ಕೋಟಿ ಕೋಟಿ ಲಡ್ಡುಗಳು ಖಾಲಿ! ಜೂನ್ ತಿಂಗಳಲ್ಲಿ ತಿರುಪತಿಯಲ್ಲಿ ಹೊಸ ಇತಿಹಾಸ ಸೃಷ್ಟಿ!

ಹೊಸದಿಗಂತ ಡಿಜಿಟಲ್‌ ಡೆಸ್ಕ್:

ಕಲಿಯುಗದ ಪ್ರತ್ಯಕ್ಷ ದೈವ ಶ್ರೀ ವೆಂಕಟೇಶ್ವರ ಸ್ವಾಮಿಯ ದರ್ಶನದ ಬಳಿಕ ಭಕ್ತರು ಅತ್ಯಂತ ಭಕ್ತಿಯಿಂದ ಸ್ವೀಕರಿಸುವ ಪವಿತ್ರ ‘ಶ್ರೀವಾರಿ ಲಡ್ಡು ಪ್ರಸಾದ’ದ ಮಾರಾಟವು 2026ರ ಜೂನ್ ತಿಂಗಳಿನಲ್ಲಿ ದಾಖಲೆ ಮಟ್ಟವನ್ನು ತಲುಪಿದೆ. ಭಕ್ತರ ಸಂಖ್ಯೆ ಹೆಚ್ಚಾದ ಹಿನ್ನೆಲೆಯಲ್ಲಿ ತಿರುಮಲ ತಿರುಪತಿ ದೇವಸ್ಥಾನ ಲಡ್ಡು ಉತ್ಪಾದನೆಯನ್ನು ಹೆಚ್ಚಿಸಿ, ಯಾವುದೇ ಕೊರತೆಯಿಲ್ಲದೆ ನಿರಂತರವಾಗಿ ವಿತರಿಸಿದೆ.

ಕಳೆದ ಮೂರು ತಿಂಗಳ ಮಾರಾಟ

ಈ ವರ್ಷದ ಬೇಸಿಗೆಯ ಅವಧಿಯಲ್ಲಿ ಲಡ್ಡು ಮಾರಾಟವು ತಿಂಗಳಿಂದ ತಿಂಗಳಿಗೆ ಭಾರಿ ಏರಿಕೆ ಕಂಡಿದೆ. ಏಪ್ರಿಲ್‌ನಲ್ಲಿ 1,11,96,170 ಲಡ್ಡುಗಳು ಮಾರಾಟವಾದರೆ, ಮೇಯಲ್ಲಿ 1,21,35,528 ಲಡ್ಡುಗಳು  ಹಾಗೂ ಜೂನ್‌ನಲ್ಲಿ 1,26,81,805 ಲಡ್ಡುಗಳು ಮಾರಾಟವಾಗಿದೆ.

ಹಿಂದಿನ ವರ್ಷಗಳಿಗೆ ಹೋಲಿಕೆ

ಕಳೆದ ವರ್ಷಗಳಿಗೆ ಹೋಲಿಸಿದರೆ ಈ ಬಾರಿಯ ಜೂನ್ ತಿಂಗಳಿನ ಮಾರಾಟವು ಐತಿಹಾಸಿಕ ಮೈಲಿಗಲ್ಲನ್ನು ಸ್ಥಾಪಿಸಿದೆ. 2025ರ ಜೂನ್‌ಗೆ ಹೋಲಿಸಿದರೆ 2026ರ ಜೂನ್‌ನಲ್ಲಿ 7,59,452 ಹೆಚ್ಚುವರಿ ಲಡ್ಡುಗಳು ಮಾರಾಟವಾಗಿವೆ. ಇನ್ನು 2024ಕ್ಕೆ ಹೋಲಿಸಿದರೆ ಬರೋಬ್ಬರಿ 24,17,441 ಹೆಚ್ಚುವರಿ ಲಡ್ಡುಗಳು ಮಾರಾಟವಾಗಿವೆ.

ಇದನ್ನೂ ಓದಿ:

300 ವರ್ಷಗಳ ಪವಿತ್ರ ಸಂಪ್ರದಾಯ

ಆಂಧ್ರಪ್ರದೇಶದ ತಿರುಮಲ ಬೆಟ್ಟದ ಮೇಲಿರುವ ಶ್ರೀ ವೆಂಕಟೇಶ್ವರ ಸ್ವಾಮಿಯ ದರ್ಶನಕ್ಕೆ ಬರುವ ಕೋಟ್ಯಂತರ ಭಕ್ತರಿಗೆ ಶ್ರೀವಾರಿ ಲಡ್ಡು ಕೇವಲ ಸಿಹಿಯಲ್ಲ, ಅದು ದೇವರ ಆಶೀರ್ವಾದದ ಸಂಕೇತ. ಈ ಪವಿತ್ರ ಪ್ರಸಾದದ ಸಂಪ್ರದಾಯವು 1715 ರಿಂದ, ಅಂದರೆ ಸುಮಾರು 300 ವರ್ಷಗಳಿಗಿಂತಲೂ ಹೆಚ್ಚು ಹಳೆಯದಾಗಿದೆ.

ಇದನ್ನು ದೇವಾಲಯದ ಒಳಗಿರುವ ಪ್ರಸಿದ್ಧ ‘ಲಡ್ಡು ಪೋಟು’ (ವಿಶೇಷ ಅಡುಗೆ ಮನೆ) ನಲ್ಲಿ ಮಾತ್ರ ತಯಾರಿಸಲಾಗುತ್ತದೆ. ಶುದ್ಧ ತುಪ್ಪ, ಕಡಲೆ ಹಿಟ್ಟು, ಸಕ್ಕರೆ, ಗೋಡಂಬಿ, ಒಣದ್ರಾಕ್ಷಿ ಮತ್ತು ಏಲಕ್ಕಿ ಬಳಸಿ ಇವುಗಳನ್ನು ಸಿದ್ಧಪಡಿಸಿ, ಮೊದಲು ದೇವರಿಗೆ ನೈವೇದ್ಯ ಮಾಡಿದ ನಂತರವೇ ಭಕ್ತರಿಗೆ ವಿತರಿಸಲಾಗುತ್ತದೆ.