ಕೊರೊನಾ ಮಹಾಮಾರಿ ನಂತರ ಜನರಲ್ಲಿ ಪಾರ್ಶ್ವವಾಯು (Stroke) ಪ್ರಕರಣಗಳು ಗಣನೀಯವಾಗಿ ಹೆಚ್ಚುತ್ತಿರುವುದು ವೈದ್ಯಕೀಯ ವಲಯದಲ್ಲಿ ಆತಂಕ ಹುಟ್ಟಿಸಿದೆ. ಇತ್ತೀಚಿನ ಸಂಶೋಧನೆಗಳ ಪ್ರಕಾರ, ಕೊರೊನಾ ಲಸಿಕೆ ನಂತರ ಕೆಲವು ಮಂದಿಯಲ್ಲಿ ರಕ್ತ ಹೆಪ್ಪುಗಟ್ಟುವಿಕೆ (Blood Clotting) ಸಮಸ್ಯೆ ಉಂಟಾಗುವ ಸಾಧ್ಯತೆ ಇದೆ. ಇದರ ಪರಿಣಾಮವಾಗಿ ಬ್ರೈನ್ ಸ್ಟ್ರೋಕ್ ಸೇರಿದಂತೆ ಗಂಭೀರ ಸಮಸ್ಯೆಗಳು ಎದುರಾಗಬಹುದು. ತಜ್ಞರ ಅಭಿಪ್ರಾಯದಲ್ಲಿ, ಪಾರ್ಶ್ವವಾಯುವಿನ ಚಿಕಿತ್ಸೆಯ ಬದಲು ತಡೆಗಟ್ಟುವಿಕೆಗೆ ಹೆಚ್ಚಿನ ಆದ್ಯತೆ ನೀಡುವುದು ಅತೀ ಮುಖ್ಯ.
ಪಾರ್ಶ್ವವಾಯು ಹೇಗೆ ಉಂಟಾಗುತ್ತದೆ?
ಪಾರ್ಶ್ವವಾಯುವು ಮೆದುಳಿಗೆ ರಕ್ತ ಪೂರೈಕೆ ತಡೆದಾಗ ಉಂಟಾಗುತ್ತದೆ. ಇದರಿಂದ ಮೆದುಳಿನ ಜೀವಕೋಶಗಳಿಗೆ ಹಾನಿ ಉಂಟಾಗಿ, ಕೆಲವೊಮ್ಮೆ ಜೀವಕೋಶಗಳು ಸತ್ತುಹೋಗುವ ಸಾಧ್ಯತೆ ಇದೆ. ನರಶಸ್ತ್ರ ತಜ್ಞರ ಪ್ರಕಾರ, ಸ್ಟ್ರೋಕ್ ಎರಡು ರೀತಿಯಾಗಿದೆ. ಮೊದಲನೆಯದು ರಕ್ತಕೊರತೆಯ ಸ್ಟ್ರೋಕ್, ಇದು ರಕ್ತನಾಳದಲ್ಲಿ ಅಡಚಣೆ ಉಂಟಾದಾಗ ಸಂಭವಿಸುತ್ತದೆ. ಎರಡನೆಯದು ಹೆಮರಾಜಿಕ್ ಸ್ಟ್ರೋಕ್, ಇದು ರಕ್ತನಾಳವು ಛಿದ್ರಗೊಂಡು ರಕ್ತಸ್ರಾವವಾದಾಗ ಉಂಟಾಗುತ್ತದೆ. ಎರಡೂ ಪರಿಸ್ಥಿತಿಗಳೂ ತೀವ್ರವಾಗಿದ್ದು ತಕ್ಷಣ ಚಿಕಿತ್ಸೆ ಅಗತ್ಯ.
ಯುವಕರಲ್ಲೂ ಹೆಚ್ಚಿದ ಪ್ರಕರಣಗಳು
ಧೂಮಪಾನ, ಮದ್ಯಪಾನ, ಒತ್ತಡ ಹಾಗೂ ಅಸಮತೋಲಿತ ಜೀವನಶೈಲಿ ಕಾರಣದಿಂದ ಇತ್ತೀಚಿನ ದಿನಗಳಲ್ಲಿ ಯುವಕರಲ್ಲೂ ಪಾರ್ಶ್ವವಾಯು ಪ್ರಕರಣಗಳು ಹೆಚ್ಚಾಗಿವೆ. ವಿಶ್ವದ ಮಟ್ಟದಲ್ಲಿ ಪ್ರತಿ ವರ್ಷ ಸುಮಾರು 14.5 ಮಿಲಿಯನ್ ಜನರು ಪಾರ್ಶ್ವವಾಯುವಿಗೆ ಒಳಗಾಗುತ್ತಾರೆ ಎಂದು ಅಂಕಿಅಂಶಗಳು ತಿಳಿಸುತ್ತವೆ.
ಮುಖದಲ್ಲಿ ಸೆಳೆತ, ಕೈ ಕಾಲು ದುರ್ಬಲತೆ, ಮಾತನಾಡಲು ತೊಂದರೆ, ದೃಷ್ಟಿ ಅಸ್ಪಷ್ಟತೆ ಇವು ಪಾರ್ಶ್ವವಾಯುವಿನ ಪ್ರಾಥಮಿಕ ಲಕ್ಷಣಗಳು. ಇಂತಹ ಸಂದರ್ಭಗಳಲ್ಲಿ ತಕ್ಷಣ ವೈದ್ಯಕೀಯ ನೆರವು ಪಡೆಯುವುದು ಜೀವ ರಕ್ಷಣೆಗಾಗಿ ಅತ್ಯಗತ್ಯ.
ತಡೆಗಟ್ಟುವ ಸರಳ ಕ್ರಮಗಳು
ಸಮತೋಲಿತ ಆಹಾರ ಸೇವನೆ – ಹೆಚ್ಚಿನ ಹಣ್ಣು, ತರಕಾರಿ ಸೇರಿಸಿಕೊಳ್ಳುವುದು ಬಹಳ ಉತ್ತಮ.
ಉಪ್ಪು ಸೇವನೆಯನ್ನು ನಿಯಂತ್ರಿಸುವುದು.
ತಂಬಾಕು, ಮದ್ಯಪಾನ ಹಾಗೂ ಇತರ ಮಾದಕ ಪದಾರ್ಥಗಳಿಂದ ದೂರವಿರುವುದು.
ನಿಯಮಿತ ವ್ಯಾಯಾಮ ಹಾಗೂ ತೂಕ ನಿಯಂತ್ರಣದಲ್ಲಿ ಇಡುವುದು.
ಒತ್ತಡ ಕಡಿಮೆ ಮಾಡಿ, ಸಮರ್ಪಕ ನಿದ್ರೆ ಪಡೆಯುವುದು.
ಕೊರೊನಾ ಬಳಿಕ ಪಾರ್ಶ್ವವಾಯು ಅಪಾಯ ಹೆಚ್ಚಿದರೂ, ಆರೋಗ್ಯಕರ ಜೀವನಶೈಲಿ ಮತ್ತು ಎಚ್ಚರಿಕೆ ಕ್ರಮಗಳಿಂದ ಅಪಾಯವನ್ನು ಬಹುತೇಕ ಕಡಿಮೆ ಮಾಡಬಹುದು. ಆಹಾರದಲ್ಲಿ ಪೋಷಕಾಂಶಗಳ ಸಮತೋಲನ, ಮದ್ಯಪಾನ-ಧೂಮಪಾನ ತ್ಯಾಗ ಹಾಗೂ ದೈಹಿಕ ಚಟುವಟಿಕೆಗಳೇ ಪಾರ್ಶ್ವವಾಯುವಿನ ವಿರುದ್ಧ ಅತ್ಯುತ್ತಮ ರಕ್ಷಣೆಯಾಗಿವೆ.
