ಪ್ರಕೃತಿಯ ಅದ್ಭುತಗಳಲ್ಲಿ ಮಳೆಯೂ ಒಂದು. ಕೆಲವರಿಗೆ ಮಳೆ ಎಂದರೆ ಕಿರಿಕಿರಿ, ಆದರೆ ಇನ್ನು ಕೆಲವರಿಗೆ ಮಳೆ ಹನಿಗಳೇ ಸಂಭ್ರಮ. ಮಳೆಯನ್ನು ಅತಿಯಾಗಿ ಪ್ರೀತಿಸುವವರನ್ನು ಮನೋವಿಜ್ಞಾನದ ಭಾಷೆಯಲ್ಲಿ ‘ಪ್ಲುವಿಯೋಫೈಲ್’ ಎನ್ನಲಾಗುತ್ತದೆ. ಸಂಶೋಧನೆಗಳ ಪ್ರಕಾರ, ಮಳೆಯನ್ನು ಆನಂದಿಸುವ ವ್ಯಕ್ತಿಗಳ ಗುಣಲಕ್ಷಣಗಳು ತುಂಬಾ ಆಸಕ್ತಿದಾಯಕವಾಗಿರುತ್ತವೆ.
ಮಳೆಯನ್ನು ಇಷ್ಟಪಡುವವರು ಸಾಮಾನ್ಯವಾಗಿ ಅಂತರ್ಮುಖಿಗಳಾಗಿರುತ್ತಾರೆ. ಮಳೆ ಬೀಳುವಾಗ ಕಿಟಕಿಯ ಪಕ್ಕ ಕುಳಿತು ಗಂಟೆಗಟ್ಟಲೆ ಆಲೋಚಿಸುವುದು ಅವರಿಗೆ ಇಷ್ಟ. ಇವರು ಜೀವನದ ಸಣ್ಣ ಸಣ್ಣ ವಿಚಾರಗಳಲ್ಲೂ ಅರ್ಥ ಹುಡುಕುತ್ತಾರೆ.
ಮಳೆಯ ಶಬ್ದವು ಅವರ ಮೆದುಳಿಗೆ ಒಂದು ರೀತಿಯ ಮೆಲೋಡಿಯಂತೆ ಕೇಳಿಸುತ್ತದೆ. ಇದು ಅವರ ಮಾನಸಿಕ ಒತ್ತಡವನ್ನು ಕಡಿಮೆ ಮಾಡಿ, ಮನಸ್ಸನ್ನು ಪ್ರಶಾಂತವಾಗಿಡಲು ಸಹಾಯ ಮಾಡುತ್ತದೆ. ಇವರು ಕಷ್ಟದ ಸಮಯದಲ್ಲಿಯೂ ತಾಳ್ಮೆ ಕಳೆದುಕೊಳ್ಳುವುದಿಲ್ಲ.
ಮಳೆ ಪ್ರೇಮಿಗಳಲ್ಲಿ ಸೃಜನಶೀಲತೆ ಹೆಚ್ಚು. ಮಳೆಯ ವಾತಾವರಣವು ಅವರಲ್ಲಿ ಹೊಸ ಆಲೋಚನೆಗಳನ್ನು ಹುಟ್ಟುಹಾಕುತ್ತದೆ. ಅನೇಕ ಬರಹಗಾರರು, ಕಲಾವಿದರು ಮತ್ತು ಕವಿಗಳು ಮಳೆಯಿಂದಲೇ ಸ್ಫೂರ್ತಿ ಪಡೆಯುತ್ತಾರೆ.
ಇವರು ಹಳೆಯ ನೆನಪುಗಳನ್ನು ಮೆಲುಕು ಹಾಕಲು ಇಷ್ಟಪಡುತ್ತಾರೆ. ಮಣ್ಣಿನ ವಾಸನೆ ಇವರಿಗೆ ಬಾಲ್ಯದ ಸವಿನೆನಪುಗಳನ್ನು ತರುತ್ತದೆ. ಇವರು ಸಂಬಂಧಗಳಿಗೆ ಹೆಚ್ಚು ಬೆಲೆ ನೀಡುವ ವ್ಯಕ್ತಿಗಳಾಗಿರುತ್ತಾರೆ.
ಮಳೆ ಬರುವಾಗ ಎಲ್ಲವೂ ಶುದ್ಧವಾದಂತೆ ಇವರಿಗೆ ಭಾಸವಾಗುತ್ತದೆ. ಬದುಕಿನ ಕಷ್ಟಗಳನ್ನು ಮಳೆಯಂತೆ ಸುರಿದು ಹೋಗುವ ತಾತ್ಕಾಲಿಕ ಘಟನೆಗಳೆಂದು ಇವರು ಪರಿಗಣಿಸುತ್ತಾರೆ.
