ಹೊಸದಿಗಂತ ಡಿಜಿಟಲ್‌ ಡೆಸ್ಕ್‌:
ಬಾಲಿವುಡ್‌ನ ಬಹುನಿರೀಕ್ಷಿತ ಮತ್ತು ಬೃಹತ್ ಬಜೆಟ್‌ನ ‘ರಾಮಾಯಣ’ ಚಿತ್ರದ ಮೊದಲ ಟೀಸರ್ ಕೊನೆಗೂ ಬಿಡುಗಡೆಯಾಗಿ ಇಡೀ ಭಾರತೀಯ ಚಿತ್ರರಂಗದ ಗಮನ ಸೆಳೆದಿದೆ. ನಿತೇಶ್ ತಿವಾರಿ ನಿರ್ದೇಶನದ ಈ ಮಹಾ ಪ್ರಾಜೆಕ್ಟ್‌ನ ಮೂರು ನಿಮಿಷಗಳ ಪರಿಚಯಾತ್ಮಕ ಟೀಸರ್ ಈಗಾಗಲೇ ಸಾಮಾಜಿಕ ಜಾಲತಾಣಗಳಲ್ಲಿ ಭಾರೀ ಸದ್ದು ಮಾಡುತ್ತಿದೆ. ರಾಮನ ಪಾತ್ರದಲ್ಲಿ ರಣಬೀರ್ ಕಪೂರ್ ಅವರ ನಿಷ್ಕಳಂಕ ಅಭಿನಯ ಗಮನ ಸೆಳೆಯುತ್ತಿದ್ದರೆ, ರಾವಣನ ಪಾತ್ರದಲ್ಲಿ ಕೇವಲ ಒಂದು ನೋಟದ ಮೂಲಕಲೇ ನಟ ಯಶ್ ಇಡೀ ಚರ್ಚೆಯ ಕೇಂದ್ರಬಿಂದು ಆಗಿದ್ದಾರೆ.
ಟೀಸರ್‌ನಲ್ಲಿ ಬಹುಪಾಲು ರಾಮನ ಜೀವನದ ದೃಶ್ಯಗಳಿವೆ. ರಾಮನಾಗಿ ಕಾಣಿಸಿಕೊಂಡಿರುವ ರಣಬೀರ್ ಕಪೂರ್ ತಮ್ಮ ಅಭಿನಯದಲ್ಲಿ ಶ್ರದ್ಧೆ, ಗಂಭೀರತೆ ಮತ್ತು ಶಾಂತತೆಯನ್ನು ಪ್ರದರ್ಶಿಸಿದ್ದಾರೆ. ಪ್ರಭು ಶ್ರೀರಾಮನ ಶಿಷ್ಟತೆಯನ್ನು ಅವರು ಹಿತವಾಗಿ ಹೊತ್ತೊಯ್ಯುವಲ್ಲಿ ಯಶಸ್ವಿಯಾಗಿದ್ದಾರೆ. ಆದರೆ ಟೀಸರ್ ಕೊನೆಯಲ್ಲಿ ಬರುವ ಕೇವಲ ಒಂದೆ ಸೆಕೆಂಡ್‌ನ ಯಶ್ ಲುಕ್, ಲಂಕಾಧಿಪತಿ ರಾವಣನ ಶಕ್ತಿಯನ್ನೂ, ಗರಿಮೆಯನ್ನೂ ಮಾತ್ರವಲ್ಲ, ಈ ಚಿತ್ರದಲ್ಲಿ ಅವರ ಪಾತ್ರದ ತೂಕವನ್ನು ಸೂಚಿಸುತ್ತದೆ.
ಅದ್ಭುತ ಕಣ್ಣುಗಳ ನೋಟ, ಗಂಭೀರ ಮುಖಭಾವ ಮತ್ತು ನಿಶಬ್ದ ದೃಷ್ಟಿಯಲ್ಲಿಯೇ ನಾಯಕನ ಶಕ್ತಿ ತೋರಿಸುವ ಈ ದೃಶ್ಯ ಅಭಿಮಾನಿಗಳಲ್ಲಿ ಉಸಿರುಗಟ್ಟಿಸುವಷ್ಟು ಪ್ರಭಾವ ಬೀರುತ್ತದೆ. ಯಶ್ ಅವರ ಈ ಲುಕ್ ಸೋಶಿಯಲ್ ಮೀಡಿಯಾದಲ್ಲಿ ಭಾರೀ ವೈರಲ್ ಆಗಿದ್ದು, ‘ಇದು ಬರೀ ಸ್ಯಾಂಪಲ್, ಮೈನ್ ಪಿಕ್ಚರ್ ಇನ್ನೂ ಬಾಕಿ ಇದೆ’ ಎಂಬ ಅಭಿಪ್ರಾಯಗಳು ಎಲ್ಲೆಡೆ ಹರಿದಾಡುತ್ತಿವೆ.
ನಾಯಕನ ಪಾತ್ರ ಮಾತ್ರವಲ್ಲ, ವಿಲನ್ ಪಾತ್ರವನ್ನೂ ಶ್ರದ್ಧೆಯಿಂದ, ಭಾವಪೂರ್ಣವಾಗಿ ನಿರ್ವಹಿಸಬಲ್ಲಷ್ಟು ನಟನೆ ಶಕ್ತಿ ಯಶ್ ಅವರದ್ದು ಎಂಬುದನ್ನು ಈ ಟೀಸರ್ ಮತ್ತೊಮ್ಮೆ ಸಾಬೀತುಪಡಿಸಿದೆ. ಸಾಮಾನ್ಯವಾಗಿ ರಾಮಾಯಣದಲ್ಲಿ ರಾವಣ ಎಂದರೆ ಕೆಟ್ಟವನು ಎಂಬ ಅಭಿಪ್ರಾಯವಿರುವುದು ಸಾಮಾನ್ಯ. ಆದರೆ ಈ ಚಿತ್ರದಲ್ಲಿ ನಿರ್ದೇಶಕ ನಿತೇಶ್ ತಿವಾರಿ ಅವರು ರಾವಣನ ಬಹುಮುಖ ವ್ಯಕ್ತಿತ್ವವನ್ನು ತೋರಿಸಲು ಯತ್ನಿಸುತ್ತಿದ್ದಾರೆ. ಯುದ್ಧನಾಯಕ, ಜ್ಞಾನಿ, ಶಿವಭಕ್ತ ಹಾಗೂ ತನ್ನ ನಾಡಿಗಾಗಿ ಎಲ್ಲವನ್ನೂ ತ್ಯಜಿಸಲು ಸಿದ್ಧನಾದ ರಾಜ ಎನ್ನುವ ಈ ಪಾತ್ರಕ್ಕೆ ಯಶ್ ಶ್ರೇಷ್ಠ ಆಯ್ಕೆ ಎನ್ನಬಹುದು.
ಈ ಸಿನಿಮಾದಲ್ಲಿ ಯಶ್ ‘ಮಾನ್ಸ್ಟರ್ ಮೈಂಡ್ ಕ್ರಿಯೇಷನ್ಸ್’ ಬ್ಯಾನರ್ ಮೂಲಕ ಸಹ ನಿರ್ಮಾಪಕರಾಗಿರುವುದು ಕನ್ನಡಿಗರಿಗೆ ಮತ್ತೊಂದು ಹೆಮ್ಮೆ. ನಿರ್ದೇಶಕ ನಿತೇಶ್ ತಿವಾರಿ ಹಾಗೂ ನಿರ್ಮಾಪಕ ನಮಿತ್ ಮಲ್ಹೋತ್ರಾ ಅವರ ದೃಷ್ಟಿಕೋನಕ್ಕೂ ಎಲ್ಲೆಡೆಯಿಂದ ಪ್ರಶಂಸೆ ವ್ಯಕ್ತವಾಗುತ್ತಿದೆ.
ಒಟ್ಟಿನಲ್ಲಿ, ‘ರಾಮಾಯಣ’ ಟೀಸರ್ ಬಿಡುಗಡೆಯಾದ ಮೊದಲ ದಿನದಿಂದಲೇ ರಾವಣನ ಲುಕ್‌ಗಾಗಿ ಯಶ್, ಮತ್ತು ಅವರ ನಟನೆಯ ಶಕ್ತಿ ಕುರಿತು ದೇಶದಾದ್ಯಂತ ಭಾರಿ ಚರ್ಚೆ ಶುರುವಾಗಿದೆ.
