ಹೊಸದಿಗಂತ ಡಿಜಿಟಲ್‌ ಡೆಸ್ಕ್:
ದೆಹಲಿಯಲ್ಲಿ ಮತ್ತೆ ನಿರ್ಭಯಾ ಕೇಸ್‌ ನೆನಪಾಗಿದೆ. ಅದಕ್ಕೆ ಕಾರಣ ಸೋಮವಾರ ಮಧ್ಯರಾತ್ರಿ ಕಾರಿನಲ್ಲಿದ್ದ ಮಹಿಳೆಯೊಬ್ರು ಕೂಗಿಕೊಳ್ಳುತ್ತಿದ್ದಾರೆ ಎಂದು ಪೊಲೀಸ್ ನಿಯಂತ್ರಣ ಕೊಠಡಿಗೆ ಬಂದ ಕರೆ.
ಹೌದು, ದಕ್ಷಿಣ ದೆಹಲಿಯಲ್ಲಿ ಬೂದು ಬಣ್ಣದ ಹ್ಯುಂಡೈ ಐ20 ಕಾರಿನಿಂದ ಹುಡುಗಿಯೊಬ್ಬಳು ಸಹಾಯಕ್ಕಾಗಿ ಕೂಗುತ್ತಿದ್ದಾಳೆ ಎಂದು ಪೊಲೀಸ್ ನಿಯಂತ್ರಣ ಕೊಠಡಿಗೆ ಮಧ್ಯರಾತ್ರಿ ಕರೆ ಬಂದಿದೆ. ಬಳಿಕ ಹಲವು ಪಿಸಿಆರ್ ವ್ಯಾನ್‌ಗಳು ದೆಹಲಿಯ ಬೀದಿಗಳಲ್ಲಿ ಹೆಚ್ಚಿನ ವೇಗದಲ್ಲಿದ್ದ ಕಾರನ್ನು ಚೇಸ್ ಮಾಡಿತು. ಆದರೂ, ದೆಹಲಿ ಪೊಲೀಸರ ಕಣ್ಗಾವಲಿನಿಂದ ಆ ಕಾರು ತಪ್ಪಿಸಿಕೊಂಡಿದೆ .
ಇದೀಗ ಅದರಲ್ಲಿದ್ದವರು ಯಾರು,ಮಹಿಳೆ ಕಿರುಚಿಕೊಂಡಿದ್ದು ಯಾಕೆ ಎಂಬುದನ್ನು ತಿಳಿದುಬಂದಿಲ್ಲ.
ಸೋಮವಾರ ಮಧ್ಯರಾತ್ರಿ 12.35 ರ ಸುಮಾರಿಗೆ ರಾಷ್ಟ್ರ ರಾಜಧಾನಿಯ ಸೌತ್ ಎಕ್ಸ್‌ಟೆನ್ಶನ್ ಭಾಗ 1 ರಲ್ಲಿ ಈ ಘಟನೆ ನಡೆದಿದೆ. NEET ಆಕಾಂಕ್ಷಿಗಳ ಗುಂಪು ಇಬ್ಬರು ಪುರುಷರು ಮತ್ತು ಇಬ್ಬರು ಮಹಿಳೆಯರೊಂದಿಗೆ ಬೂದು ಬಣ್ಣದ ಹುಂಡೈ i20 ಕಾರನ್ನು ಗುರುತಿಸಿದ್ದಾರೆ. ಕಾರನ್ನು ಪುರುಷರೊಬ್ಬರು ಚಲಾಯಿಸುತ್ತಿದ್ದರು ಮತ್ತು ಅವರ ಪಕ್ಕದಲ್ಲಿ ಅಂದ್ರೆ ಮುಂದಿನ ಸೀಟಲ್ಲೇ ಮಹಿಳೆಯೊಬ್ಬರು ಕೂತಿದ್ದರು ಎಂದು ವಿದ್ಯಾರ್ಥಿಗಳು ಹೇಳಿದ್ದಾರೆ. ಅಲ್ಲದೆ, ಹಿಂದಿನ ಸೀಟಲ್ಲೂ ಮತ್ತೊಬ್ಬ ಪುರುಷ ಮತ್ತು ಮಹಿಳೆ ಇದ್ದರು ಎಂದೂ ಅಧಿಕಾರಿಗಳು ವಿದ್ಯಾರ್ಥಿಗಳ ಹೇಳಿಕೆ ಉಲ್ಲೇಖಿಸಿದ್ದಾರೆ.
ಹಿಂಬದಿಯಲ್ಲಿದ್ದ ಮಹಿಳೆ ಕಾರಿನಿಂದ ಇಳಿಯಲು ಪ್ರಯತ್ನಿಸುತ್ತಿದ್ದಳು, ಆದರೆ ಆಕೆಯ ಪಕ್ಕದಲ್ಲಿದ್ದ ವ್ಯಕ್ತಿ ಆಕೆಯನ್ನು ಕಾರಿನಿಂದ ಇಳಿಯದಂತೆ ತಡೆಯುತ್ತಿದ್ದನು ಮತ್ತು ಮುಂಭಾಗದಲ್ಲಿದ್ದ ಮಹಿಳೆ ಸಹಾಯಕ್ಕಾಗಿ ಕೂಗುತ್ತಿದ್ದಳು ಎಂದೂ ಪ್ರತ್ಯಕ್ಷದರ್ಶಿಗಳು ಹೇಳಿದ್ದಾರೆ.
ವಿದ್ಯಾರ್ಥಿಗಳ ಹೇಳಿಕೆ ಆಧರಿಸಿ ಕೋಟ್ಲಾ ಮುಬಾರಕ್‌ಪುರ ಪೊಲೀಸ್ ಠಾಣೆಯ ಅಧಿಕಾರಿಗಳು ಸಿಸಿಟಿವಿ ದೃಶ್ಯಾವಳಿ ಗಮನಿಸಿದ್ದು, ಅವರು ಹೇಳಿದ್ದು ನಿಜವೆಂಬುದನ್ನೂ ಕಂಡುಕೊಂಡಿದ್ದಾರೆ.
ಕ್ಯಾಮೆರಾದಲ್ಲಿ 12.35 ರ ಸುಮಾರಿಗೆ ಸ್ಥಳದಲ್ಲಿ ಕಾರು, ಬಹುಶಃ ಮಾರುತಿ ಸೆಲೆರಿಯೋ ಅಥವಾ ಹ್ಯುಂಡೈ i10 ಅನ್ನು ತೋರಿಸಿದೆ. ಕಾರಿನ ಮುಂಭಾಗದ ಬಾಗಿಲು ತೆರೆದಿತ್ತು ಮತ್ತು ಮಹಿಳೆಯೊಬ್ಬರು ಸಹಾಯಕ್ಕಾಗಿ ಕೂಗುತ್ತಿರುವಂತೆ ತೋರುತ್ತಿದೆ ಎಂದು ಪೊಲೀಸ್ ಅಧಿಕಾರಿ ತಿಳಿಸಿದ್ದಾರೆ.
ಆದ್ರೆ ಕಾರಿನ ನಂಬರ್ ಪ್ಲೇಟ್ ಅನ್ನು ಸಿಸಿ ಕ್ಯಾಮೆರಾದಲ್ಲಿ ಸ್ಪಷ್ಟವಾಗಿಲ್ಲ. ಆದರೂ, ದೆಹಲಿ ಪೊಲೀಸರ ಕಾರೊಂದು ಹರಿಯಾಣ ನೋಂದಣಿ ಸಂಖ್ಯೆ ಹೊಂದಿರುವ ಅದೇ ರೀತಿಯ ಕಾರಿನ ಸಂಖ್ಯೆಯನ್ನು ನೋಟ್‌ ಮಾಡಿಕೊಂಡಿದ್ದಾರೆ ಎಂದು ತಿಳಿದುಬಂದಿದೆ. ಮೂರು ಪಿಸಿಆರ್ ವ್ಯಾನ್‌ಗಳು ಕಾರನ್ನು ಗುರುತಿಸಿದವು ಮತ್ತು ಐಎನ್‌ಎಯಿಂದ ಸಫ್ದರ್‌ಜಂಗ್ ಕಡೆಗೆ ಸುಮಾರು 1 ಗಂಟೆಗೆ ಆ ಕಾರು ಚೇಸ್ ಮಾಡಲು ಪ್ರಾರಂಭಿಸಿದವು. ಆದರೂ, ಆ ಕಾರು ಬಾರಾಪುಲ್ಲಾ ಫ್ಲೈಓವರ್‌ ದಾಟಿದ್ದು, ಪೊಲೀಸರು ಆ ಕಾರು ಹಿಡಿಯಲು ಮಿಸ್‌ ಆಗಿದ್ದಾರೆ .
ಇನ್ನೊಂದೆಡೆ, ಆ ಕಾರು ನೋಯ್ಡಾ ಕಡೆಗೆ ಹೋಗಿರಬಹುದೆಂದು, ನೋಯ್ಡಾ ಪೊಲೀಸರಿಗೆ ಸಹ ಎಚ್ಚರಿಕೆ ನೀಡಿದರೂ ಅವರೂ ಸಹ ಆ ಕಾರನ್ನು ಪತ್ತೆಹಚ್ಚಲಾಗಲಿಲ್ಲ ಎಂದೂ ತಿಳಿದುಬಂದಿದೆ. ಇನ್ನು, ಯಾವುದೇ ಮಹಿಳೆ ನಾಪತ್ತೆಯಾಗಿದ್ದಾರೆಯೇ ಎಂದು ತಿಳಿಯಲು ಪೊಲೀಸರು ಆ ಪ್ರದೇಶದಲ್ಲಿರುವ ಹಾಸ್ಟೆಲ್‌ಗಳು ಮತ್ತು ಪೇಯಿಂಗ್ ಗೆಸ್ಟ್‌ ರೂಂಗಳಿಗೆ ಹೋದರೂ ಬೆಳಕಿಗೆ ಬರಲಿಲ್ಲ. ಈ ಹಿನ್ನೆಲೆ ಇದು ಅಪಹರಣ ಪ್ರಕರಣವಾಗಿರುವ ಸಾಧ್ಯತೆಯನ್ನೂ ಪೊಲೀಸರು ತಳ್ಳಿ ಹಾಕಿದ್ದು, ಪರಿಚಿತರ ನಡುವಿನ ವಿವಾದ ಪ್ರಕರಣವಾಗಿರಬಹುದು ಎಂದು ದೆಹಲಿ ಪೊಲೀಸರು ಶಂಕೆ ವ್ಯಕ್ತಪಡಿಸಿದ್ದಾರೆ.
