ನವಮಂಗಳೂರು ಬಂದರಿಗೆ ಆಗಮಿಸಿದ ಕ್ರೂಸ್‌ ಹಡಗು: ಪ್ರವಾಸಿಗರಿಗೆ ಸಿಕ್ಕಿತು ಅದ್ದೂರಿ ಸ್ವಾಗತ

ಹೊಸದಿಗಂತ ವರದಿ, ಮಂಗಳೂರು:

ನವಮಂಗಳೂರು ಬಂದರಿಗೆ ಈ ಋತುವಿನ 5ನೇ ಕ್ರೂಸ್‌ ಮಂಗಳವಾರ ಆಗಮನವಾಗಿದ್ದು, ನವ ಮಂಗಳೂರು ಬಂದರು ಪ್ರಾಧಿಕಾರದ ವತಿಯಿಂದ ಪ್ರವಾಸಿಗರನ್ನು ಸ್ವಾಗತಿಸಲಾಯಿತು.

ಈ ಋತುವಿನ ಅಂತಿಮ ಕ್ರೂಸ್

ಪ್ರಸ್ತುತ ಕ್ರೂಸ್ ಋತುವಿನ ಐದನೇ ಮತ್ತು ಅಂತಿಮ ಕ್ರೂಸ್ ಹಡಗು ಎಂ.ಎಸ್‌. ಸೆವೆನ್ ಸೀಸ್ ನ್ಯಾವಿಗೇಟರ್ ಆಗಮಿಸಿದೆ. ನಾರ್ವೇಜಿಯನ್ ಕ್ರೂಸ್ ಲೈನ್ ನಿರ್ವಹಿಸುವ ಬಹಮಾಸ್ ಧ್ವಜವನ್ನು ಹೊಂದಿರುವ ಐಷಾರಾಮಿ ಕ್ರೂಸ್ ಹಡಗು ಇದಾಗಿದೆ.

427 ಪ್ರಯಾಣಿಕರು ಆಗಮನ

ಮಾಲೆ, ಕೊಚ್ಚಿನ್, ಮಂಗಳೂರು, ಗೋವಾ ಮತ್ತು ಮುಂಬೈಗಳನ್ನು ಸಂಪರ್ಕಿಸುವ ಅಂತಾರಾಷ್ಟ್ರೀಯ ಕ್ರೂಸ್ ಪ್ರಯಾಣದ ಭಾಗವಾಗಿ 427 ಪ್ರಯಾಣಿಕರು ಮತ್ತು 372 ಸಿಬ್ಬಂದಿಯೊಂದಿಗೆ ನವ ಮಂಗಳೂರು ಬಂದರಿಗೆ ಆಗಮಿಸಿತು.

ಸಾಂಪ್ರದಾಯಿಕ ಸ್ವಾಗತ

ಬಂದರು ನಗರಕ್ಕೆ ಭೇಟಿ ನೀಡಿದ ಸಂದರ್ಭದಲ್ಲಿ ಕ್ರೂಸ್ ಅತಿಥಿಗಳಿಗಾಗಿ ಎನ್‌ಎಂಪಿಎ ವತಿಯಿಂದ ಸಾಂಪ್ರದಾಯಿಕ ಸಾಂಸ್ಕೃತಿಕ ಸ್ವಾಗತ, ಪ್ರವಾಸೋದ್ಯಮ ಸೌಲಭ್ಯ ವ್ಯವಸ್ಥೆಗಳು, ದೃಶ್ಯವೀಕ್ಷಣೆಯ ಪ್ರವಾಸಗಳು ಮತ್ತು ಮಾರ್ಗದರ್ಶನಗಳನ್ನು ವ್ಯವಸ್ಥೆ ಮಾಡಲಾಯಿತು.

ಎಂ.ಎಸ್. ಸೆವೆನ್ ಸೀಸ್ ನ್ಯಾವಿಗೇಟರ್ ಆಗಮನದೊಂದಿಗೆ, ನವ ಮಂಗಳೂರು ಬಂದರು ಪ್ರಾಧಿಕಾರ ಪ್ರಸ್ತುತ ಕ್ರೂಸ್ ಪ್ರವಾಸೋದ್ಯಮ ಋತುವನ್ನು ಒಟ್ಟು 5 ಕ್ರೂಸ್ ಹಡಗುಗಳು ಮತ್ತು 2,079 ಕ್ರೂಸ್ ಪ್ರಯಾಣಿಕರನ್ನು ಈ ಋತುವಿನಲ್ಲಿ ನಿರ್ವಹಿಸಿದೆ.