ದೈನಂದಿನ ಜಂಜಾಟ, ಕೆಲಸದ ಒತ್ತಡ ಮತ್ತು ಮೊಬೈಲ್-ಲ್ಯಾಪ್‌ಟಾಪ್ ಸ್ಕ್ರೀನ್‌ಗಳ ಬೆಳಕಿನಲ್ಲಿ ಕಳೆದುಹೋಗುತ್ತಿರುವ ಇಂದಿನ ದಿನಚರಿಯಲ್ಲಿ, ರಾತ್ರಿ ಸುಖವಾಗಿ ನಿದ್ರಿಸುವುದು ದೊಡ್ಡ ಸವಾಲಾಗಿದೆ. ಇಡೀ ದಿನದ ಆಯಾಸವನ್ನು ಮರೆತು ಪ್ರಶಾಂತ ನಿದ್ರೆಗೆ ಜಾರಲು ‘ರಾತ್ರಿ ಯೋಗ’ ಅತ್ಯಂತ ಸರಳ ಹಾಗೂ ಪರಿಣಾಮಕಾರಿ ಮಾರ್ಗ.
ರಾತ್ರಿ ಮಲಗುವ ಮುನ್ನ ಕೇವಲ 10 ರಿಂದ 15 ನಿಮಿಷಗಳ ಕಾಲ ಕೆಲವು ಸರಳ ಯೋಗಾಸನಗಳನ್ನು ಮಾಡುವುದರಿಂದ ದೇಹದ ಪ್ರತಿಯೊಂದು ಸ್ನಾಯುಗಳಿಗೂ ವಿಶ್ರಾಂತಿ ಸಿಗುತ್ತದೆ.
ವಿಪರೀತ ಕರಣಿ: ಗೋಡೆಗೆ ಕಾಲುಗಳನ್ನು ಮೇಲಕ್ಕೆ ಒರಗಿಸಿ ಮಲಗುವ ಈ ಆಸನವು ದಿನವಿಡೀ ನಿಂತು ಅಥವಾ ಕುಳಿತು ಆಯಾಸಗೊಂಡಿರುವ ಕಾಲುಗಳ ರಕ್ತಪರಿಚಲನೆಯನ್ನು ಸರಿಪಡಿಸುತ್ತದೆ. ಇದು ನರಮಂಡಲವನ್ನು ಶಾಂತಗೊಳಿಸಿ ಮನಸ್ಸನ್ನು ಹಗುರಗೊಳಿಸುತ್ತದೆ.
ಬಾಲಾಸನ: ಬೆನ್ನು, ಹೆಗಲು ಮತ್ತು ಕತ್ತಿನ ಭಾಗದ ಒತ್ತಡವನ್ನು ಶಮನಗೊಳಿಸಲು ಈ ಆಸನ ಅದ್ಭುತ. ದೀರ್ಘ ಉಸಿರಾಟದೊಂದಿಗೆ ಇದನ್ನು ಮಾಡಿದಾಗ ಮನಸ್ಸಿನ ಆತಂಕ, ಚಿಂತೆಗಳು ದೂರವಾಗುತ್ತವೆ.
ಸುಪ್ತ ಬದ್ಧ ಕೋಣಾಸನ: ಈ ಆಸನವು ಸೊಂಟ ಮತ್ತು ತೊಡೆಗಳ ಭಾಗವನ್ನು ಲಿಫ್ಟ್ ಮಾಡಿ, ದೇಹದ ಆಯಾಸವನ್ನು ಸಂಪೂರ್ಣವಾಗಿ ಇಳಿಸುತ್ತದೆ.
ಶವಾಸನ: ಅಂತಿಮವಾಗಿ ಶವಾಸನದಲ್ಲಿ ಮಲಗಿ ಉಸಿರಾಟದ ಮೇಲೆ ಗಮನ ಹರಿಸಿದಾಗ ದೇಹವು ಪೂರ್ಣಪ್ರಮಾಣದ ವಿಶ್ರಾಂತಿ ಸ್ಥಿತಿಗೆ ತಲುಪುತ್ತದೆ.
ಇವುಗಳನ್ನು ಮಾಡಲು ಯಾವುದೇ ಕಠಿಣ ಅಭ್ಯಾಸದ ಅಗತ್ಯವಿಲ್ಲ. ಹಾಸಿಗೆಯ ಮೇಲೆಯೇ ಅತ್ಯಂತ ಸುಲಭವಾಗಿ ಅಭ್ಯಾಸ ಮಾಡಬಹುದು. ಇವು ಮಾನಸಿಕ ಒತ್ತಡವನ್ನು ತಗ್ಗಿಸಿ, ಶರೀರವನ್ನು ಆಳವಾದ ನಿದ್ರೆಗೆ ಸಿದ್ಧಗೊಳಿಸುತ್ತವೆ. ಇಂದು ರಾತ್ರಿಯಿಂದಲೇ ಈ ಸರಳ ಅಭ್ಯಾಸವನ್ನು ನಿಮ್ಮ ಜೀವನಶೈಲಿಯಲ್ಲಿ ಅಳವಡಿಸಿಕೊಂಡು, ಶುಭ ನಿದ್ರೆಯ ಅನುಭವ ಪಡೆಯಿರಿ.
