ಹೊಸದಿಗಂತ ಡಿಜಿಟಲ್ ಡೆಸ್ಕ್:
ಏಷ್ಯನ್ ಗೇಮ್ಸ್ ಕಾದಾಟದ ಬಿಸಿ ಏರುತ್ತಿದ್ದಂತೆ, ಕ್ರೀಡಾಲೋಕದ ಅತ್ಯಂತ ರೋಚಕ ಮತ್ತು ಹೈ-ವೋಲ್ಟೇಜ್ ಪಂದ್ಯಕ್ಕೆ ವೇದಿಕೆ ಸಿದ್ಧವಾಗಿದೆ. ಏಷ್ಯನ್ ಗೇಮ್ಸ್ ಹಾಕಿ ಪಂದ್ಯಾವಳಿಯ ಫೈನಲ್ ಟಿಕೆಟ್‌ಗಾಗಿ ಸಾಂಪ್ರದಾಯಿಕ ವೈರಿಗಳಾದ ಭಾರತ ಮತ್ತು ಪಾಕಿಸ್ತಾನ ತಂಡಗಳು ಸೆಣಸಾಡಲಿದ್ದು, ಕೋಟ್ಯಂತರ ಕ್ರೀಡಾಭಿಮಾನಿಗಳ ಚಿತ್ತ ಈ ಮಹಾಸಮರದತ್ತ ನೆಟ್ಟಿದೆ.
ಹಾಲಿ ಚಾಂಪಿಯನ್ ಆಗಿ ಕಣಕ್ಕಿಳಿದಿರುವ ಭಾರತ ತಂಡವು ಈ ಬಾರಿಯ ಏಷ್ಯನ್ ಗೇಮ್ಸ್‌ನಲ್ಲಿ ಭರ್ಜರಿಯಾಗಿ ಮುನ್ನುಗ್ಗುತ್ತಿದೆ. ಪೂಲ್ ‘ಎ’ ವಿಭಾಗದಲ್ಲಿ ಆಡಿದ ಐದಕ್ಕೆ ಐದೂ ಪಂದ್ಯಗಳನ್ನು ಗೆದ್ದು, ಅಂಕಪಟ್ಟಿಯಲ್ಲಿ ಅಗ್ರಸ್ಥಾನಕ್ಕೇರುವ ಮೂಲಕ ಪೂರ್ಣ ಆತ್ಮವಿಶ್ವಾಸದೊಂದಿಗೆ ಸೆಮಿಫೈನಲ್ ಪ್ರವೇಶಿಸಿದೆ. ಭಾರತ ತನ್ನ ಅಭಿಯಾನವನ್ನು ಇಂಡೋನೇಷ್ಯಾ ವಿರುದ್ಧ 13-1 ಅಂತರದ ಭರ್ಜರಿ ಗೆಲುವಿನೊಂದಿಗೆ ಆರಂಭಿಸಿತು. ಆ ನಂತರ ಶ್ರೀಲಂಕಾ ವಿರುದ್ಧ 16-1 ಗೋಲುಗಳ ಬೃಹತ್ ಅಂತರದ ಜಯ ಸಾಧಿಸಿ ತನ್ನ ಸಾಮರ್ಥ್ಯವನ್ನು ಪ್ರದರ್ಶಿಸಿತು.
ಮುಂದಿನ ಪಂದ್ಯದಲ್ಲಿ ದಕ್ಷಿಣ ಕೊರಿಯಾ ವಿರುದ್ಧ 8-2 ಗೋಲುಗಳಿಂದ ಜಯಭೇರಿ ಬಾರಿಸಿತು. ಏಷ್ಯನ್ ಗೇಮ್ಸ್ ಇತಿಹಾಸದಲ್ಲೇ ಕೊರಿಯಾ ವಿರುದ್ಧ ಭಾರತ ಸಾಧಿಸಿದ ಅತಿ ದೊಡ್ಡ ಗೆಲುವು ಇದಾಗಿದೆ. ಆತಿಥೇಯ ಜಪಾನ್ ವಿರುದ್ಧ ನಡೆದ ರೋಚಕ ಪಂದ್ಯದಲ್ಲಿ 2-0 ಅಂತರದಿಂದ ಗೆದ್ದು ಬೀಗಿದ ಭಾರತ, ಪೂಲ್‌ನ ಕೊನೆಯ ಪಂದ್ಯದಲ್ಲಿ ಬಾಂಗ್ಲಾದೇಶವನ್ನು 10-0 ಅಂತರದಲ್ಲಿ ಸಂಪೂರ್ಣವಾಗಿ ಧೂಳಿಪಟ ಮಾಡಿತು. ಜಯದ ಲಯದಲ್ಲಿರುವ ಭಾರತೀಯ ಪಡೆ ಪಾಕ್ ವಿರುದ್ಧದ ಸೆಮಿಫೈನಲ್‌ಗೆ ಪೂರ್ಣ ಸಜ್ಜಾಗಿದೆ.
ಮತ್ತೊಂದೆಡೆ, ಪಾಕಿಸ್ತಾನ ತಂಡವು ಪೂಲ್ ‘ಬಿ’ ವಿಭಾಗದಲ್ಲಿ ಭರ್ಜರಿ ಪ್ರದರ್ಶನ ನೀಡುತ್ತಾ ಬಂದಿತ್ತು. ಥೈಲ್ಯಾಂಡ್ (9-0), ಉಜ್ಬೆಕಿಸ್ತಾನ್ (5-1), ಚೀನಾ (3-0) ಮತ್ತು ಒಮಾನ್ (7-2) ವಿರುದ್ಧ ಸತತ ಜಯ ಸಾಧಿಸಿ ಗ್ರೂಪ್ ಟಾಪರ್ ಆಗುವ ಹಾದಿಯಲ್ಲೇ ಇತ್ತು. ಆದರೆ, ಮಲೇಷ್ಯಾ ವಿರುದ್ಧ ನಡೆದ ತೀವ್ರ ಹೋರಾಟದ ಪಂದ್ಯದಲ್ಲಿ 4-5 ಅಂತರದಿಂದ ಸೋಲನುಭವಿಸಿದ್ದು ಪಾಕಿಸ್ತಾನಕ್ಕೆ ದೊಡ್ಡ ಆಘಾತ ನೀಡಿತು. ಈ ಒಂದೇ ಒಂದು ಸೋಲಿನಿಂದಾಗಿ ಗ್ರೂಪ್‌ನಲ್ಲಿ ಎರಡನೇ ಸ್ಥಾನಕ್ಕೆ ಕುಸಿದ ಪಾಕಿಸ್ತಾನ, ಇದೀಗ ಗುರುವಾರದ ಹೈ-ವೋಲ್ಟೇಜ್ ಸೆಮಿಫೈನಲ್‌ನಲ್ಲಿ ಪ್ರಬಲ ಭಾರತವನ್ನು ಎದುರಿಸುವಂತಾಗಿದೆ.
ಸಾಂಪ್ರದಾಯಿಕ ವೈರಿಗಳ ನಡುವಿನ ಈ ಕಾದಾಟದಲ್ಲಿ ಯಾರು ಫೈನಲ್ ಪ್ರವೇಶಿಸಲಿದ್ದಾರೆ ಎಂಬುದು ಕ್ರೀಡಾಪ್ರೇಮಿಗಳಲ್ಲಿ ಕುತೂಹಲ ಮೂಡಿಸಿದೆ.
