ಹೊಸದಿಗಂತ ಡಿಜಿಟಲ್ ಡೆಸ್ಕ್:
ಟಾಲಿವುಡ್ ಮೆಗಾ ಪವರ್ ಸ್ಟಾರ್ ರಾಮ್ ಚರಣ್ ಅವರ ಬಲಗೈ ಮಣಿಕಟ್ಟಿನ ಶಸ್ತ್ರಚಿಕಿತ್ಸೆ ಯಶಸ್ವಿಯಾಗಿ ನೆರವೇರಿದೆ. ತಮಿಳುನಾಡಿನ ಕೊಯಮತ್ತೂರಿನಲ್ಲಿರುವ ಪ್ರಸಿದ್ಧ ಗಂಗಾ ಆಸ್ಪತ್ರೆಯಲ್ಲಿ ಭಾನುವಾರ ಈ ವೈದ್ಯಕೀಯ ಪ್ರಕ್ರಿಯೆ ಜರುಗಿದೆ. ಸದ್ಯ ನಟ ಚೇತರಿಸಿಕೊಳ್ಳುತ್ತಿದ್ದು, ಆಸ್ಪತ್ರೆಯ ಬೆಡ್ನಿಂದ ಹೊರಬಿದ್ದಿರುವ ಅವರ ಇತ್ತೀಚಿನ ಫೋಟೋ ಸಾಮಾಜಿಕ ಜಾಲತಾಣಗಳಲ್ಲಿ ಭಾರಿ ವೈರಲ್ ಆಗುತ್ತಿದೆ.
ಕುಟುಂಬದ ಆಸರೆ ಮತ್ತು ತಜ್ಞ ವೈದ್ಯರ ತಂಡ
ಗಾಯದ ಸ್ವರೂಪ ತೀವ್ರವಾಗಿದ್ದ ಕಾರಣ ಗಂಗಾ ಆಸ್ಪತ್ರೆಯ ಮುಖ್ಯಸ್ಥ ಡಾ. ಎಸ್. ರಾಜಶೇಖರನ್ ನೇತೃತ್ವದಲ್ಲಿ ಆಪರೇಷನ್ ನಡೆಯಿತು. ಮಿಯಾಮಿಯ ಖ್ಯಾತ ಅಂತರರಾಷ್ಟ್ರೀಯ ಮಣಿಕಟ್ಟು ತಜ್ಞ ಡಾ. ಅಲೆಜಾಂಡ್ರೋ ಬಾಡಿಯಾ ಅವರನ್ನು ಸಹ ಸರ್ಜರಿಗಾಗಿ ಕರೆಯಿಸಲಾಗಿತ್ತು. ಚಿಕಿತ್ಸೆಯ ಫಲಿತಾಂಶದಿಂದ ವೈದ್ಯರು ತೃಪ್ತರಾಗಿದ್ದಾರೆ. ಕಷ್ಟದ ಸಮಯದಲ್ಲಿ ನಟನ ಜೊತೆಗೆ ತಂದೆ ಚಿರಂಜೀವಿ, ತಾಯಿ ಸುರೇಖಾ ಹಾಗೂ ಪತ್ನಿ ಉಪಾಸನಾ ಕೊನಿಡೇಲ ಜೊತೆಯಲ್ಲಿದ್ದು ಆರೈಕೆ ಮಾಡುತ್ತಿದ್ದಾರೆ.
ಎಂಟು ವಾರಗಳ ಕಡ್ಡಾಯ ವಿಶ್ರಾಂತಿ
ವೈದ್ಯರ ಸಲಹೆಯಂತೆ ರಾಮ್ ಚರಣ್ ಮುಂಬರುವ ಎಂಟು ವಾರಗಳ ಕಾಲ ಸಂಪೂರ್ಣವಾಗಿ ವಿಶ್ರಾಂತಿ ಪಡೆಯಲಿದ್ದಾರೆ. ಈ ಅವಧಿಯಲ್ಲಿ ಅವರು ಯಾವುದೇ ಸಿನಿಮಾಗಳ ಶೂಟಿಂಗ್ನಲ್ಲಿ ಭಾಗವಹಿಸುವಂತಿಲ್ಲ. ನಟ ಶೀಘ್ರ ಗುಣಮುಖರಾಗಲಿ ಎಂದು ವಿಶ್ವದಾದ್ಯಂತ ಇರುವ ಅಭಿಮಾನಿಗಳು ಪ್ರಾರ್ಥಿಸುತ್ತಿದ್ದಾರೆ.
