ಹೊಸದಿಗಂತ ಡಿಜಿಟಲ್ ಡೆಸ್ಕ್:
ಟೀಮ್ ಇಂಡಿಯಾ ಇಂಗ್ಲೆಂಡ್ ಪ್ರವಾಸವನ್ನು ಶ್ರೇಷ್ಠ ಗೆಲುವಿನೊಂದಿಗೆ ಅಂತ್ಯಗೊಳಿಸಿದೆ. ಓವಲ್‌ನ ಐದನೇ ಹಾಗೂ ಕೊನೆಯ ಟೆಸ್ಟ್ ಪಂದ್ಯದಲ್ಲಿ ಆತಿಥೇಯ ಇಂಗ್ಲೆಂಡ್ ತಂಡವನ್ನು ಕೇವಲ 6 ರನ್‌ಗಳಿಂದ ಮಣಿಸಿ, 5 ಪಂದ್ಯಗಳ ಸರಣಿಯನ್ನು 2-2ರಲ್ಲಿ ಸಮಬಲಗೊಳಿಸಿ ಟೀಮ್ ಇಂಡಿಯಾ ಐತಿಹಾಸಿಕ ಹೋರಾಟವನ್ನು ತೋರಿದೆ.
374 ರನ್ ಗುರಿಯತ್ತ ಬೆನ್ನಟ್ಟುತ್ತಿದ್ದ ಇಂಗ್ಲೆಂಡ್ ತಂಡ ಅಂತಿಮ ದಿನದ ಆರಂಭಕ್ಕೆ 4 ವಿಕೆಟ್ ಕೈಯಲ್ಲಿಟ್ಟು ಕೇವಲ 35 ರನ್ ಅಗತ್ಯವಿದ್ದರೂ, ಭಾರತೀಯ ಬೌಲರ್‌ಗಳ ದಾಳಿಗೆ ತತ್ತರಿಸಿ 367 ರನ್‌ಗೆ ಆಲೌಟ್ ಆಯಿತು. ಸಿರಾಜ್ ಹಾಗೂ ಪ್ರಸಿದ್ಧ್ ಕೃಷ್ಣ ಅವರ ಅದ್ಭುತ ದಾಳಿಗೆ ಪ್ರತಿರೋಧ ನೀಡಲಾಗದೇ ಇಂಗ್ಲೆಂಡ್ ಮುಖಭಂಗ ಅನುಭವಿಸಿತು.
ಪಂದ್ಯದ ನಂತರ ಮಾತನಾಡಿದ ಇಂಗ್ಲೆಂಡ್ ನಾಯಕ ಬೆನ್ ಸ್ಟೋಕ್ಸ್, ಮೊದಲ ದಿನವೇ ಕ್ರಿಸ್ ವೋಕ್ಸ್ ಗಾಯಗೊಂಡು ಬೌಲಿಂಗ್‌ಗೆ ಸಿಗದಿರುವುದೇ ನಮ್ಮ ಗೆಲುವಿಗೆ ಅಡ್ಡಿಯಾಗಿದ್ದು, ವೋಕ್ಸ್ ಇದ್ದಿದ್ರೆ ನಾವು ಮ್ಯಾಚ್ ಸೋಲುತ್ತಿರಲಿಲ್ಲ ಎಂದು ವಿಷಾದ ವ್ಯಕ್ತಪಡಿಸಿದರು. “ಗಾಯಗೊಂಡು ಒಂದೇ ಕೈಯಲ್ಲಿ ಬ್ಯಾಟಿಂಗ್ ಮಾಡಲು ಬಂದ ವೋಕ್ಸ್ ಅವರ ಸಮರ್ಪಣಾ ಭಾವನೆ ಮರೆಯಲಾಗದ ಘಟನೆಯಾಗಿದೆ,” ಎಂದರು.
ಅಂತಿಮ ಟೆಸ್ಟ್ ನಲ್ಲಿ ಆಡಲಾರದ ದುರದೃಷ್ಟವನ್ನು ವ್ಯಕ್ತಪಡಿಸಿದ ಸ್ಟೋಕ್ಸ್, “ಈ ಪಂದ್ಯ ಐದು ದಿನಗಳ ಕಾಲ ತೀವ್ರ ಹೋರಾಟದ ನಡುವೆ ನಡೆಯಿತು. ಎರಡೂ ತಂಡಗಳ ಆಟಗಾರರು ತಮ್ಮ ಶಕ್ತಿ ಮೀರಿ ಆಡಿದರು. ಗೆಲುವು ಕೈ ತಪ್ಪಿದ್ದು ನಿರಾಶೆ ತಂದರೂ, ತಂಡದ ಪ್ರದರ್ಶನದ ಬಗ್ಗೆ ನನಗೆ ಹೆಮ್ಮೆ ಇದೆ,” ಎಂದರು.
ಇಡೀ ಸರಣಿಯ ತೀವ್ರ ಹೋರಾಟದ ನಡುವೆ ಈ ಗೆಲುವು ಟೀಮ್ ಇಂಡಿಯಾದ ಆತ್ಮವಿಶ್ವಾಸ ಹೆಚ್ಚಿಸಿದೆ. ಸರಣಿಯ ಎಲ್ಲಾ ಪಂದ್ಯಗಳು ಭಿನ್ನಮಟ್ಟದ ತಿರುವುಗಳನ್ನು ಪಡೆದರೂ, ಕೊನೆಯ ಪಂದ್ಯವು ಅತ್ಯಂತ ರೋಚಕವಾಗಿ ಪರಿಗಣಿತವಾಗಿದೆ. ಮುಂದಿನ ಆಶಸ್ ಸರಣಿಗೆ ಸಿದ್ಧರಾಗಲು ಇಂಗ್ಲೆಂಡ್ ಈಗ ಪುನಶ್ಚೇತನಗೊಳ್ಳಬೇಕಿದೆ.
