ಅಡುಗೆ ಮಾಡುವಾಗಲೋ ಅಥವಾ ಆಕಸ್ಮಿಕವಾಗಿಯೋ ಕೈ ಅಥವಾ ದೇಹದ ಯಾವುದೇ ಭಾಗ ಸಣ್ಣದಾಗಿ ಸುಟ್ಟುಕೊಳ್ಳುವುದು ಸಾಮಾನ್ಯ. ಇಂತಹ ಸಂದರ್ಭಗಳಲ್ಲಿ ತಕ್ಷಣ ಏನು ಮಾಡಬೇಕು ಮತ್ತು ಯಾವ ಮನೆಮದ್ದುಗಳನ್ನು ಬಳಸಬೇಕು ಎಂಬ ಸರಿಯಾದ ಮಾಹಿತಿ ಇರುವುದು ಅತ್ಯಗತ್ಯ. ಇದು ಗಾಯದ ಉರಿಯನ್ನು ಕಡಿಮೆ ಮಾಡುವುದಲ್ಲದೆ, ಚರ್ಮದ ಮೇಲೆ ಕಲೆ ಅಥವಾ ಗುಳ್ಳೆಗಳಾಗದಂತೆ ತಡೆಯುತ್ತದೆ.
ಸಣ್ಣಪುಟ್ಟ ಸುಟ್ಟ ಗಾಯಗಳಿಗೆ ಮನೆಯಲ್ಲೇ ಮಾಡಬಹುದಾದ ಕೆಲವು ಪರಿಣಾಮಕಾರಿ ಪ್ರಥಮ ಚಿಕಿತ್ಸೆಗಳು ಮತ್ತು ಮನೆಮದ್ದುಗಳ ಬಗ್ಗೆ ತಿಳಿಯೋಣ.
ತಣ್ಣೀರಿನಲ್ಲಿ ಕೈ ಇಡುವುದು
ಗಾಯವಾದ ತಕ್ಷಣ ಆ ಜಾಗವನ್ನು ಹರಿಯುವ ತಣ್ಣೀರಿನಲ್ಲಿ 10 ರಿಂದ 15ನಿಮಿಷಗಳ ಕಾಲ ಹಿಡಿಯಬೇಕು. ಇದು ಚರ್ಮದ ಆಳಕ್ಕೆ ಶಾಖ ಇಳಿಯುವುದನ್ನು ತಡೆಯುತ್ತದೆ ಮತ್ತು ಉರಿಯನ್ನು ತಕ್ಷಣ ಶಮನಗೊಳಿಸುತ್ತದೆ. ವ ಮುನ್ನವೇ ಉಂಗುರ ಅಥವಾ ಬಳೆಗಳನ್ನು ತಕ್ಷಣ ತೆಗೆದುಬಿಡಬೇಕು.
ಅಲೋವೆರಾ ಜೆಲ್
ಅಲೋವೆರಾವು ನೈಸರ್ಗಿಕ ತಂಪಾಗಿಸುವ ಮತ್ತು ಉರಿಯೂತ ನಿವಾರಕ ಗುಣಗಳನ್ನು ಹೊಂದಿದೆ. ತಾಜಾ ಅಲೋವೆರಾ ಎಲೆಯಿಂದ ಜೆಲ್ ತೆಗೆದು ಗಾಯದ ಮೇಲೆ ಹಚ್ಚುವುದರಿಂದ ಚರ್ಮಕ್ಕೆ ತಂಪು ಸಿಗುತ್ತದೆ ಮತ್ತು ಗಾಯ ಬೇಗ ಒಣಗುತ್ತದೆ.
ಶುದ್ಧ ಜೇನುತುಪ್ಪ
ಜೇನುತುಪ್ಪದಲ್ಲಿ ನೈಸರ್ಗಿಕ ನಂಜುನಿರೋಧಕ (Antiseptic) ಮತ್ತು ಬ್ಯಾಕ್ಟೀರಿಯಾ ವಿರೋಧಿ ಗುಣಗಳಿವೆ. ಸುಟ್ಟ ಗಾಯಕ್ಕೆ ಜೇನುತುಪ್ಪ ಸವರುವುದರಿಂದ ಸೋಂಕು ತಗುಲುವುದಿಲ್ಲ ಮತ್ತು ಕಲೆಗಳು ನಿವಾರಣೆಯಾಗುತ್ತವೆ.
ತೆಂಗಿನೆಣ್ಣೆ
ಗಾಯ ಸ್ವಲ್ಪ ಆರಿದ ನಂತರ ಆ ಜಾಗಕ್ಕೆ ನಿಯಮಿತವಾಗಿ ತೆಂಗಿನೆಣ್ಣೆ ಹಚ್ಚುತ್ತಾ ಬಂದರೆ ಚರ್ಮವು ಮೃದುವಾಗುತ್ತದೆ ಮತ್ತು ಸುಟ್ಟ ಕಲೆಗಳು ಕ್ರಮೇಣ ಮಾಯವಾಗುತ್ತವೆ.
ಇದನ್ನೂ ಓದಿ:
ಏನು ಮಾಡಬಾರದು?
ಸುಟ್ಟ ಗಾಯದ ಮೇಲೆ ನೇರವಾಗಿ ಐಸ್ ಇಡಬಾರದು. ಇದು ಚರ್ಮದ ಕೋಶಗಳಿಗೆ ಮತ್ತಷ್ಟು ಹಾನಿ ಮಾಡಬಹುದು.
ಗಾಯದ ಮೇಲೆ ಟೂತ್ಪೇಸ್ಟ್, ಬೆಣ್ಣೆ ಅಥವಾ ಎಣ್ಣೆಯನ್ನು ತಕ್ಷಣ ಹಚ್ಚುವುದರಿಂದ ಶಾಖವು ಚರ್ಮದ ಒಳಗೇ ಉಳಿದುಕೊಂಡು ಸೋಂಕು ಹೆಚ್ಚಾಗುವ ಸಾಧ್ಯತೆ ಇರುತ್ತದೆ.
ಸುಟ್ಟ ಜಾಗದಲ್ಲಿ ನೀರಿನ ಗುಳ್ಳೆಗಳಾದರೆ ಅವುಗಳನ್ನು ಒಡೆಯಲು ಹೋಗಬಾರದು. ಅವು ಚರ್ಮವನ್ನು ಸೋಂಕಿನಿಂದ ರಕ್ಷಿಸುತ್ತವೆ.
