ಹೊಸದಿಗಂತ ವರದಿ, ದಾವಣಗೆರೆ:
ಮೊದಲು ನಾವೆಲ್ಲರೂ ಹಿಂದುಗಳು. ನಂತರ ವೀರಶೈವ ಲಿಂಗಾಯತ, ಪಂಚಮಸಾಲಿ. ಹಿಂದು ಧರ್ಮವೇ ಅಲ್ಲ ಎನ್ನುವವರು ಮೊದಲು ಬಸವಣ್ಣ ಸೇರಿದಂತೆ ಎಲ್ಲಾ ಶರಣರ ವಚನಗಳನ್ನು ಅಧ್ಯಯನ ಮಾಡಿ, ವೇದೋಪನಿಷತ್ತು ಓದಿಕೊಂಡು ಚರ್ಚೆಗೆ ಬರಲಿ ಎಂದು ಹರಿಹರ ವೀರಶೈವ ಲಿಂಗಾಯತ ಪಂಚಮಸಾಲಿ ಪೀಠದ ಶ್ರೀ ವಚನಾನಂದ ಸ್ವಾಮೀಜಿ ಸವಾಲು ಹಾಕಿದ್ದಾರೆ.
ನಗರದಲ್ಲಿ ಭಾನುವಾರ ಸುದ್ದಿಗಾರರೊಂದಿಗೆ ಮಾತನಾಡಿದ ಅವರು, ಹಿಂದು ಧರ್ಮದಲ್ಲಿ ಆಯಾ ಕಾಲಘಟ್ಟಕ್ಕೆ ತಕ್ಕಂತೆ ಕೆಲವೊಂದು ವಿಚಾರ ತಪ್ಪಿದ್ದರೆ ಎಲ್ಲವನ್ನೂ ತಪ್ಪೆಂದು ವ್ಯಾಖ್ಯಾನಿಸಲಾಗದು. ದೇವರ ಪರಿಕಲ್ಪನೆಯು ಉಪನಿಷತ್ತುಗಳಲ್ಲಿ ಇರುವಂತೆಯೇ ವಚನಗಳಲ್ಲಿದೆ. ಲಿಂಗಾಯತರು ಹಿಂದುಗಳಲ್ಲ ಎಂಬ ವಾದ ಮಾಡುವವರು ವಾದ ಮಾಡಿಕೊಂಡು ಹೋಗಲಿ. ನಾವು ಜನಜಾಗೃತಿ ಮಾಡುತ್ತೇವೆ. ನಮಗೆ ಸಂಘರ್ಷ ಬೇಡ, ಸಂಶೋಧನೆ ಬೇಕು ಎಂದರು.
ನಮ್ಮ ತತ್ವ, ಸಿದ್ಧಾಂತ ಏನೇ ಇದ್ದರೂ ದೇಶದ ಪ್ರಗತಿಯ ಹಿತದೃಷ್ಟಿಯಿಂದ ನಾವೆಲ್ಲಾ ಹಿಂದುಗಳಾಗಿ ಒಗ್ಗೂಡಬೇಕು. ಪ್ರಸ್ತುತ, ಲಂಡನ್ ನಲ್ಲಿ ಪ್ರಕ್ಷುಬ್ಧ ವಾತಾವರಣವಿದೆ. ನೆರೆಯ ಅಫ್ಘಾನಿಸ್ಥಾನ, ಪಾಕಿಸ್ತಾನ, ಶ್ರೀಲಂಕದಲ್ಲಿ ಏನಾಗುತ್ತಿದೆ ಎಂಬುದನ್ನು ಗಮನಿಸಬೇಕು. ಭಾರತದಲ್ಲಿ ವಿವಿಧತೆಯಲ್ಲಿ ಏಕತೆ ಕಾಣುತ್ತಿದ್ದೇವೆ. ನಾವೆಲ್ಲಾ ಒಂದಾಗಿ ಹೋಗಬೇಕಾದ ಅವಶ್ಯಕತೆ ಹಿಂದಿಗಿಂತ ಈಗ ಹೆಚ್ಚಿದೆ ಎಂದು ಅವರು ನುಡಿದರು.
ದಾವಣಗೆರೆಯಲ್ಲಿ ನಡೆಯುವ ಬಸವಶೈವದಲ್ಲಿ ಹಿಂದುತ್ವ ಗ್ರಂಥ ಬಿಡುಗಡೆ ಕಾರ್ಯಕ್ರಮದಲ್ಲಿ ಪಾಲ್ಗೊಳ್ಳದಂತೆ ಕೆಲವರು ನಮಗೆ ಮೆಸೇಜ್ ಹಾಕಿದ್ದರು. ಅದಕ್ಕೆಲ್ಲಾ ನಾನು ಕೇರ್ ಮಾಡುವುದಿಲ್ಲ. ಹೇಳುವಂತಹ ವಿಚಾರವು ಸ್ಪಷ್ಟವಾಗಿದ್ದಾಗ ನಾವು ಯಾರಿಗೂ ಹೆದರುವ ಅವಶ್ಯಕತೆ ಇಲ್ಲ. ಕೆಲವರಿಗೆ ಪ್ರತ್ಯೇಕ ಧರ್ಮವಷ್ಟೇ ಉದ್ದೇಶವಾಗಿದೆ. ದಾವಣಗೆರೆಯ ವೀರರಾಣಿ ಕಿತ್ತೂರು ಚನ್ನಮ್ಮ ವೃತ್ತದಲ್ಲಿ ಅಳವಡಿಸಿದ್ದ ಕಾರ್ಯಕ್ರಮದ ಫ್ಲೆಕ್ಸ್ ಗೆ ಯಾರೋ ಕಿಡಿಗೇಡಿಗಳು ಬ್ಲೇಡ್ ಹಾಕಿದ್ದಾರೆ. ಯಾರು ಸಮಾಜವನ್ನು ಸರಿದಾರಿಗೆ ಕೊಂಡೊಯ್ತುತ್ತಿದ್ದಾರೆ, ಯಾರು ಸಮಾಜ ಒಡೆಯುತ್ತಿದ್ದಾರೆ ಎಂಬುದು ಈಗ ಜನರಿಗೆ ಗೊತ್ತಾಗಿದೆ. ನಮ್ಮದು ಕತ್ತರಿ ಹಾಕುವ ಸಂಸ್ಕೃತಿ ಅಲ್ಲ. ಸೂಜಿಯ ರೀತಿ ನಾವು ಎಲ್ಲರನ್ನೂ ಕೂಡಿಸಿಕೊಂಡು ಹೋಗುವವರು ಎಂದು ಅವರು ಸೂಚ್ಯವಾಗಿ ಹೇಳಿದರು.
