್ ಧರಿಸುವ ಶೈಲಿ ಹೊಂದಿದ್ದರು. ಇದೇ ಶೈಲಿಯನ್ನು ಸಿರಾಜ್ ಮುಂದುವರೆಸಿದ ರೀತಿಯು ಸ್ಪೋರ್ಟ್‌ಸ್ಮಾನ್ ಸ್ಪಿರಿಟ್‌ನ ಪ್ರತೀಕವಾಗಿತ್ತು.
ಪಂದ್ಯದ ಪರಿಸ್ಥಿತಿಗೆ ಬಂದರೆ, ಟಾಸ್ ಗೆದ್ದ ಇಂಗ್ಲೆಂಡ್ ಮೊದಲು ಬೌಲಿಂಗ್ ಆಯ್ಕೆ ಮಾಡಿಕೊಂಡು, ಭಾರತವನ್ನು 224 ರನ್‌ಗೆ ಆಲೌಟ್ ಮಾಡಿತು. ಪ್ರತಿಯಾಗಿ ಇಂಗ್ಲೆಂಡ್ 247 ರನ್ ಗಳಿಸಿ 23 ರನ್‌ಗಳ ಮುನ್ನಡೆ ಪಡೆದುಕೊಂಡಿತು. ತದನಂತರದ ದ್ವಿತೀಯ ಇನಿಂಗ್ಸ್‌ನಲ್ಲಿ ಭಾರತ ದಿನದ ಅಂತ್ಯಕ್ಕೆ 2 ವಿಕೆಟ್ ನಷ್ಟದಲ್ಲಿ 75 ರನ್ ಗಳಿಸಿದೆ.
