ಹೊಸದಿಗಂತ ಡಿಜಿಟಲ್ ಡೆಸ್ಕ್:
‘ಆರ್ಆರ್ಆರ್’ ಚಿತ್ರದ ಅಭೂತಪೂರ್ವ ಜಾಗತಿಕ ಯಶಸ್ಸಿನ ನಂತರ, ದಕ್ಷಿಣ ಭಾರತದ ಹೆಮ್ಮೆಯ ನಿರ್ದೇಶಕ ಎಸ್ಎಸ್ ರಾಜಮೌಳಿ ಹಾಗೂ ಸೂಪರ್ಸ್ಟಾರ್ ಮಹೇಶ್ ಬಾಬು ಕಾಂಬಿನೇಷನ್ನ ‘ವಾರಣಾಸಿ’ ಸಿನಿಮಾ ಭಾರತೀಯ ಚಿತ್ರರಂಗದಲ್ಲಿ ಭಾರಿ ಕುತೂಹಲ ಮೂಡಿಸಿದೆ. ಇತ್ತೀಚೆಗೆ ನಡೆದ ‘ಆರ್ಆರ್ಆರ್’ ವಿಶೇಷ ಪ್ರದರ್ಶನದಲ್ಲಿ ರಾಜಮೌಳಿ ಅವರು ಈ ಬಹುನಿರೀಕ್ಷಿತ ಚಿತ್ರದ ಶೂಟಿಂಗ್ ಪ್ರಗತಿಯ ಬಗ್ಗೆ ಮಹತ್ವದ ಮಾಹಿತಿಯನ್ನು ಹಂಚಿಕೊಂಡಿದ್ದಾರೆ.
ಮುಕ್ತಾಯಗೊಂಡ ಸಾಹಸ ಸನ್ನಿವೇಶಗಳು
ಚಿತ್ರದ ಪ್ರಮುಖ ಆಕರ್ಷಣೆಯಾಗಿರುವ ಭೀಕರ ಮತ್ತು ಹೈ-ವೋಲ್ಟೇಜ್ ಆಕ್ಷನ್ ದೃಶ್ಯಗಳ ಚಿತ್ರೀಕರಣ ಈಗಾಗಲೇ ಯಶಸ್ವಿಯಾಗಿ ಪೂರ್ಣಗೊಂಡಿದೆ ಎಂದು ರಾಜಮೌಳಿ ತಿಳಿಸಿದ್ದಾರೆ. ಸದ್ಯಕ್ಕೆ ಸಿನಿಮಾದ ಕೇವಲ ಟಾಕಿ (ಮಾತುಕತೆ) ಭಾಗಗಳು ಮಾತ್ರ ಬಾಕಿ ಉಳಿದಿವೆ.
80 ದಿನಗಳ ಶೂಟಿಂಗ್ ಬಾಕಿ
ಸಾಮಾನ್ಯವಾಗಿ ಇಂದಿನ ದಿನಗಳಲ್ಲಿ 60 ರಿಂದ 70 ದಿನಗಳಲ್ಲಿ ಒಂದು ಇಡೀ ಬಿಗ್ ಬಜೆಟ್ ಸಿನಿಮಾವನ್ನೇ ಮುಗಿಸಬಹುದು. ಆದರೆ ರಾಜಮೌಳಿ ಅವರು ಕೇವಲ ಬಾಕಿ ಇರುವ ಟಾಕಿ ಭಾಗದ ಚಿತ್ರೀಕರಣಕ್ಕಾಗಿಯೇ ಬರೋಬ್ಬರಿ 80 ದಿನಗಳನ್ನು ಮೀಸಲಿಟ್ಟಿದ್ದಾರೆ. ಇದು ಅವರ ಸಿನಿಮಾದ ಭವ್ಯತೆ ಮತ್ತು ಪ್ರತಿ ದೃಶ್ಯಕ್ಕೂ ಅವರು ನೀಡುವ ಶ್ರಮವನ್ನು ತೋರಿಸುತ್ತದೆ.
ಈ 80 ದಿನಗಳ ಶೂಟಿಂಗ್ ಮುಗಿದ ನಂತರ, ಚಿತ್ರತಂಡವು ಸುದೀರ್ಘವಾದ ಪೋಸ್ಟ್ ಪ್ರೊಡಕ್ಷನ್ ಮತ್ತು ಅತ್ಯಾಧುನಿಕ ಗ್ರಾಫಿಕ್ಸ್ (VFX) ಕೆಲಸಗಳಲ್ಲಿ ನಿರತವಾಗಲಿದೆ.
ಮಹೇಶ್ ಬಾಬು ಅವರನ್ನು ಹಿಂದೆಂದೂ ಕಾಣದ ಅತ್ಯಂತ ರಗಡ್ ಅವತಾರದಲ್ಲಿ ತೆರೆಮೇಲೆ ತರಲು ಜಕ್ಕಣ್ಣ ಸಜ್ಜಾಗಿದ್ದು, ಈ ಚಿತ್ರವು ಬಾಕ್ಸ್ ಆಫೀಸ್ನಲ್ಲಿ ಹೊಸ ಇತಿಹಾಸ ಸೃಷ್ಟಿಸುವುದು ಗ್ಯಾರಂಟಿ ಎನ್ನುತ್ತಿದ್ದಾರೆ ಸಿನಿಪ್ರಿಯರು.
