ಹೊಸದಿಗಂತ ಡಿಜಿಟಲ್ ಡೆಸ್ಕ್:
ಅಮೆರಿಕ ಮತ್ತು ಇರಾನ್ ನಡುವಿನ ಸುದೀರ್ಘ 109 ದಿನಗಳ ಸಂಘರ್ಷಕ್ಕೆ ಕೊನೆಗೂ ತೆರೆ ಬಿದ್ದಿದೆ. ಉಭಯ ದೇಶಗಳ ನಡುವೆ ಐತಿಹಾಸಿಕ ಶಾಂತಿ ಒಪ್ಪಂದ ಏರ್ಪಟ್ಟ ಬೆನ್ನಲ್ಲೇ, ಜಾಗತಿಕವಾಗಿ ಅತ್ಯಂತ ಕ್ರಾಂತಿಕಾರಕ ಬದಲಾವಣೆಗಳು ಕಂಡುಬರುತ್ತಿವೆ. ಪ್ರಮುಖವಾಗಿ, ಇರಾನ್ ಮೇಲಿನ ಅಮೆರಿಕದ ದಿಗ್ಬಂಧನಗಳು ತೆರವಾಗಿದ್ದು, ವ್ಯೂಹಾತ್ಮಕ ಹಾರ್ಮುಜ್ ಜಲಸಂಧಿಯಲ್ಲಿ ಹಡಗುಗಳ ಸಂಚಾರವು ಮತ್ತೆ ಬಿರುಸಿನಿಂದ ಆರಂಭಗೊಂಡಿದೆ. ಗ್ಯಾಸ್ ಮತ್ತು ಕಚ್ಚಾತೈಲ ತುಂಬಿದ ಟ್ಯಾಂಕರ್ಗಳು ನಿರಾತಂಕವಾಗಿ ವಿವಿಧ ದೇಶಗಳತ್ತ ಪ್ರಯಾಣ ಬೆಳೆಸುತ್ತಿವೆ.
ಸದ್ಯ ಹಾರ್ಮುಜ್ ಮೂಲಕ ಭಾರತಕ್ಕೆ ಒಟ್ಟು 28 ಬೃಹತ್ ಹಡಗುಗಳು ಆಗಮಿಸುತ್ತಿವೆ. ಇದರಿಂದಾಗಿ ದೇಶೀಯ ಮಾರುಕಟ್ಟೆಯಲ್ಲಿ ಪೆಟ್ರೋಲ್, ಡೀಸೆಲ್, ಸಿಎನ್ಜಿ (CNG) ಮತ್ತು ಎಲ್ಪಿಜಿ (LPG) ಅನಿಲದ ದರದಲ್ಲಿ ಗಮನಾರ್ಹ ಇಳಿಕೆಯಾಗುವ ದಟ್ಟ ನಿರೀಕ್ಷೆ ಇದೆ.
ಕುಸಿದ ಕಚ್ಚಾತೈಲ ದರ ಮತ್ತು ಜಾಗತಿಕ ಪರಿಣಾಮ:
ಈ ಶಾಂತಿ ಒಪ್ಪಂದದ ಪರಿಣಾಮವಾಗಿ ಜಾಗತಿಕ ತೈಲ ಮಾರುಕಟ್ಟೆಯಲ್ಲಿ ಕಚ್ಚಾತೈಲದ ಬೆಲೆ ಪ್ರತಿ ಬ್ಯಾರೆಲ್ಗೆ 78 ಡಾಲರ್ಗೆ ಕುಸಿದಿದೆ. ಇದು ಕಳೆದ ಮೂರು ತಿಂಗಳಲ್ಲೇ ದಾಖಲಾದ ಕನಿಷ್ಠ ದರವಾಗಿದೆ. ಅತ್ತ ಅಮೆರಿಕದಲ್ಲೂ ಕೂಡ ಪ್ರತಿ ಗ್ಯಾಲನ್ ಗ್ಯಾಸ್ ಬೆಲೆಯಲ್ಲಿ 4 ಡಾಲರ್ಗಳಷ್ಟು ಇಳಿಕೆಯಾಗಿದೆ. ಹಾರ್ಮುಜ್ ಜಲಸಂಧಿ ಬಂದ್ ಆಗಿದ್ದಾಗ ಇಡೀ ವಿಶ್ವವೇ ಎದುರಿಸಿದ್ದ ಇಂಧನ ಬಿಕ್ಕಟ್ಟು ಈಗ ತಿಳಿಯಾಗಿದೆ.
ಜಿ7 ಶೃಂಗಸಭೆಯಲ್ಲಿ ಮುದ್ರೆ ಮತ್ತು ಜಿನೇವಾ ಕಾರ್ಯಕ್ರಮ:
ಫ್ರಾನ್ಸ್ನಲ್ಲಿ ನಡೆದ ಜಿ7 ಶೃಂಗಸಭೆಯಲ್ಲಿ ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಮತ್ತು ಇರಾನ್ ಅಧ್ಯಕ್ಷ ಮಸೂದ್ ಪೆಜಸ್ಕಿಯನ್ ಅವರು ಈ ಒಪ್ಪಂದಕ್ಕೆ ಸಹಿ ಹಾಕಿದ್ದಾರೆ. ಇದರ ಅಧಿಕೃತ ಸಹಿ ಕಾರ್ಯಕ್ರಮವು ನಾಳೆ ಸ್ವಿಟ್ಜರ್ಲೆಂಡ್ನ ಜಿನೇವಾದಲ್ಲಿ ನಡೆಯಲಿದೆ. ಈ ಕುರಿತು ಪ್ರಸ್ತಾಪಿಸಿರುವ ಟ್ರಂಪ್, “ಇದು 2015 ರಲ್ಲಿ ಒಬಾಮಾ ಮಾಡಿಕೊಂಡಿದ್ದ ಒಪ್ಪಂದಕ್ಕಿಂತ ಅತ್ಯಂತ ಉತ್ತಮವಾಗಿದೆ” ಎಂದು ಬಣ್ಣಿಸಿದ್ದಾರೆ. ಸದ್ಯ ಇರಾನ್ನ 11 ಹಡಗುಗಳು ಈಗಾಗಲೇ ಸಂಚಾರ ಆರಂಭಿಸಿದ್ದು, ಜಾಗತಿಕ ತೈಲ ಪೂರೈಕೆ ಸುಗಮವಾಗಿದೆ.
