ಭಾರತದ ಸಂಸ್ಕೃತಿ ಮತ್ತು ಪರಂಪರೆಗೆ ದೇವಿ ಆರಾಧನೆಯ ಆಳವಾದ ನಂಟಿದೆ. ಆದರೆ, ಜಗತ್ತಿನಾದ್ಯಂತ ಸ್ತ್ರೀಶಕ್ತಿಯ, ಹಾಗು ಪವಿತ್ರತೆಯ ಚಿಹ್ನೆಯಾದ ‘ಯೋನಿ’ಗೆ ಪೂಜೆ ನಡೆಯುವ ಏಕೈಕ ಸ್ಥಳ ಅಸ್ಸಾಂ ರಾಜ್ಯದಲ್ಲಿರುವ ಕಾಮಾಖ್ಯಾ ದೇವಿ ದೇವಸ್ಥಾನ. ಈ ದೇವಸ್ಥಾನವು ಶಕ್ತಿಪೀಠಗಳಲ್ಲಿ ಅತ್ಯಂತ ಪುರಾತನ ಹಾಗೂ ಪವಿತ್ರ ಸ್ಥಳವಾಗಿದ್ದು, ಸ್ತ್ರೀತನದ ಸೃಜನಶೀಲ ಶಕ್ತಿಗೆ ಗೌರವ ಸೂಚಿಸುತ್ತದೆ.
ಕಾಮಾಖ್ಯಾ ದೇವಾಲಯದ ಇತಿಹಾಸ:
ಅಸ್ಸಾಂನ ಗುವಾಹಟಿ ನಗರದಲ್ಲಿರುವ ನಿಲಾಚಲ ಪರ್ವತದ ಮೇಲೆ ಕಾಮಾಖ್ಯಾ ದೇವಾಲಯ ನೆಲೆಗೊಂಡಿದೆ. ಪುರಾಣಗಳ ಪ್ರಕಾರ, ಶಿವನ ಪತ್ನಿ ಸತಿದೇವಿ ಯಜ್ಞದ ಅಗ್ನಿಗೆ ತನ್ನನ್ನು ತಾನು ಅರ್ಪಿಸಿದ ಬಳಿಕ, ದುಃಖಿತನಾದ ಶಿವನು ಆಕೆಯ ಶರೀರವನ್ನು ಹೊತ್ತು ಸಂಹಾರ ತಾಂಡವ ಆರಂಭಿಸಿದರು. ಆಗ ವಿಷ್ಣು ದೇವರು ಆಕೆಯ ಶರೀರವನ್ನು ತನ್ನ ಚಕ್ರದಿಂದ 51 ತುಂಡುಗಳಾಗಿ ಕತ್ತರಿಸಿದರೆಂದು ಹೇಳಲಾಗಿದೆ.
ಈ ಕತ್ತರಿಸಿದ ಭಾಗಗಳು ಭಾರತದೆಲ್ಲೆಡೆ ಬಿದ್ದು 51 ಶಕ್ತಿಪೀಠಗಳು ಉಂಟಾದವು. ಕಾಮಾಖ್ಯಾ ದೇವಾಲಯದಲ್ಲಿ ಸತಿದೇವಿಯ ಯೋನಿ ಭಾಗ ಬಿದ್ದಿದೆ ಎಂದು ನಂಬಲಾಗುತ್ತದೆ. ಆದ್ದರಿಂದ ಇಲ್ಲಿ ಲಿಂಗ ಅಥವಾ ಪ್ರತಿಮೆಯ ಆರಾಧನೆ ಇಲ್ಲ – ಬದಲಾಗಿ, ಭೂಮಿಯಲ್ಲಿರುವ ಒಂದು ಪ್ರಾಕೃತಿಕ ಬಿರುಕು (ಯೋನಿ ಆಕಾರದ ಶಿಲೆ) ದೇವಿಯಾಗಿ ಪೂಜಿಸಲ್ಪಡುತ್ತದೆ.
ಈ ದೇವಾಲಯದಲ್ಲಿ ಅಂಬುಬಾಚಿ ಮೇಳ ಅತ್ಯಂತ ಪ್ರಸಿದ್ಧ. ವರ್ಷದಲ್ಲಿ ಒಂದು ಬಾರಿ, ದೇವಿ “ಋತುಸ್ರಾವ” ಆಗುತ್ತಾಳೆ ಎಂಬ ನಂಬಿಕೆಯಿಂದ ಮೂರು ದಿನಗಳ ಕಾಲ ದೇವಾಲಯ ಮುಚ್ಚಲಾಗುತ್ತದೆ. ನಾಲ್ಕನೇ ದಿನ ದೇವಿಯ ಶುದ್ಧೀಕರಣದ ಬಳಿಕ ದೇವಸ್ಥಾನ ಮತ್ತೆ ತೆರೆದುಕೊಳ್ಳುತ್ತದೆ. ಈ ಸಮಯದಲ್ಲಿ ಭಕ್ತರು ಸಾವಿರಾರು ಸಂಖ್ಯೆಯಲ್ಲಿ ಸೇರಿ ದೇವಿಯ ಶಕ್ತಿಗೆ ನಮನ ಸಲ್ಲಿಸುತ್ತಾರೆ.
ಕಾಮಾಖ್ಯಾ ದೇವಾಲಯವು ಕೇವಲ ಧಾರ್ಮಿಕ ಕೇಂದ್ರವಲ್ಲ, ಅದು ಸ್ತ್ರೀಶಕ್ತಿಯ ಗೌರವ, ಸೃಜನಶೀಲತೆ ಮತ್ತು ಶಕ್ತಿಯ ಪ್ರತೀಕವಾಗಿದೆ. ಇಲ್ಲಿ ನಡೆಯುವ ಯೋನಿ ಪೂಜೆ ದೇವಿಯ ಶಕ್ತಿಯನ್ನು ಮಾತ್ರವಲ್ಲದೆ, ಮಾನವ ಜೀವನದ ಸೃಜನಶೀಲ ಮೂಲವಾದ ಸ್ತ್ರೀತನದ ಮಹತ್ವವನ್ನೂ ಸಾರುತ್ತದೆ.
