ಹೊಸದಿಗಂತ ಡಿಜಿಟಲ್ ಡೆಸ್ಕ್:
ಭಾನುವಾರದ ಸ್ಪೆಷಲ್ ಎಲ್ಲರೂ ಮನೆಯಲ್ಲಿ ಚಿಕನ್ ಅಥವಾ ಮಟನ್ ತಿನ್ಬೇಕು ಅಂತ ಅನ್ಸೋದು ಸರ್ವೇ ಸಾಮಾನ್ಯ. ಆದ್ರೆ ಕೆಲವರು ಮಟನ್ ನಲ್ಲಿ ಮಟನ್ ಬಿರಿಯಾನಿ, ಮಟನ್ ಚಾಪ್ಸ್, ಮಟನ್ ಕರ್ರಿ, ಮಟನ್ ಕೈಮ ಇಂತಹ ಸಾಕಷ್ಟು ಬಗೆಯ ಅಡುಗೆಗಳು ಎಲ್ಲರೂ ಟ್ರೈ ಮಾಡ್ತಾರೆ, ಆದ್ರೆ ಯಾವತ್ತಾದ್ರೂ ಮಟನ್ ಕೈಮಾ ಉಪಿಟ್ಟು ಮಾಡಿದ್ದೀರಾ. ಹಾಗಾದ್ರೆ ಈ ರೆಸಿಪಿ ಟ್ರೈ ಮಾಡಿ..
ಬೇಕಾಗುವ ಪದಾರ್ಥಗಳು:
ಮಟನ್ ಕೈಮಾ- 200 ಗ್ರಾಂ
ರವೆ- 1 ಕಪ್
ಎಣ್ಣೆ- 3 ಚಮಚ
ಈರುಳ್ಳಿ- ಅರ್ಧ ಕಪ್
ಹಸಿಮೆಣಸಿನ ಕಾಯಿ- 2
ಶುಂಠಿ,ಬೆಳ್ಳುಳ್ಳಿ ಪೇಸ್ಟ್- 1 ಚಮಚ
ಬಟಾಣಿ- ಅರ್ಧ ಕಪ್
ಕರಿಬೇವು- ಸ್ವಲ್ಪ
ಅಚ್ಚ ಖಾರದ ಪುಡಿ – 1 ಚಮಚ
ದನಿಯಾ ಪುಡಿ- 1/2 ಚಮಚ
ಚಕ್ಕೆ-ಲವಂಗ ಪುಡಿ- 1/4 ಚಮಚ
ಉಪ್ಪು- ರುಚಿಗೆ
ಟೊಮೆಟೋ – 1
ಬಿಸಿ ನೀರು- ಮೂರು ಕಪ್
ಕೊತ್ತಂಬರಿ ಸೊಪ್ಪು- ಸ್ವಲ್ಪ
ಮಟನ್ ಕೈಮಾ ಉಪಿಟ್ಟು ಮಾಡುವ ವಿಧಾನ:
ಮೊದಲಿಗೆ ಒಂದು ಬಾಣಲೆಯನ್ನು ಒಲೆಯ ಮೇಲಿಟ್ಟು ಅದಕ್ಕೆ ಸ್ವಲ್ಪ ಎಣ್ಣೆ ಹಾಕಿ. ಅದು ಕಾದ ನಂತರ ಒಂದು ಕಪ್ ರವೆಯನ್ನು ಹುರಿದು ಪಕ್ಕೆಕ್ಕೆ ಇಟ್ಟುಕೊಳ್ಳಿ.
ಮತ್ತೊಂದು ಪಾತ್ರೆಯನ್ನು ಒಲೆಯ ಮೇಲಿಟ್ಟು ಅದಕ್ಕೆ ಸ್ವಲ್ಪ ಎಣ್ಣೆ ಹಾಕಿ. ಅದು ಕಾದ ನಂತರ ಅದಕ್ಕೆ ಹಚ್ಚಿದ ಈರುಳ್ಳಿ ಹಾಕಿ, ಕೆಂಪಗಾದ ಬಳಿಕ ಹಸಿಮೆಣಸಿನ ಕಾಯಿ, ಕರಿಬೇವು ಹಾಕಿ ಕೈ ಆಡಿಸಿ. ನಂತರ ಇದಕ್ಕೆ ಶುಂಠಿ ಬೆಳ್ಳುಳ್ಳಿ ಪೇಸ್ಟ್, ಬಟಾಣಿ ಹಾಗೂ ಟೊಮೆಟೋ ಹಾಕಿ ಬೇಯಿಸಿಕೊಳ್ಳಿ.
ನಂತರ ಮಟನ್ ಕೈಮಾ, ಅರಿಶಿಣದ ಪುಡಿ ಹಾಕಿ 5 ನಿಮಿಷ ಬೇಯಲು ಬಿಡಿ. ಬಳಿಕ ಅಚ್ಚ ಖಾರದ ಪುಡಿ, ದನಿಯಾ ಪುಡಿ, ಚಕ್ಕೆ ಲವಂಗ ಪುಡಿ ಹಾಕಿ ಚೆನ್ನಾಗಿ ಮಿಶ್ರಣ ಮಾಡಿ ಸಣ್ಣ ಉರಿಯಲ್ಲಿ 3 ನಿಮಿಷ ಬೇಯಲು ಬಿಡಿ. ಇದಕ್ಕೆ ಬಿಸಿನೀರು ಹಾಕಿ 10 ನಿಮಿಷ ಚೆನ್ನಾಗಿ ಕುದಿಯಲು ಬಿಡಿ, ಬಳಿಕ ಗಂಟುಗಳಾಗದಂತೆ ರವೆಯನ್ನು ಹಾಕಿ ಚೆನ್ನಾಗಿ ಮಿಶ್ರಣ ಮಾಡಿ, ಇದೀಗ ಕೊತ್ತಂಬರಿ ಸೊಪ್ಪಿನೊಂದಿಗೆ ಅಲಂಕರಿಸಿದರೆ ರುಚಿಕರವಾದ ಮಟನ್ ಕೈಮಾ ಉಪ್ಪಿಟ್ಟು ಮನೆಯವರೊಂದಿಗೆ ಸವಿಯಲು ಸಿದ್ದ.
