ಇಂದಿನ ಉದ್ಯೋಗ ಜೀವನದಲ್ಲಿ ಹಲವರು ಗಂಟೆಗಟ್ಟಲೇ ಒಂದೇ ಸ್ಥಳದಲ್ಲಿ ಕುಳಿತು ಕೆಲಸ ಮಾಡುತ್ತಾರೆ. ಇದು ದೇಹದ ಆರೋಗ್ಯಕ್ಕೆ ತೀವ್ರ ಹಾನಿ ಉಂಟುಮಾಡುವ ಸಾಧ್ಯತೆಯಿದೆ. ವೈದ್ಯಕೀಯವಾಗಿ “ಡೆಡ್ ಬಟ್ ಸಿಂಡ್ರೋಮ್” (Dead Butt Syndrome – DBS) ಎಂದು ಕರೆಯಲಾಗುವ ಸಮಸ್ಯೆ ಇಂತಹ ಜೀವನಶೈಲಿಯಿಂದಲೇ ಉಂಟಾಗುತ್ತದೆ. ದೀರ್ಘಕಾಲ ಒಂದೇ ಭಂಗಿಯಲ್ಲಿ ಕುಳಿತಿರುವುದರಿಂದ ಸೊಂಟದ ಸ್ನಾಯುಗಳು ಕೆಲಸ ಮಾಡುವುದನ್ನು ಮರೆತುಬಿಡುತ್ತವೆ ಮತ್ತು ಹಲವು ರೀತಿಯ ಆರೋಗ್ಯ ತೊಂದರೆಗಳನ್ನು ಉಂಟುಮಾಡುತ್ತವೆ.
ಲಕ್ಷಣಗಳು
ಡೆಡ್ ಬಟ್ ಸಿಂಡ್ರೋಮ್‌ನ ಪ್ರಮುಖ ಲಕ್ಷಣಗಳು ಗಮನಿಸಬೇಕಾದಷ್ಟು ಗಂಭೀರವಾಗಿರುತ್ತವೆ. ಬೆನ್ನು ಹಾಗೂ ಮೊಣಕಾಲುಗಳಲ್ಲಿ ತೀವ್ರ ನೋವು, ಹಿಪ್ ಸ್ಟ್ರೈನ್, ಸೊಂಟದ ಕೆಳಗಿನ ಭಾಗದಲ್ಲಿ ಜುಮ್ಮೆನಿಸುವಿಕೆ, ಸೊಂಟದ ಸುತ್ತಲೂ ಮರಗಟ್ಟುವಿಕೆ ಮತ್ತು ಸುಡುವಿಕೆಯಂತಹ ಸಮಸ್ಯೆಗಳು ಕಾಣಿಸಿಕೊಳ್ಳುತ್ತವೆ.
ಪರಿಹಾರ ಕ್ರಮಗಳು
ಲಿಫ್ಟ್‌ ಬಳಸದೆ ಮೆಟ್ಟಿಲುಗಳನ್ನು ಬಳಸುವುದು ಒಳಿತು.
ಪ್ರತಿ 30–45 ನಿಮಿಷಗಳಿಗೊಮ್ಮೆ ಎದ್ದು ಸ್ವಲ್ಪ ಓಡಾಡುವುದು ಆರೋಗ್ಯಕರ.
ಕಾಲುಗಳನ್ನು ಚಾಚಿಕೊಂಡು ಕುಳಿತುಕೊಳ್ಳುವುದು ಪ್ರಯೋಜನಕಾರಿ.
ಪ್ರತಿದಿನ ಕನಿಷ್ಠ ಅರ್ಧಗಂಟೆ ನಡೆಯುವ ಅಭ್ಯಾಸ ಮಾಡಿಕೊಳ್ಳಬೇಕು.
ಕಚೇರಿಯಲ್ಲಿಯೇ ಸಮಯ ಸಿಕ್ಕಾಗ ಹಗುರವಾಗಿ ನಡೆಯುವುದರಿಂದ ಸಹ ಲಾಭ ದೊರೆಯುತ್ತದೆ.
ಡೆಡ್ ಬಟ್ ಸಿಂಡ್ರೋಮ್ ನಮ್ಮ ಜೀವನಶೈಲಿಯ ಕಾರಣದಿಂದಲೇ ಉಂಟಾಗುವ ತೊಂದರೆ. ಆದರೆ ಜಾಗ್ರತೆಯಿಂದ ನಡೆದುಕೊಂಡರೆ ಮತ್ತು ಸಣ್ಣಪುಟ್ಟ ಅಭ್ಯಾಸಗಳನ್ನು ಜೀವನದಲ್ಲಿ ಅಳವಡಿಸಿಕೊಂಡರೆ ಈ ಸಮಸ್ಯೆಯನ್ನು ಸಂಪೂರ್ಣವಾಗಿ ತಪ್ಪಿಸಿಕೊಳ್ಳಬಹುದು. ಆರೋಗ್ಯಕರ ದೇಹಕ್ಕಾಗಿ ಚಟುವಟಿಕೆಯಿಂದ ಇರುವ ಜೀವನಶೈಲಿ ಅಗತ್ಯ.
