ಆಫ್ರಿಕಾಕ್ಕೆ ಡಿ ಕಾಕ್ ಬಲ: ಆಸ್ಟ್ರೇಲಿಯಾ ಗೆಲುವಿಗೆ ಬೃಹತ್ ಟಾರ್ಗೆಟ್!

ಹೊಸದಿಗಂತ ಡಿಜಿಟಲ್‌ ಡೆಸ್ಕ್:‌

ವಿಶ್ವಕಪ್ ನ ಇಂದಿನ ಪಂದ್ಯದಲ್ಲಿ ಆಸ್ಟ್ರೇಲಿಯಾ ವಿರುದ್ಧ ದಕ್ಷಿಣ ಆಫ್ರಿಕಾ ರನ್ ಹೊಳೆ ಹರಿಸಿದೆ .

ಟಾಸ್​ ಸೋತು ಮೊದಲು ಬ್ಯಾಟಿಂಗ್ ಮಾಡಿದ ದಕ್ಷಿಣ ಆಫ್ರಿಕಾ ತಂಡ, ಕಾಂಗರೂಗಳ ಬೌಲರ್​ಗಳ ದಾಳಿಯ ಹೊರತಾಗಿಯೂ ಉತ್ತಮ ರನ್​ ಕಲೆ ಹಾಕಿತು.

ಆರಂಭಿಕ ಆಟಗಾರ ಕ್ವಿಂಟನ್ ಡಿ ಕಾಕ್ ಅವರ ಆಕರ್ಷಕ ಶತಕ ಮತ್ತು ಐಡೆನ್ ಮಾರ್ಕ್ರಾಮ್ ಅರ್ಧ ಶತಕದ ನೆರವಿನಿಂದ ನಿಗದಿತ 50 ಓವರ್​ಗಳಲ್ಲಿ 7 ವಿಕೆಟ್​ ಕಳೆದುಕೊಂಡು 311 ರನ್​ ಸಂಗ್ರಹಿಸಿದೆ. ಆಸ್ಟ್ರೇಲಿಯಾ ತಂಡಕ್ಕೆ ಗೆಲ್ಲಲು 312 ರನ್​ ಬೇಕು.

106 ಎಸೆತಗಳಲ್ಲಿ 5 ಸಿಕ್ಸ್​, 8 ಬೌಂಡರಿ ಸಹಿತ 109 ರನ್​ ಗಳಿಸಿದರು. ಆದರೆ, ಅವರೊಂದಿಗೆ ಕಣಕ್ಕಿಳಿದಿದ್ದ ನಾಯಕ ತೆಂಬಾ ಬವುಮಾ ಹೆಚ್ಚು ನಿಲ್ಲದೇ ಮತ್ತೆ ನಿರಾಸೆ ಮೂಡಿಸಿದರು. 55 ಎಸೆತ ಎದುರಿಸಿದ ತೆಂಬಾ, 2 ಬೌಂಡರಿ ಸಹಿತ ಕೇವಲ 35 ರನ್​ ಗಳಿಸಿ ಗ್ಲೆನ್ ಮ್ಯಾಕ್ಸ್‌ವೆಲ್​ಗೆ ಮೊದಲ ಬಲಿಯಾದರು.

ರಾಸ್ಸಿ ವ್ಯಾನ್ ಡೆರ್ ಡುಸೆನ್ ಕೂಡ ಕ್ವಿಂಟನ್​ಗೆ ಸಾಥ್ ನೀಡುವಲ್ಲಿ ವಿಫಲರಾದರು. 30 ಬಾಲ್​ ಆಡಿದ ರಾಸ್ಸಿ, ಕೇವಲ 26 ರನ್​ ಗಳಿಸಿ ತಮ್ಮ ವಿಕೆಟ್ ಒಪ್ಪಿಸಿದರು. ಈ ಘಳಿಗೆಯಲ್ಲಿ ಶತಕ ಫೂರ್ಣಗೊಳಿಸಿದ್ದ ಕ್ವಿಂಟನ್, ತಂಡದ ಮೊತ್ತ 197 ರನ್​ ಆದಾಗ 34.5ನೇ ಓವರ್​ನಲ್ಲಿ ಮ್ಯಾಕ್ಸ್‌ವೆಲ್​ಗೆ ವಿಕೆಟ್​ ಒಪ್ಪಿಸಿ ತಮ್ಮ ಆಟಕ್ಕೆ ಫುಲ್​ ಸ್ಟಾಪಿಟ್ಟರು. ಡಿಕಾಕ್‌ ಔಟಾದ ಬಳಿಕ ಅಬ್ಬರಿಸಿದ ಐಡೆನ್‌ ಮರ್ಕ್ರಾಮ್‌, ಆಕರ್ಷಕ ಅರ್ಧಶತಕ ಸಿಡಿಸಿದ ಬಳಿಕ ಪೆವಿಲಿಯನ್‌ ಸೇರಿಕೊಂಡರು. 44 ಎಸೆತದಲ್ಲಿ 1 ಸಿಕ್ಸ್​, 7 ಬೌಂಡರಿ ಸಹಿತ ಐಡೆನ್ ಮಾರ್ಕ್ರಾಮ್, 56 ರನ್​ ಕಲೆ ಹಾಕಿ ತಂಡದ ಮೊತ್ತವನ್ನು ಗರಿಷ್ಠ ಮಟ್ಟಕ್ಕೆ ತಂದು ನಿಲ್ಲಿಸಿದರು.